15 قاراشادا سولتۇستىك قازاقستان وبلىستىق پروكۋراتۋرانىڭ ءباسپاسوز قىزمەتى حابارلاعانداي, قاداعالاۋشى مەكەمە مۇگەدەكتىڭ قۇقىقتارىن ورەسكەل بۇزۋ فاكتىسىن تىركەدى. پروكۋرورلار 2021 جىلى پەتروپاۆل تۇرعىنىنا 279 780 تەڭگە نەسيە بەرىلگەنىن انىقتادى.
الايدا كۇردەلى پسيحيكالىق دەرتىنە بايلانىستى ءىى توپ مۇگەدەگى دەپ تانىلعان ەر ادام نەسيەنى ءوز ەركىمەن الماعان.
«انىقتالعان بۇزۋشىلىقتار نەگىزىندە قاداعالاۋ ورگانى اقىل-ويىنىڭ كەمىستىگىنە بايلانىستى ارەكەتكە قابىلەتسىز دەپ تانىلعان تۇلعامەن جاسالعان نەسيە شارتىن جارامسىز دەپ تانۋ تۋرالى تالاپ ارىزبەن سوتقا جۇگىندى. سوت شەشىمىمەن پروكۋروردىڭ تالاپتارى قاناعاتتاندىرىلدى, قارىز شارتى جارامسىز دەپ تانىلدى. ال ارەكەتكە قابىلەتسىز تۇلعانىڭ قۇقىقتارى قالپىنا كەلتىرىلدى», - دەپ اتاپ ءوتتى پروكۋراتۋرانىڭ ءباسپاسوز قىزمەتى.
الاياقتىق فاكتىسى بويىنشا سوتقا دەيىنگى تەرگەۋ باستالدى.
