سۋرەتتى تۇسىرگەن – ەرلان ومار, «EQ»
تولىباي سىنشى جولاۋشىلاپ كەلە جاتىپ, اناداي جەردە جاتقان اتتىڭ قۋ باسىن كوزى شالادى. تىزگىندى تارتىپ تۇرا قالىپ: «مىناۋ ەرەن جۇيرىكتىڭ باسى ەكەن, يمەك تۇمسىق, بوكەن تاناۋ, كوزىنىڭ ويىندىسى تەرەڭ, جار قاباق, ەكى جاقتىڭ ورتاسى الشاق, تىستەرى ءالى جالتىراپ تۇر, سۇيەگى قانداي اسىل ەدى جانۋاردىڭ. مىنا تۇمسىعىنا قاراعاندا شوقتىعى بيىك, اياعى ۇزىن, قويان تىرسەك, سەرپىنى قاتتى, ءسىڭىرلى ەكەن. قۇمداۋىت, بوساڭ, كوبەلەڭ جەردە بايگە بەرمەيتىن جىلقى. جاسى توعىزدان اسىپ, ونعا قاراعان دەر شاعىندا ولگەن ەكەن, جانۋار. اتتىڭ ولگەنىنە ءۇش جىل بولىپتى», دەپتى.
قاسىنداعىلار شىن جۇيرىكتىڭ سىنى قالاي؟ – دەگەندە: – شىراقتاي جانعان توماعا كوزى بولادى, ەتەكتەي ەرىنى بولادى, قاس الباستى قاباقتى كەلەدى, وت ورنىنداي تۇياقتى كەلەدى. ال شىقشىتى ورالىپ جاتقان تۇبەكتەي بولادى, قۇلاعى كولگە بىتكەن قۇراقتاي بولادى, جالى كۇلتەلەنگەن جىبەكتەي بولادى. قۇيرىعى قىناپتان شىققان قانجارداي, جاۋىرىنى سىپىرا شاپقان تاقتايداي, ومىرتقاسى وتاۋداي بولادى. مىقىنى تار, ساۋىرى زەنتەكتى قارا كومىردەي, جامباسى ۇستا سوققان ساندالداي بولادى. كەبەجە قارىن, كەڭ قۇرساق, سۇبەلىك جەرى تاستان سوققان قورعانداي, ءتوسى تاستان قۇلاعان بۇلاقتاي, باقايى قىسقا, مويىنى قۇلجا مويىن, باۋىزداۋ جەرى پىسكەن الما ساعاقتى كەلەدى, دەپتى.
جاس تۇلپاردىڭ سىنىن تولتىرىپ, سيپاتىن جەتىلدىرۋ ءۇشىن, الدىمەن ونىڭ سۇيەگىن اعارتادى, بەل قىزىعىنا قاندىرادى, كوڭىلىن كوتەرەدى. ول ءۇشىن جاس بايتالداردى تاڭداپ الىپ ۇيىرگە سالادى.
جىل وتكەن سوڭ ۇيىردەگى ءبىر بايتالدى سويىپ جىلىگىنىڭ كەمىگىن كورەدى. ەگەر جىلىك ءىشى قاراكەمىك بولسا, تۇلپاردىڭ سىنى ءالى تولعان جوق دەپ كورەدى دە, ۇيىردەن المايدى.
كەلەر جىلى تاعى ءبىر بايتالدى سويىپ, جىلىگىن بايقايدى. وسىلاي سويىلعان بايتالداردىڭ جىلىگى اعارعانعا دەيىن تۇلپاردى ۇيىردەن المايدى. ال سويىلعان بايتالدىڭ جىلىك كەمىگى ابدەن اعارعان كەزدە تۇلپاردىڭ سىنى تولدى, كۇشى جەتىلدى, كۇيىنە كەلدى دەپ كورەدى. ودان كەيىن ونى باپتاپ بايگەگە قوسسا, الدىنا قارا سالمايتىن سايگ ۇلىك بولادى.
