بايقاۋ شارتى بويىنشا ۇزدىك وقىرمان وقۋشىلارعا سپورتتىق ۆەلوسيپەد, پلانشەت جانە تاعى باسقا باعالى سىيلىقتار بەرىلەدى. جوباعا جەكە كاسىپكەرلەر دەمەۋشىلىك جاساۋدا. مەكتەپ ديرەكتورى ۋبايدۋللا ەراليەۆتىڭ ايتۋىنشا, يگى جوباعا جاستار اراسىندا قىزىعۋشىلىق ارتىپ كەلەدى ەكەن. «مەكتەبىمىزدە مۇنداي اكتسيا العاش رەت ۇيىمداستىرىلىپ وتىر. كىتاپ وقۋعا, ءبىلىمىن, دۇنيەتانىمىن كەڭەيتۋگە قۇشتار بالا ۆەلوسيپەدتى باستى ماقسات ەتپەۋى دە مۇمكىن. دەگەنمەن ۆەلوسيپەدتى كورىپ كىتاپ وقۋعا دەگەن قىزىعۋشىلىعى ارتا تۇسەتىن بالالاردىڭ قاتارى كوبەيەدى دەگەن ويدامىز», دەيدى مەكتەپ ديرەكتورى. مۇنداي اكتسيا بۇعان دەيىن اۋدانداعى تاعى ءبىر مەكتەپتە ۇيىمداستىرىلعان ەكەن. ناتيجەسىندە, جاستاردى كىتاپ وقۋعا باۋلۋدا وسىنداي جوبالاردىڭ الار ورنى ەرەكشە ەكەنى اڭعارىلعان.
سونداي-اق كىتاپحاناشىلار ەل تاريحىن بىلۋگە, دانا ابايدىڭ شىعارمالارىن وقۋعا قىزىعاتىندار كوپ ەكەنىن ايتادى. بۇل ورايدا كونە كىتاپتاردىڭ الار ورنى ەرەكشە. مىسالى, №25 س.سەيفۋللين اتىنداعى جالپى ورتا ءبىلىم بەرەتىن مەكتەپ كىتاپحاناسىندا 1957 جىلى الماتى قالاسىنداعى قازاقتىڭ مەملەكەتتىك كوركەم ادەبيەت باسپاسىنان باسىپ شىعارىلعان اباي قۇنانباي ۇلىنىڭ ەكى تومدىق شىعارمالار جيناعى ساقتالعان. بۇل – مەكتەپ كىتاپحاناسىنداعى كونە ءارى قۇندى كىتاپتاردىڭ ءبىرى. مەكتەپ كىتاپحاناشىسى گۇلميرا تۇرىسبەكوۆانىڭ ايتۋىنشا, كىتاپ 66 جىلدان بەرى ساقتاۋلى. «مەكتەبىمىزدىڭ كىتاپحاناسىندا جالپى 15 351 كىتاپ بار. سونىڭ ىشىندە ەڭ كونە كىتاپ – 1957 جىلى باسىلىپ شىققان اباي قۇنانباي ۇلىنىڭ شىعارمالار جيناعى سۇرانىسقا يە بولىپ تۇر. مۇنداي جادىگەرلەردى ءبىز كوزدىڭ قاراشىعىنداي ساقتايمىز», دەيدى گۇلميرا تۇرىسبەكوۆا. مەكتەپ كىتاپحاناسىندا وقۋشىلاردىڭ كىتاپ وقۋىنا بارلىق جاعداي جاسالعان.
تۇركىستان وبلىسى
