فوتو: اقوردا
مينيستر ساياسات نۇربەكتىڭ ايتۋىنشا, بيىل قىركۇيەك ايىنان باستاپ قازاقستاندا باكالاۆريات باعدارلاماسى بويىنشا ستيپەنديا مولشەرى 20 پايىزعا, ماگيستراتۋرا مەن دوكتورانتۋرادا 15 پايىزعا كوبەيدى. جوعارى وقۋ ورىندارىنداعى پروفەسسور-وقىتۋشىلار قۇرامىنىڭ جالاقىسى 160 مىڭ تەڭگەدەن 350 مىڭ تەڭگەگە دەيىن, ال ۇلتتىق ۋنيۆەرسيتەتتەردە بۇل كورسەتكىش 228 مىڭ تەڭگەدەن 400 مىڭ تەڭگەگە دەيىن ءوستى.
سونىمەن قاتار ستۋدەنتتەر جاتاقحانالارىنداعى ورىن تاپشىلىعى ءۇش ەسە, ياعني 2022 جىلعى 55 050-دەن 2023 جىلعى قازاندا 17 488-گە دەيىن ازايدى.
قاسىم-جومارت توقاەۆقا جوعارى ءبىلىم بەرۋ سالاسىنداعى ينفراقۇرىلىم مەن تسيفرلىق ارحيتەكتۋرانىڭ دامۋى, سونىڭ ىشىندە ءال-فارابي اتىنداعى قازۇۋ مەن ل.گۋميلەۆ اتىنداعى ەۇۋ كامپۋستارىنىڭ قۇرىلىسى تۋرالى مالىمەت بەرىلدى. مينيسترلىك تسيفرلىق ۋنيۆەرسيتەت مودەلىن ازىرلەپ جاتىر. ستۋدەنتتەر Coursera جاھاندىق ونلاين ءبىلىم بەرۋ پلاتفورماسىندا وقۋ مۇمكىندىگىنە يە بولدى. قازىردىڭ وزىندە ولاردىڭ 40 مىڭى سەرتيفيكات الدى. پلاتفورماداعى 100 نەگىزگى كۋرستى قازاق تىلىندە وقۋعا بولادى.
مەملەكەت باسشىسىنا قازاقستاننىڭ الەمدىك ءبىلىم بەرۋ كەڭىستىگىندە بەلسەندى ىلگەرىلەپ كەلە جاتقانى تۋرالى باياندالدى. QS رەيتينگىنە 21 جوعارى وقۋ ورنى, ال Times Higher Education رەيتينگىنە 4 ۋنيۆەرسيتەت كىرەدى. جىل سوڭىنا دەيىن ەلىمىزدە جۇمىس ىستەيتىن جەتەكشى شەتەلدىك ۋنيۆەرسيتەتتەر فيليالدارىنىڭ سانى سەگىزگە جەتەدى. حالىقارالىق كومپانيالارمەن بىرلەسىپ, جاساندى ينتەللەكت سالاسىندا كادر دايارلاۋ ءىسى باستالدى. «ماماندىعىم – بولاشاعىم» جوباسى اياسىندا وڭىرلەردە كادر قاجەتتىلىگىنە فورسايت-زەرتتەۋ جۇرگىزۋ ءۇشىن جوبالىق كەڭسەلەر اشىلىپ جاتىر.
قاسىم-جومارت توقاەۆقا بەرىلگەن مالىمەت بويىنشا ۇلتتىق عىلىم اكادەمياسىنىڭ ينستيتۋتسيونالدىق ءرولى كۇشەيىپ كەلەدى. پرەزيدەنت جانىنداعى عىلىم جانە تەحنولوگيالار جونىندەگى ۇلتتىق كەڭەس ءوز جۇمىسىن باستادى. عالىمداردىڭ ورتاشا جالاقىسى 2 ەسە ءوسىپ, 252 مىڭ تەڭگەگە جەتتى. ىرگەلى زەرتتەۋلەرمەن اينالىساتىن عىلىمي-زەرتتەۋ ينستيتۋتتارى تىكەلەي قارجىلاندىرىلاتىن بولدى. عىلىم سالاسىنىڭ 2023-2025 جىلدارعا ارنالعان جالپى بيۋدجەتى 3,3 ەسە ارتىپ, 643 ميلليارد تەڭگەنى قۇرادى.
ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ عالىمدارى تازالىعى 99,5 پايىز مولشەرىندە سەلەن الۋ تەحنولوگياسىن ويلاپ تاپتى. بۇل حيميالىق ەلەمەنت مەديتسينادا, ەلەكترونيكادا جانە شىنى وندىرىسىندە كەڭىنەن قولدانىلادى. وسى جاڭالىقتىڭ ارقاسىندا قازاقستان اتالعان سيرەك مەتالدى اناعۇرلىم ءتيىمدى باعامەن ەكسپورتتاي الادى.
كەزدەسۋ سوڭىندا مەملەكەت باسشىسى ءبىلىم بەرۋ دەڭگەيىن ارتتىرۋ, يننوۆاتسيالاردى ىنتالاندىرۋ جانە عىلىمي زەرتتەۋ جۇمىستارىنىڭ ساپاسىن جاقسارتۋ, سونداي-اق ستۋدەنتتەر جاتاقحانالارىنداعى ورىن تاپشىلىعىن ازايتۋ جونىندە بىرقاتار تاپسىرما بەردى.
