كەزەكتى فورۋمدا تالقىعا تۇسكەن باستى ماسەلە – ازىق-ت ۇلىك قاۋىپسىزدىگى مەن اۋىل شارۋاشىلىعىن تسيفرلىق جۇيەگە كوشىرۋ بولدى.
بۇل فورۋمعا كەلۋدەگى ەڭ باستى ماقساتىمىز – تاجىريبە الماسۋ. ماڭعىستاۋ وبلىسىندا «حالال» سەرتيفيكاتىنا يە جالعىز ەت كومبيناتى رەتىندە, ءبىز قازىر الەمنىڭ ەڭ وزىق تاجىريبەلەرىن جيناقتاۋدى كوزدەپ وتىرمىز. سوندىقتان قازاقستان مەن رەسەي اراسىنداعى ىنتىماقتاستىق نەگىزىندە وتەتىن وسىنداي فورۋمدار ەكى جاققا دا پايدالى بولماق. ءبىز كومبيناتىمىزدا مالدى بارلىق سانيتارلىق تالاپتارعا ساي ءوزىمىز سويىپ, جىلىكتەيمىز ءارى ونى فيرمالىق دۇكەندەرگە ساتىلىمعا شىعارامىز. وسى ۇدەرىستەردى ءارى قاراي اۆتوماتتاندىرۋ, قىزمەتكەرلەردى باسقارۋ ىسىندە رەسەيلىك ارىپتەستەرىمىزدىڭ جەتىستىكتەرى مەن تەحنولوگيالارىن مەڭگەرىپ, ونى ءوز وندىرىسىمىزدە قولدانساق كەرەمەت بولار ەدى. ەت ءوندىرىسى سالاسىنا كەلگەنىمىزگە سالىستىرمالى تۇردە كوپ ۋاقىت بولماعانىمەن, وسى كەزەڭگە دەيىن وڭىرىمىزدە ەكى فيرمالىق دۇكەن اشىپ, 12 مىڭنان اسا ادامدى قىزمەتپەن قامتاماسىز ەتىپ وتىرمىز. كومبيناتىمىز زاماناۋي زەرتحانامەن جابدىقتالعان. ەت ءوندىرۋ مەن حالىققا قىزمەت كورسەتۋدە 150-دەي زاڭ نورمالارى مەن تالاپتاردى ساقتاي وتىرىپ, جۇمىسىمىز ۇزدىكسىز جۇزەگە اسىرىلىپ جاتىر. ماڭعىستاۋ وبلىسى – مال شارۋاشىلىعى, ونىڭ ىشىندە ءىرى قارا وسىرۋگە بەيىمدەلمەگەن ءوڭىر. ءبىز حالىقتى دۇرىس, تازا ونىممەن قامتۋ ءۇشىن ىرگەلەس وبلىستاردىڭ بورداقىلاۋ الاڭدارىمەن جانە شارۋاشىلىقتارىمەن ءوزارا كەلىسىم بويىنشا جۇمىستى جالعاستىرىپ جاتىرمىز. ءبىزدىڭ كومبيناتقا مال وتكىزىپ, سول ارقىلى مەملەكەتتەن سۋبسيديا الۋعا بولادى. بىرنەشە اي بۇرىن رەەسترگە ەندىك. بۇل – ءبىزدىڭ شارۋالارعا جاسالعان تاپتىرماس مۇمكىندىك.
ماڭعىستاۋ وبلىسىنداعى ءىرى ينۆەستيتسيالىق جوبا رەتىندە كەلەشەكتە تولىق تسيكلدى ەت وندىرىسىنە كوشۋ ستراتەگيالىق جوسپارىمىزدا بار. مالدى بورداقىلاۋ الاڭداردى كەڭەيتىپ, ءىرى قارا مەن ۇساق مال باسىن كوبەيتە وتىرىپ, اتالعان كومبيناتتا جىلىكتەپ, ءارى قاراي تۇتىنۋشىلارعا جەتكىزەمىز. وسى جوسپارعا ساي, بۇگىندە بورداقىلاۋ الاڭىنىڭ العاشقى جۇمىستارى ىسكە قوسىلىپ, جەر كولەمى مەن وزگە دە ەكونوميكالىق جاعىن ماماندار ەسەبىن جۇرگىزۋدە. ونىڭ ۇستىنە «Korkem Alem» كومپانياسى – وبلىستاعى ەتتى ەكسپورتتاۋعا مۇمكىندىگى بار جالعىز ءوندىرىس ورنى. الداعى ۋاقىتتا تولىق تسيكلدى ەت كومبيناتىنا اينالىپ, ونىمدەردى الىس-جاقىن شەتەلدىك نارىققا شىعارۋ جوسپاردا بار. بيىلعى جىلدىڭ كوكتەمىندە يراندىق ارىپتەستەرمەن كەلىسسوزدەر جۇرگىزىلگەن بولاتىن. قازىرگى تاڭدا ەكىنشى تاراپتىڭ شەشىمىن كۇتۋدەمىز. كەزدەسۋ بارىسىندا يراندىقتاردىڭ قوي مەن سيىر ەتىنە دەگەن سۇرانىسى جوعارى ەكەندىگىنەن حاباردار بولدىق.
بۇگىنگى فورۋمدا مەملەكەت باسشىسى: «وزىق تا حالىقارالىق ستاندارتقا, ونىڭ ىشىندە «حالال» ستاندارتىنا ساي باسەكەگە قابىلەتتى, ەكولوگيالىق تۇرعىدان تازا جانە ەكسپورتقا باعدارلانعان ءونىم شىعارۋعا باسا ءمان بەرىلەدى», دەپ اتاپ وتكەن بولاتىن. مەنىڭشە, بۇل ءدال ءبىزدىڭ جوباعا ارنالعانداي كورىندى. سەبەبى ءبىز ءوز وندىرىسىمىزگە باسقارۋ مەن قىزمەت كورسەتۋدە ەڭ تانىمال ستاندارتتاردى جاساۋعا جانە ونى قولدانۋعا تىرىسىپ جاتىرمىز. قازاقستان مۇسىلماندارى ءدىني باسقارماسىنان بەرىلگەن «حالال» سەرتيفيكاتىمىز دا بار, ەكسپورتتىق مۇمكىندىگىمىز دە جوعارى. سوندىقتان اتالعان سەنىمنىڭ ۇدەسىنەن شىعۋعا بار مۇمكىندىكتى سالامىز.
قازاقستان مەن رەسەي اراسىنداعى ىنتىماقتاستىق جونىندە ايتاتىن بولسام, ەت كومبيناتىن كەڭەيتۋ جانە ىسكە قوسۋ بارىسىندا وزىمىزگە قاجەتتى ءبىرشاما قۇرىلعىلاردى رەسەيدەن ساتىپ الدىق. ويتكەنى لوگيستيكا تۇرعىسىنان باسقا ەلدەرگە قاراعاندا ەڭ قولايلىسى رەسەي بولدى. ونىڭ ۇستىنە ەكى ەل اراسىنداعى شەكارا قىزمەتىنىڭ جۇيەلى جۇمىستارىنىڭ ارقاسىندا وزىمىزگە ءتيىستى قۇرال-جابدىقتاردى دەر كەزىندە الا الدىق.
جالپى, وسى كۇنى ەت وندىرىسىندە رەسەيلىك شيكىزاتقا مۇقتاج ەمەسپىز. ءوزىمىزدىڭ شارۋالاردىڭ بورداقىلاۋ الاڭدارى كەرەكتى مال سانىمەن تولىق قامتاماسىز ەتىپ وتىر.
تەمىر لەسوۆ,
«Korkem Alem» كومپانياسىنىڭ باسشىسى
ماڭعىستاۋ وبلىسى,
جاڭاوزەن قالاسى
