ول الەۋمەتتىك جەلىدەگى پاراقشاسىندا وسىدان ەكى جىل بۇرىن 6 قاراشادا 2000 ادامدىق ۇلكەن مەشىتتىڭ قۇرىلىسى باستالعانىن جاريالاعان.
مەشىت جانىنان 2021 جىلى قىزدارعا ارنالعان مەدرەسەنىڭ دە قازىعى قاعىلعان. ال 2022 جىلى ۇلدارعا ارنالعان مەدرەسە قۇرىلىسى باستالىپتى. وسىلايشا, ەكى جىل وتكەن سوڭ مەشىت پەن مەدرەسە قاسىنان تاعى ءتۇرلى قىزمەتتەگى بىرنەشە عيمارات بوي كوتەرىپ وتىر.
بالقيا بالتاباي بۇعان دەيىن تويعا جينالعان 20 ميلليون تەڭگەنى مەشىتكە تابىستايتىندارىن دا ايتقان ەدى. سونداي-اق, قۇنى 50 ميلليون تۇراتىن Toyota Land Cruiser 300 كولىگىن دە مەشىت قۇرىلىسىنا اتاپتى.
"قۇرىلىسىنا 2,5 ميلليارد تەڭگە جۇمسالدى. كاسىپكەرلەردىڭ, دەمەۋشىلەردىڭ قولداۋىمەن, حالىقتىڭ بىرلىگىمەن قازاق ەلىنە تاعى دا ءبىر مەشىت. 2000 ادامدىق مەشىت جانە ۇلدار مەدرەسەسى, قىزدار مەدرەسەسى, سپورت كەشەنى, مەيرامحانا, ۇستازدار ءۇيى - 6 بىردەي عيماراتتىڭ اشىلۋى بولادى. باس ءمۇفتيدىڭ ءوزى كەلىپ اشادى", - دەپ جازدى ول پاراقشاسىندا.
ال بۇگىن سول التى عيماراتتىڭ رەسمي اشىلۋ سالتاناتى ءوتتى. ءبىر مەزەتتە 2000 ادام قۇلشىلىق جاسايتىن مەشىتتىڭ اشىلۋ سالتاناتىنا قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى, ارىس قالاسىنىڭ اكىمى گۇلجان قۇرمانبەكوۆا, مەشىت سالۋعا اتسالىسقان كاسىپكەرلەر مەن اقساقالدار جانە قالا تۇرعىندارى قاتىسقان.
جاڭا مەشىتتىڭ ءمىناجات زالى 1500 شارشى مەتر بولادى. ال قۇرىلىس ساۋلەتى ۇلتتىق ناقىشپەن ارلەنگەن.
جاڭا مەشىتكە ءدىني باسقارمانىڭ شەشىمىمەن "حازىرەت ءابۋ باكىر ءاس-سىددىق" اتاۋى بەرىلىپ, باس ءمۇفتيدىڭ بۇيرىعىمەن بەرىك ۇيسىنباەۆ يمام بولىپ تاعايىندالعان. مەشىتتىڭ اشىلۋىنا باس ءمۇفتي ناۋرىزباي قاجى تاعان ۇلى ارنايى كەلگەن.
"مەشىتتىڭ تاعى ءبىر ەرەكشەلىگى مۇناراسى مادينەگە, قۇبىلاسى مەككەگە باعىتتالىپتى. ءۇش قاباتتان تۇراتىن مەشىتتە ءبىر مەزەتتە 2 مىڭ ادام قۇلشىلىق ەتە الادى. مۇندا ۇلكەن زالعا ىلىنگەن ليۋسترادا 99 جارىقشام قويىلعان. بۇل اللانىڭ 99 ەسىمىنە ورايلاستىرعان. بۇدان بولەك, مۇندا كونفەرەنتسيا زالى, كىتاپحاناسى, ءدارىسحانالار, ءبىر ۇلكەن ايەلدەر زالى, نەكە جانە يمامدار بولمەسى بار. سونىمەن قاتار, 100 اۆتوكولىككە ارنالعان اۆتوتۇراققا ورىن بولىنگەن. مەشىت اۋماعىندا 150 كىسىگە ارنالعان اسحاناسى دا قاراستىرىلعان", - دەيدى بالقيا بالتاباي.
مەشىتتىڭ سوعىلۋىنا دەمەۋشى بولعان بالقيا بالتاباي سالماعى 9 تونناعا جۋىق بولاتىن, قوي جۇنىنەن توقىلعان كىلەمدى تۇركيادان ارنايى الدىرتقانىن جەتكىزدى.
جەلى قولدانۋشىلارى ونىڭ ىسىنە جىلى لەبىزدەرىن جازعان.
