2017 جىلى 11 مامىردا تالدىقورعان قالاسىندا تۋعان مۋسليما ساماتقىزى 18 ميلليونىنشى تۇرعىن رەتىندە تىركەلگەن. ودان كەيىن 2021 جىلى 20 ماۋسىمدا ءجانيا ازاماتقىزى ءومىر ەسىگىن اشىپ, الماتى وبلىسى ەكىگە بولىنبەي تۇرعان تۇستا جەتىسۋدىڭ بالاسى سانالعان ەدى. 14 قاراشا كۇنى تاڭعى ساعات 8-دە ازىمباەۆتار اۋلەتىنە ايسۇلتان مۇحتار ۇلى اتتى شەكەسى تورسىقتاي باتىر قوسىلدى.
«وسىنداي ۇلكەن ماداققا يە بولىپ وتىرعانىمىزعا ءالى سەنە الماي تۇرمىن. كوپبالالى وتباسى بولدىق. بۇل – ءبىزدىڭ ءتورتىنشى بالامىز. قۋانىشىمدا شەك جوق. تالدىقورعاندا 2013 جىلدان بەرى تۇرامىن, ءوزىم اسكەري اداممىن. تۋعان جەرىم – شىمكەنت قالاسى. وتاۋ قۇرعانىمىزعا 8 جىل بولدى. 3 ۇل, 1 قىزىمىز بار. ون جىلدان بەرى جەتىسۋ جەرىندە قىزمەت ەتىپ جاتىرمىن. ۇلىمنىڭ ەسىمىن ءوزىم قويدىم», دەيدى ايسۇلتاننىڭ اكەسى مۇحتار سابدەنباي ۇلى.
ءسابيدىڭ سالماعى – 3 كگ, بويى – 50 سم. اناسى ديانا تالعاتقىزىنىڭ جاعدايى جاقسى. قازىر دارىگەرلەردىڭ جەكە باقىلاۋىندا.
قۋانىشتى جاڭالىقتى ەستي سالا وبلىس اكىمى بەيبىت يساباەۆ قالالىق پەرزەنتحاناعا ارنايى بارىپ, جاس وتباسىنى قۋانىشىمەن قۇتتىقتادى.
«20 ميلليونىنشى تۇرعىننىڭ تۋ باقىتى جەتىسۋ جەرىنە بۇيىرعان ەكەن. بۇل – تاريحى تەرەڭ, قازىنالى جەر. سول بايتاق مەكەننىڭ ءبىر پەرزەنتى بولۋ – ۇلكەن مارتەبە. ءتىل-كوزدەن امان بولسىن. جۇمىستارىڭىزعا تابىس تىلەيمىن. بالالار – ءبىزدىڭ بايلىعىمىز! ءاربىر ءسابيدىڭ امان-ەسەن جەر ءجانناتى جەتىسۋدا ومىرگە كەلۋى – ءبىز ءۇشىن ۇلكەن قۋانىش. وسىنداي جاقسىلىقتار جاقسىلىققا ۇلاسا بەرسىن. ايسۇلتاننىڭ دەنى ساۋ, عۇمىرى ۇزاق, بولاشاعى جارقىن بولسىن!», دەدى ب.يساباەۆ.
كوپبالالى وتباسىنا پرەزيدەنت اتىنان ارنايى سىيلىقپەن قاتار, «وتباسى بانكىنىڭ» 2 ملن تەڭگەلىك سەرتيفيكاتى تابىستالدى.
جەتىسۋ وبلىسى
