ول سىبايلاس جەمقورلىق تۋرالى ءفيلمنىڭ ءبىرىنشى, ەكىنشى بولىمدەرىن كورەرمەن جىلى قابىلداعانىن اتاپ ءوتتى. “جۇلدىزدى شاڭىراق” باعدارلاماسىنا بەرگەن سۇحباتىندا ءارتىس وسى ءفيلمنىڭ ءۇشىنشى بولىمىنە دايىندالىپ جاتقانىن جەتكىزدى.
ء“ۇشىنشى ءبولىمىن تۇسىرگەننەن كەيىن جەمقورلىق تاقىرىبىن قوزعامايمىز. ءارى بۇل بولىمدە كومەديا ەلەمەنتتەرى كوپ بولمايدى. نەگىزىنەن ستاتيستيكاعا ءمان بەرەمىز. ودان كەيىن كينو جەلىسى جەمقورلىقتىڭ كەسىرىنەن بولعان وقيعالارمەن ءوربيدى. بۇل كينو دا شەتەلدە تۇسىرىلەدى. قاڭتار ايىندا جوبامىزدى ءبىر پىسىقتاپ, شەتەلگە جول جۇرەمىز”, دەپ جوسپارىن ايتتى.
اكتەردىڭ ايتۋىنشا, ءفيلمنىڭ ەكىنشى ماۋسىمى كوڭىلدەن شىققان. ءتىپتى كورەرمەن قىزىعۋشىلىعى ەرەكشە بولعانى سونداي, ءار وڭىردەن بيلەت سۇراپ حابارلاسقانداردا ەسەپ بولمادى.
“ادەتتەگىدەي كومەديا جانرىنداعى ءفيلمنىڭ ءبىرى بولادى دەپ ويلادىق. الايدا بۇل تۋىندى ءبىز ويلاعاننان دا كەرەمەت تابىستى بولدى. ءبىر اپتادا 1 ميلليون اقش دوللارىن جينادى. كينوتەاتردا 58 كۇن ۇزبەي كورسەتىلدى. وسىعان دەيىن قانشاما كينو كورسەتىلىپ جاتسا دا, 58 كۇن بويى انشلاگ بۇرىن-سوڭدى بولماپتى. وتاندىق كينويندۋستريادا ميللياردەر بولعان نۇرلان قويانباەۆتان كەيىن ءبىز ەكىنشى ورىنعا جايعاستىق. جالپى, ءبىزدىڭ ستسەناريست پەن رەجيسسەر حالىق كوڭىلىنەن شىعاتىن كەرەمەت تۋىندى جاساعانىن ايتا كەتكەن ءجون”, دەيدى اكتەر.
اكتەر العاشقى پروديۋسەرلىك دەبيۋتىندە ءتىپتى ويىنا كىرىپ-شىقپاعان قوماقتى قاراجات جينالعانىنا ءالى كۇنگە دەيىن تاڭدانادى ەكەن.
“كورسەتىلىم بىتكەننەن كەيىن كاسسانى ساناعاندا 1 ميلليارد 81 ميلليون تەڭگە ءتۇسىپتى. كينو ءتۇسىرۋ ءۇشىن ينۆەستور تاۋىپ, سودان اقشا العان ەدىك, ەڭ ءبىرىنشى سونى قايتاردىق. جارناما مەن كينوتەاتردىڭ اكىمشىلىگىمەن ەسەپتەستىك. قانات ءالجاپپاروۆ ەكەۋمىز بولعاسىن قولىمىزداعى 30 ميلليوندى تەڭدەي ەتىپ ءبولىپ الدىق. توعىز اي بويى توككەن تەردىڭ اقىسى وسىلاي اقتالدى. قازىر حالىقتىڭ تالعامى وزگەرىپ كەتتى. ىشكى نيەتىڭ اقشا جاساۋ بولىپ, ارزانقول دۇنيە ۇسىنساڭ كورەرمەنگە وتپەي قالۋى مۇمكىن. حالىق تالعامىنىڭ وسكەنىن بايقادىم”, دەپ اعىنان جارىلدى اكتەر.
