Lada.kz پورتالىنىڭ جازۋىنشا, جانبولاتتىڭ ەكى جاستاعى قىزى ءماريام مەن 10 ايلىق ۇلى بەرەكەت قاندالانىڭ دارىسىنە ۋلانىپ, كوز جۇمدى. بۇلدىرشىندەردىڭ اكەسى ەسكەرتۋسىز زيانكەستەردى ۋلاپ, كەتىپ قالعان كورشىسىنىڭ جازالانباي, بوستاندىقتا جۇرگەنىنە نارازى.
“ساراپتاما اقتاۋدا جاسالمايتىندىقتان پوليتسيا قىزمەتكەرلەرى ونىڭ قورىتىندىسىز ەشقانداي شارا قولدانا الماي وتىر. پوليتسيا پاتەردى دارىلەگەن پرەپاراتتىڭ قۇرامىن انىقتاي المايدى. مەن ادىلدىكتى تالاپ ەتەمىن. ەكى بالانى جەر قوينىنا تاپسىردىق, وڭاي دەيسىزدەر مە؟ ول ايەل كامەلەت جاسقا تولماعان بالاسى بار دەگەن جەلەۋمەن ءالى بوستاندىقتا ءجۇر”, – دەيدى جانبولات كەلمەدەنوۆ.
قايعىلى جاعداي تۋرالى ايتۋ قيىن بولسا دا, جانبولات كوپكە ساباق بولسىن دەگەن ويمەن بولعان وقيعانىڭ ءمان-جايىن بايانداپ بەردى.
“كەشە بالالار قۇستى. ءبىز ۇشىنىپ قالدى ەكەن دەپ ويلاپ, جەدەل جاردەم شاقىرتتىق. “سمەكتا” بەرۋ كەرەك دەگەن سوڭ دارىحاناعا بارىپ, ءدارى الىپ كەلدىم. تۇندە جاعدايلارى جاقسارىپ, دۇرىستالعانداي بولدى. تاڭعا جاقىن مەن دە قۇستىم. ابدەن السىرەپ, قول-اياعىمىزدان ءال كەتىپ, تۇرا الماي قالدىق. ايەلىم بەرەكەتتىك كوگەرىپ كەتكەنىن ايتتى. ساسقانىمنان بالانى الىپ پاتەردەن شىعىپ كەتتىم. كەيىن مۇنداي بەلگىلەر ءماريامنان دا بايقالا باستادى. جەدەل جاردەمگە حابارلاسا الماعان سوڭ, پوليتسيا شاقىردىم. پوليتسياعا ايتار ارىز-شاعىمىم جوق. ولار ءوز جۇمىسىن قولدان كەلگەنشە اتقاردى. بالالاردى سىرتقا شىعارىپ كومەكتەستى, جەدەل جاردەم مەن گاز قىزمەتىن شاقىردى. كەيىن ولار پاتەردەن گازدىڭ ءيىسى شىعاتىنىن ايتتى. ءبىز ونى سەزبەگەنبىز”, – دەيدى بالالاردىڭ اكەسى.
جانبولاتتىڭ ايتۋىنشا, مۇنداي قايعىلى جاعداي بۇعان دەيىن دە بولعان كورىنەدى. كورشىلەردىڭ سالعىرتتىعىنان بىرنەشە وتباسى بالالارىنان ايىرىلعان ەكەن. ول قۇزىرلى ورگانداردان قۇرامىندا ادام ومىرىنە قاۋىپتى زاتتارى بار دارىلەردى ساتۋعا تىيىم سالۋدى تالاپ ەتەدى.
جانبولاتتىڭ ايتۋىنشا, ەگەر كورشىسى زيانكەستەردى دارىلەيتىنىن ەسكەرتكەندە مۇنداي جاعداي بولمايتىن ەدى دەيدى.
“كورشىمىز دە, مەنىڭ ايەلىم دە ءۇي تۇرعىندارىنىڭ چاتىندا بار. بىراق پاتەرىن دارىلەيتىنى تۋرالى بىزگە ەسكەرتپەدى. پاتەر يەلەرىنىڭ كووپەراتيۆى دە بۇل تۋرالى بىلمەگەن. پاتەرىن دارىلەيتىنىن بىلگەندە ءبىز ءۇيدى بوساتا تۇراتىن ەدىك, بالالارىمىز جانىمىزدا بولاتىن ەدى. ول ەڭ اۋىر جازاعا لايىق دەپ ەسەپتەيمىن”, – دەيدى جانبولات كەلمەدەنوۆ.
