شىمكەنت قالاسى پد-ءنىڭ قىزمەتكەرلەرى جەلىدە ءجيى كەزدەسەتىن تاعى ءبىر الداۋ ءتۇرى تۋرالى ءتۇسىندىردى.
ءتارتىپ ساقشىلارىنىڭ ايتۋىنشا, الاياقتار تانىمال ينتەرنەت-پلاتفورمالاردا قولدانىلعان تۇرمىستىق تەحنيكا نەمەسە جيھاز ساتۋ تۋرالى جارنامالاردى ورنالاستىرادى. مىسالى, ولار «ولح» سايتىندا تاۋاردى ارزان باعادا كورسەتىپ, ساتىپ الۋشىنى الدىن الا تولەم جاساۋعا كوندىرەدى. قۇربانىنىڭ سەنىمىنە كىرۋ ءۇشىن الاياقتار ۆولوحوۆ, حوحلوۆ, گروموۆ تەكتى ازاماتتاردىڭ جەكە كۋالىگىن نەمەسە اسكەري قىزمەتتىك بيلەتىن جولدايدى. سونىمەن قاتار, كليەنتتىڭ ءوتىنىشى بويىنشا ولار ساتىلىمداعى زاتتىڭ قوسىمشا فوتوسۋرەتتەرى مەن بەينەجازبالارىن (جاريالانىمدا كورسەتىلگەن) ۇسىنا الادى.
– بۇل سحەمانى قازىرگى ۋاقىتتا قىلمىسكەرلەر كەڭىنەن قولدانادى, – دەپ اتاپ ءوتتى پوليتسەيلەر.
وسىعان بايلانىستى پوليتسيا دەپارتامەنتى ەسكەرتەدى: جارنامالىق سايتتاردى پايدالانساڭىز, ارقاشان زاتتى العاننان كەيىن عانا تولەم جاساڭىز; ەگەر ساتۋشى سىزگە جەكە قۇجاتتارىن جىبەرسە, ودان بەينەقوڭىراۋ ارقىلى بايلانىسۋىن سۇراڭىز; تاۋاردىڭ قولجەتىمدى ەكەنىنە كوز جەتكىزىڭىز; ەشقاشان بەيتانىس ادامدارعا جەكە دەرەكتەرىڭىزدى, بانك كارتاسىنىڭ نومىرلەرىن جانە كودتاردى جىبەرمەڭىز.
