سۋرەتتەردى تۇسىرگەن – ەرلان ومار, «EQ»
كورمەنىڭ اشىلۋ سالتاناتىندا كولىك ۆيتسە-ءمينيسترى ءساتجان ابلاليەۆ, «جارناما, دۇنيەجۇزىلىك جول قاۋىپسىزدىگى» قاۋىمداستىعىنىڭ تەحنيكالىق ديرەكتورى پاتريك ماليجا جانە «قازاقستاننىڭ اۆتوجولاۋشىلار زاڭدى تۇلعالار بىرلەستىگى» قاۋىمداستىعىنىڭ پرەزيدەنتى باعلان بايماعانبەتوۆ ءسوز سويلەپ, ءىس-شارانى ۇيىمداستىرۋدىڭ نەگىزگى ماقساتتارى تۋرالى ايتىپ بەردى.
كورمەدە قازاقستان, رەسەي, گەرمانيا, تۇركيا, اقش, قىتاي ەلدەرىنەن 100-دەن استام قاتىسۋشى جول قۇرىلىسى, سونىمەن قاتار قاۋىپسىزدىك جانە اۆتوموبيل جولدارىن تسيفرلاندىرۋ سالاسىنداعى زاماناۋي عىلىمي جانە تەحنيكالىق ازىرلەمەلەرىن كوپشىلىك نازارىنا ۇسىنادى.
«اۆتوجول جەلىسىن دامىتۋ جانە ودان ءارى جەتىلدىرۋ كۇن تارتىبىندەگى باسىم مىندەت بولىپ تابىلادى. بۇگىنگى تاڭدا ەلىمىزدىڭ جول شارۋاشىلىعى الدىندا نەگىزگى مىندەتتەر ايقىندالدى. اتاپ ايتقاندا, اۆتوجولداردىڭ پايدالانۋ جاي-كۇيىن قامتاماسىز ەتۋ جانە ولاردىڭ ساپاسىن ارتتىرۋ, زاماناۋي جول ينفراقۇرىلىمىن قۇرۋ, جولدارداعى قاۋىپسىزدىكتى جانە اۆتوموبيل قوزعالىسىن ءتيىمدى ءارى پارمەندى باسقارۋ, سونداي-اق ولاردى جازعى جانە قىسقى كۇتىپ-ۇستاۋدىڭ تالاپ ەتىلەتىن دەڭگەيىن قامتاماسىز ەتۋ كەرەك. بۇل مىندەتتەردى شەشۋ ۇزدىك الەمدىك تاجىريبەنى, ۇيىمداستىرۋشىلىق, باسقارۋشىلىق جانە تەحنيكالىق شەشىمدەردى تارتۋدى تالاپ ەتەدى», دەدى كولىك ءمينيسترىنىڭ ورىنباسارى.
رەسمي بولىمنەن كەيىن كولىك مينيسترلىگى مەن PIARC دۇنيەجۇزىلىك جول قاۋىمداستىعى باسشىلىعى ەكسپوزيتسيانى ارالادى. كورمە بارىسىندا قازاقستان جول عىلىمي-زەرتتەۋ ينستيتۋتىنىڭ ۇيىمداستىرۋىمەن «يننوۆاتسيالار مەن ينفراقۇرىلىمنىڭ قيىلىسى: جول سالاسىن دامىتۋ فورمۋلاسى» تاقىرىبىندا حالىقارالىق عىلىمي-پراكتيكالىق كونفەرەنتسيا ءوتتى. وندا اۆتوموبيل جولدارىنىڭ يننوۆاتسيالارى, ساپاسى, قاۋىپسىزدىگى جانە دامۋىنا قاتىستى وزەكتى ماسەلەلەر قارالدى. كونفەرەنتسيا جۇمىسىنا ءىىم, PIARC دۇنيەجۇزىلىك جول قاۋىمداستىعى, وقۋ ورىندارى, قازاقستان, قحر, موڭعوليا جانە بەلارۋس, اقش, رف جانە باسقا دا ەلدەردىڭ عىلىمي-زەرتتەۋ جانە جول ۇيىمدارىنىڭ وكىلدەرى قاتىستى.
ايتا كەتەرلىگى, قازجولعزي كوپىرلەر مەن جول ينفراقۇرىلىمىن باسقارۋدىڭ تسيفرلىق جۇيەلەرى, جول ماتەريالدارىنىڭ ساپاسىن باقىلاۋ جۇيەلەرى سياقتى IT-يننوۆاتسيالاردى ازىرلەۋگە جانە ەنگىزۋگە بەلسەندى قاتىسىپ كەلەدى. سونىمەن قاتار ينستيتۋتقا اۆتوجول سالاسىنىڭ نورماتيۆتىك-قۇقىقتىق اكتىلەرىنىڭ «Infozhol» ەلەكتروندىق بازاسىن وزەكتەندىرۋ بويىنشا جاۋاپكەرشىلىك جۇكتەلىپ وتىر. بازادا 1,2 مىڭنان استام قۇجات بار.
سونداي-اق كورمەگە اۆتوجولداردىڭ ساپاسىن جاقسارتۋ ءۇشىن تسيفرلىق تەحنولوگيالاردى ەنگىزۋمەن اينالىسىپ جاتقان كولىك مينيسترلىگىنە قاراستى جول اكتيۆتەرى ساپاسىنىڭ ۇلتتىق ورتالىعى جانە جولداردى سالۋ, رەكونسترۋكتسيالاۋ, جوندەۋ, سونىمەن بىرگە جول بويىنداعى سەرۆيس وبەكتىلەرىن دامىتۋعا جاۋاپتى «قازاۆتوجول» ۇلتتىق كومپانياسى قاتىسىپ جاتىر.
