سۋرەتتى تۇسىرگەن – ەرلان ومار, «EQ»
جۋىردا استانادا «مەدبيكە ءىسىنىڭ ۇشتۇعىرلىعى: كلينيكالىق تاجىريبە, زەرتتەۋ جانە ءبىلىم بەرۋ» تاقىرىبىندا حالىقارالىق عىلىمي-پراكتيكالىق كونفەرەنتسيا ءوتىپ, وندا الەمدىك تاجىريبەدەگى بىرەگەي يننوۆاتسيانى دامىتۋدىڭ جەتىستىكتەرى مەن كەلەشەگى قارالدى. بۇل جونىندە استانا مەديتسينا ۋنيۆەرسيتەتىنىڭ رەكتورى كامالجان نادىروۆ تارقاتىپ ايتتى.
– قازاقستاندا مەدبيكەلىك ءبىلىم بەرۋدى جەتىلدىرۋگە باعىتتالعان AccelEd جوباسىنا ليتۆا دەنساۋلىق عىلىمدارى ۋنيۆەرسيتەتىنەن, JAMK قولدانبالى عىلىمدار ۋنيۆەرسيتەتى جانە فينليانديانىڭ ابو اكادەميا ۋنيۆەرسيتەتى, نيدەرلاندىنىڭ ۋترەحت ۋنيۆەرسيتەتى, نازارباەۆ ۋنيۆەرسيتەتىنىڭ مەديتسينا مەكتەبىنەن, استانا مەديتسينالىق ۋنيۆەرسيتەتىنەن, قازاق ۇلتتىق مەديتسينا ۋنيۆەرسيتەتىنەن, قاراعاندى مەديتسينا ۋنيۆەرسيتەتىنەن, وڭتۇستىك قازاقستان مەديتسينا اكادەمياسىنان اكادەميالىق سەرىكتەستەرىمىز قاتىسادى. مەدبيكە ءىسىنىڭ دامۋ تەندەنتسيالارى قازىرگى دەنساۋلىق ساقتاۋ جۇيەسىندە مەكبيكەنىڭ ءرولى ايتارلىقتاي جوعارىلاعانىن كورسەتەدى. مەدبيكە ماماندارىنىڭ جۇمىسىنا عىلىمي كوزقاراس پەن دالەلدى تاجىريبەنى ەنگىزۋ – مەدبيكەنى تاۋەلسىز مەدبيكەلىك شەشىم قابىلدايتىن, دالەلدى مەدبيكەلىك كۇتىمدى جوسپارلايتىن جانە جۇزەگە اسىراتىن دارىگەردىڭ تەڭ قۇقىلى سەرىكتەسىنە اينالدىردى, – دەيدى ق.نادىروۆ.
AccelEd جوباسى ماگيستراتۋرا دەڭگەيىندە مەدبيكە ءىسى بويىنشا ءبىلىم بەرۋدى نىعايتۋعا جانە ەلدە مەدبيكە عىلىمى بويىنشا PhD دوكتورانتۋرا باعدارلاماسىن قۇرۋعا باعىتتالعان. بۇل ءبىلىم بەرۋ باعدارلامالارىنىڭ تۇلەكتەرى دەنساۋلىق ساقتاۋ سالاسىندا ەرەكشە سۇرانىسقا يە. مىسالى, استانا مەديتسينا ۋنيۆەرسيتەتى ماگيستراتۋرا باعدارلامالارىن ەنگىزگەن تۇستان باستاپ مەدبيكە ءىسى بويىنشا 32 ماگيستر دايىنداعان. قازىر «مەدبيكە ءىسى عىلىمى» باعدارلاماسى بويىنشا 5 دوكتورانت ءبىلىم الىپ جاتىر ەكەن. ال كەلەر جىلى بارشامىز مەدبيكە عىلىمى بويىنشا ءبىلىم العان ەلدەگى العاشقى دوكتورلاردىڭ قۋانىشىنا كۋا بولامىز. ءيا, جىل وتكەن سايىن مەدبيكەلەردىڭ قۇزىرەتتىلىگى ارتىپ كەلەدى. ولارعا ءبىلىم بەرۋ قولجەتىمدى ءارى ساپالى بولا باستادى. بۇل جوبا ماگيستراتۋرا جانە دوكتورانتۋرا دەڭگەيىندە مەدبيكەلىك ءبىلىم بەرۋ ءىسىن نىعايتۋعا, مەدبيكە عىلىمىنىڭ وركەندەۋىنە تىڭ سەرپىن بەرەدى.
