جيىندا دەنساۋلىق ساقتاۋ مينيسترلىگىنىڭ مەديتسينالىق كومەكتى ۇيىمداستىرۋ دەپارتامەنتىنە قاراستى باسقارمانىڭ باسشىسى گۇلنار ماقسۇتوۆا مينيسترلىكتەن كورسەتىلىپ جاتقان قولداۋلار جايىندا ايتتى.
– جىل سايىن 14 قاراشادا قانت ديابەتىمەن كۇرەس كۇنى اتالىپ وتەدى. وسى كۇندە قانت ديابەتىن ەمدەۋدىڭ ادىستەرى مەن الدىن الۋ شارالارى تۋرالى ۇسىنىس-پىكىرلەر ايتىلادى. قانت ديابەتى – ەلدە الەۋمەتتىك ماڭىزى بار اۋرۋلاردىڭ قاتارىندا. سوندىقتان پاتسيەنتتەر مىندەتتى الەۋمەتتىك مەديتسينالىق ساقتاندىرۋ شەڭبەرىندە تەگىن ەمدەلە الادى. ەلىمىزدەگى كلينيكالىق حاتتامالار قانت ديابەتىن زەرتتەۋ بويىنشا جەتەكشى كاسىبي عىلىمي قاۋىمداستىقتاردىڭ ستاندارتتارىنا سايكەس كەلەدى. سونىمەن قاتار ۇنەمى قايتا قارالىپ, جاڭارادى. مەملەكەت قانت ديابەتىمەن ءومىر سۇرەتىن ادامدارعا قولداۋ كورسەتەدى جانە پاتسيەنتتەردى بارىنشا دارىلىك زاتتارمەن, قاجەتتى ەممەن تەگىن قامتاماسىز ەتەدى. تەگىن ەمدەلەتىن پاتسيەنتتەرگە سەنىمدى دالەلدى بازاسى بار پرەپاراتتاردىڭ بارلىعى دەرلىك قولجەتىمدى, سونداي-اق ولار جالپى ساقتاندىرۋ اياسىندا دياگنوستيكالىق سكرينينگتەن وتەدى, – دەيدى گ.ماقسۇتوۆا.
كۇندەلىكتى تىرشىلىكتىڭ قامىمەن جۇرگەن تۇرعىنداردىڭ ەداۋىر بولىگى ءوزىنىڭ قانت ديابەتىمەن اۋىراتىنىن بىردەن بىلە بەرمەيدى ەكەن. IDF دەرەكتەرى بويىنشا 2021 جىلى ەلدە 808 مىڭ ادام قانت ديابەتىمەن الىسىپ ءومىر سۇرگەن. ونىڭ ىشىندە 320 مىڭعا جۋىق وتاندىق دياگنوز قويىلماعان قانت ديابەتىنە شالدىعىپتى. كونفەرەنتسيا بارىسىندا دەنساۋلىق ساقتاۋ مينيسترلىگىنىڭ شتاتتان تىس بالالار ەندوكرينولوگى گۇلميرا ءابدۋاحاسوۆا ديابەتتىڭ تارالۋىنىڭ نەگىزگى سەبەپتەرى جايىندا ايتىپ بەردى. سەبەبى قانت ديابەتىمەن اۋىرعان ناۋقاستار جىلدان-جىلعا كوبەيىپ, بالالاردان دا ءجيى انىقتالاتىن بولعان. دەنساۋلىق ساقتاۋ مينيسترلىگىنىڭ دەرەگى بويىنشا بىلتىر ەلىمىزدە 5 447 بالا اۋرۋدىڭ وسى ءتۇرى بويىنشا ەسەپتە تۇرعان.
ديابەتتىك اتا-انالار كوميتەتىنىڭ پرەزيدەنتى رۋسلان زاكيەۆ كوميتەتتىڭ اتقارىپ جاتقان جۇمىسى تۋرالى اڭگىمەلەدى. نەگىزى كوميتەت پاتسيەنتتەرگە كۇتىم كورسەتۋ ساپاسىن, ولاردىڭ ءومىر ءسۇرۋ ساپاسىن جاقسارتۋ ماقساتىندا قانت ديابەتىمەن اۋىراتىن ناۋقاستاردى اقپاراتتاندىرۋمەن, قورعاۋمەن اينالىسادى. وسىدان سوڭ «نوۆو نورديسك كازاحستان» جشس باس ديرەكتورى رانا ازفار زافار قانت ديابەتىمەن كۇرەستە كومپانيانىڭ قولعا العان مىندەتتەرى جونىندە باياندادى.
– كومپانيا قانت ديابەتىمەن كۇرەستە ۇزدىكسىز مەديتسينالىق ءبىلىم بەرۋ بويىنشا جوبالاردى ىسكە اسىرادى. عىلىمي زەرتتەۋگە كوڭىل بولەدى. قانت ديابەتىمەن ءومىر سۇرەتىن ادامدار ءۇشىن تەراپيانىڭ يننوۆاتسيالىق ادىستەرىن پايدالانا وتىرىپ شەشىمدەر ۇسىنادى. سونىمەن قاتار ەرەسەكتەر مەن بالالارعا ارنالعان قانت ديابەتى تۋرالى اقپاراتتىق ماتەريالداردىڭ باسىن قۇرۋعا باستاماشى بولىپ كەلەدى. كومپانيا بيىل جانە كەلەر جىلى حالىقتى قانت ديابەتى جونىندە اقپاراتتاندىرۋ بويىنشا جۇمىستى جالعاستىرادى, – دەدى كومپانيا باسشىسى.
كونفەرەنتسيا سوڭىندا تاراپتار قانت ديابەتىنە شالدىققان پاتسيەنتتەردى ەمدەۋدە ۇزدىك ناتيجەگە قول جەتكىزۋ ءۇشىن كۇش بىرىكتىرۋدىڭ ماڭىزىن اتاپ ءوتتى.
