وبلىس اكىمىنىڭ ءباسپاسوز قىزمەتى
20 ميلليونىنشى ءسابيدىڭ اناسى مەن اكەسىنە ارنايى بارعان تۇركىستان وبلىسىنىڭ اكىمى دارحان ساتىبالدى مەملەكەت باسشىسىنىڭ قۇتتىقتاۋىن تابىس ەتتى.
«قاسيەتتى تۇركىستان وڭىرىندە قازاق ەلىنىڭ 20 ميلليونىنشى تۇرعىنى تۋعانىنا وتە قۋانىشتىمىز. ءبىز باتىر انالارىمىزبەن ماقتانامىز. جىل سايىن رەسپۋبليكامىزدا دۇنيەگە كەلەتىن 400 مىڭنان استام بالانىڭ ءاربىر جەتىنشىسى تۇركىستان وبلىسىندا دۇنيەگە كەلەدى. بۇگىندە وبلىس حالقىنىڭ سانى 2 ميلليوننان استى. تۇركىستان ءوڭىرى ەلىمىزدە ادام كاپيتالىن كوبەيتۋگە ايرىقشا ۇلەس قوسىپ كەلەدى. بۇل – ەلىمىز ءۇشىن, ءبىز ءۇشىن ماقتانىش. سىزدەر بۇگىن تاريحقا ەنىپ وتىرسىزدار. گۇلميرا بەيسەنبايقىزى قارىنداسىمىزدى, ەرعالي اسقار ۇلى باۋىرىمىزدى شىن جۇرەكتەن قۇتتىقتايمىن. ءالىمحان باتىرىمىزدىڭ دەنساۋلىعى مىقتى, ءومىر جاسى ۇزاق بولسىن», دەدى وبلىس اكىمى. ءالىمحان اكەسى ەرعالي شاكەنوۆ پەن اناسى ىزتىلەۋوۆا گۇلميرانىڭ ءتورتىنشى بالاسى. سالماعى – 3400 گرامم, بويى – 51 سم.
تۇركىستان وبلىسى – قازاقستاننىڭ دەموگرافياسىنا وراسان ۇلەس قوسىپ كەلە جاتقان ايماق. بىلتىرعى جىلى بۇل وبلىستا 57 429 بالا ومىرگە كەلسە, بيىل جىل باسىنان بەرى 45 594 ءسابي جارىق دۇنيە ەسىگىن اشتى, ولاردىڭ ء بىرى – 20 ميلليونىنشى تۇرعىن ءالىمحان ەرعالي ۇلى. بىلتىر تۇركىستان وبلىسىندا 15 ۇشەم, 594, ال بيىل وسى ۋاقىتقا دەيىن 5 ۇشەم, 500 ەگىز بالا ومىرگە كەلگەن. وبلىستا 177 مىڭنان اسا تۇرعىن كوپبالالى انا ستاتۋسىنا يە. 15 مىڭنان جوعارى انانىڭ «التىن القاسى» بار. 43 مىڭنان استام انا «كۇمىس القا» يەگەرى. 14 قاراشا كۇنى تۇركىستان وبلىسىنداعى 22 پەرزەنتحانادا 139 بالا ومىرگە كەلگەن. بيىلعى جىلى ايماقتا 8 475 جۇپ نەكەگە تۇرعان.
