«اسىقاتا» اۋرۋحاناسىندا بوسانعان 35 جاستاعى گۇلميرا ىزتىلەۋوۆا وتباسىمەن كەڭەسە كەلە, ۇلعا ءالىمحان دەپ ات قويىپتى. بۇل شاكەنوۆتەر وتباسىنداعى ءتورتىنشى بالا. بەس قۇرساق كوتەرگەن انانىڭ, وكىنىشكە قاراي, ءبىر ءسابيى شەتىنەپ كەتكەن ەكەن. دۇنيە ەسىگىن اشقان كەزدەگى سالماعى – 3400 گرامم, بويى 51 سانتيمەتر بولعان ءالىمحاننىڭ اناسى گۇلميرا «جەڭىس» جالپى ورتا مەكتەبىندە بيولوگيا ءپانىنىڭ مۇعالىمى بولسا, اكەسى ەرعاليدىڭ تۇراقتى جۇمىسى جوق. ازىرگە جاس وتباسى «ديپلوممەن – اۋىلعا!» باعدارلاماسىمەن شالعايداعى اۋىلدارعا بارۋدى نيەت ەتىپ وتىر. ءۇش ۇل مەن قىزدىڭ اتاسى اسقار جانە اجەسى وڭالايدىڭ دا قۋانىشىندا شەك جوق. وتباسىنداعى ءۇشىنشى بالانىڭ ەل حالقىنىڭ سانىن جيىرما ميلليونعا جەتكىزىپ, بۇكىل ەلدى قۋانتقانىن ماقتان ەتەدى.
تۇركىستان وبلىسىنىڭ اكىمى دارحان ساتىبالدى جەتىساي اۋدانىنداعى «اسىقاتا» اۋرۋحاناسىنا ارنايى بارىپ, ءسابيدىڭ اتا-اناسىن قۇتتىقتادى. «بۇگىن پرەزيدەنتىمىزدىڭ قۇتتىقتاۋىن سالتاناتتى تۇردە جەتكىزۋ ءۇشىن كەلىپ تۇرمىز. ۇلى دالا ىرگەسى ۇرپاعىمەن بەرىك. قاسيەتتى تۇركىستان وڭىرىندە قازاق ەلىنىڭ 20 ميلليونىنشى تۇرعىنى تۋعانىنا وتە قۋانىشتىمىز. ءبىز باتىر انالارىمىزبەن ماقتانامىز. جىل سايىن رەسپۋبليكامىزدا دۇنيەگە كەلەتىن 400 مىڭنان استام بالانىڭ ءاربىر جەتىنشىسى تۇركىستان وبلىسىندا دۇنيەگە كەلەدى. بۇگىندە وبلىس حالقىنىڭ سانى 2 ميلليوننان استى. تۇركىستان ءوڭىرى ەلىمىزدە ادام كاپيتالىن كوبەيتۋگە ايرىقشا ۇلەس قوسىپ جاتىر. بۇل – ەلىمىز ءۇشىن, ءبىز ءۇشىن ماقتانىش. سىزدەر بۇگىن تاريحقا ەنىپ وتىرسىزدار», دەگەن دارحان ساتىبالدى 20 ميلليونىنشى تۇرعىننىڭ اتا-اناسىنا پرەزيدەنت اتىنان باعالى سىيلىق ۇسىنىپ, «وتباسى بانك» اتىنان تاعايىندالعان 2 ملن تەڭگەنىڭ سەرتيفيكاتىن تاپسىردى.
تۇركىستان وبلىسى
