جىل باسىندا قوستانايدا «Kia» اۆتوموبيلدەرىنىڭ شاعىن توراپتىق ءوندىرىسىن ىسكە قوسۋ راسىمىنە قاتىسقان پرەزيدەنت ونەركاسىپ كووپەراتسياسىن ودان ءارى كەڭەيتۋ جانە ينجەنەرلىك بازانى قالىپتاستىرۋ ماڭىزدى ەكەنىن اتاپ وتكەن ەدى.
جوعارى جالاقى تولەنەتىن 1 500 جۇمىس ورنىن قۇرۋعا مۇمكىندىك بەرەتىن جاڭا زاۋىت جىلىنا 70 مىڭ اۆتوكولىك شىعارادى. جوباعا شامامەن 250 ملن دوللار تىكەلەي شەتەلدىك ينۆەستيتسيا سالىنادى.
قۇرىلىس جۇمىستارى 2024 جىلى اياقتالادى دەپ جوسپارلانعان. ودان ءارى وندىرىسكە قاجەت قۇرىلعىلار مەن جابدىقتار ورناتىلا باستايدى. 2025 جىلدىڭ ءبىرىنشى توقساندا زاۋىت قاناتقاقتى رەجىمدە ىسكە قوسىلماق. ال ەكىنشى توقساندا ءوندىرىس تولىق اشىلادى.
قۇرىلىس الاڭىنىڭ رەسمي اشىلۋ سالتاناتىنا پرەمەر-ءمينيستردىڭ ءبىرىنشى ورىنباسارى رومان سكليار, ونەركاسىپ جانە قۇرىلىس مينيسترلىگى ونەركاسىپ كوميتەتى توراعاسىنىڭ ورىنباسارى شىڭعىس سۇيىنباەۆ قاتىستى.
سالتاناتتى راسىمدە رومان سكليار «Kia» كومپانياسى العاش رەت كورەيا رەسپۋبليكاسىنان تىس جەردە بىرلەسكەن كاسىپورىن مەن زاۋىت سالۋعا تىكەلەي ينۆەستيتسيا سالىپ وتىرعانىن اتاپ ءوتتى.
«قوستانايدا «Kia» اۆتوموبيلدەرىن شىعاراتىن تولىق تسيكلدى زاۋىت سالۋدى ماشينا جاساۋ سالاسى ءۇشىن شىن مانىندە سەرپىندى جوعارى تەحنولوگيالىق جوبا دەپ اتاۋعا بولادى. بۇل جوبا ناقتى مۋلتيپليكاتيۆتى اسەر بەرەدى, ينجەنەرلىك جانە تەحنيكالىق كادرلاردىڭ جاڭا بۋىنىن دايارلاۋ دەڭگەيىن ارتتىرۋعا, سونداي-اق لوكاليزاتسيالاۋدىڭ كەلەسى كەزەڭىنە كوشۋدى ايتارلىقتاي جەدەلدەتۋگە مۇمكىندىك بەرەدى. وسىنداي نەگىزگى ينۆەستورى بار زاۋىتتىڭ پايدا بولۋى وتاندىق ونەركاسىپتى دامىتۋدىڭ ماڭىزدى كەزەڭى, ەكونوميكانىڭ بارلىق سالاسىندا وڭتۇستىك كورەيامەن بولاشاق بىرلەسكەن ينۆەستيتسيالىق جوبالار ءۇشىن ايقىن ۇلگى بولادى», دەدى رومان سكليار.
قۇرىلىس الاڭىنىڭ اشىلۋ راسىمىندە «Kia Corporation» پرەزيدەنتى جانە باس ديرەكتورى حو سۋن سوننىڭ الدىن الا جازىلعان بەينەحابارلاماسى كورسەتىلدى. «قازاقستان رەسپۋبليكاسىنىڭ ەكونوميكاسىن دامىتۋعا ۇلەس قوسۋ مۇمكىندىگىنە يە بولۋ – «Kia» ءۇشىن ۇلكەن ماقتانىش. قوستانايداعى جاڭا زاۋىت ازاماتتارعا, ۋنيۆەرسيتەت تۇلەكتەرى مەن ينجەنەرلەرگە جوعارى دەڭگەيدەگى تاجىريبە جيناۋعا مۇمكىندىك بەرەتىن بىرەگەي جۇمىس ورىندارىن ۇسىناتىن بولادى», دەيدى الپاۋىت كومپانيا باسشىسى.
«Kia» كومپانياسى اۆتوموبيل جاساۋداعى جەرگىلىكتى قامتۋ دەڭگەيىن ارتتىرۋدا قازاقستاننىڭ ونەركاسىپتىك ساياساتىنا تولىق قولداۋ كورسەتۋگە دايىن ەكەنىن ءبىلدىردى. «Kia» قازىر قوستانايدا لوكاليزاتسيالاۋ ورتالىعىن اشۋ بويىنشا كوپ جۇمىس اتقارىپ جاتىر. مۇندا شاعىن جانە ورتا كاسىپكەرلەردىڭ قاتىسۋىمەن اۆتوكولىكتىڭ قۇرامداس بولىكتەرى شىعارىلماق.
وبلىس اكىمى قۇمار اقساقالوۆ وزىق الەمدىك تاجىريبەلەرگە جۇگىنە وتىرىپ, زاماناۋي جوعارى تەحنولوگيالىق كاسىپورىندى ىسكە قوسۋ رەسپۋبليكانىڭ اۆتوموبيل جاساۋداعى ءوندىرىس كولەمىن ۇلعايتۋعا ىقپال ەتەتىنىنە سەنىم ءبىلدىردى.
«ماشينا جاساۋ سالاسىن دامىتۋ ءوڭىردىڭ دامۋىنا مۋلتيپليكاتيۆتىك تۇرعىدان اسەر ەتەدى. اتاپ ايتقاندا, ماشينا جاساۋ سالاسىندا ءبىر جۇمىس ورنىن قۇرۋ باسقا سالالاردا بەس-التى جۇمىس ورنىنىڭ قۇرىلۋىنا سەپتىگىن تيگىزەدى. وندىرىستەردى لوكاليزاتسيالاۋ دەڭگەيىن ارتتىرۋ ءۇشىن جاڭا زاۋىتتىڭ اينالاسىندا قۇرامداس بولشەك جەتكىزۋشىلەرى رەتىندە شاعىن جانە ورتا بيزنەس بەلدەۋى قۇرىلادى», دەدى قۇمار اقساقالوۆ.
كورەيا رەسپۋبليكاسىنىڭ قازاقستانداعى ەلشىسى تە-يك چجو قازاقستان مەن وڭتۇستىك كورەيا 30 جىلدان استام ۋاقىت بويى ءوزارا ءتيىمدى ارىپتەستىكتى نىعايتىپ كەلە جاتقانىن اتاپ ءوتتى.
«بۇگىندە ەكى ەل پرەزيدەنت قاسىم-جومارت توقاەۆتىڭ قازاقستان حالقىنا جولداۋىندا ايتىلعان ەكونوميكالىق رەفورمالارعا ساي كەلەتىن ىنتىماقتاستىقتى ءىس جۇزىندە بەلسەندى دامىتىپ جاتىر. بۇل رەفورمالار وڭدەۋ سالاسىن دامىتۋ ارقىلى رەسپۋبليكا ونەركاسىبىن ارتاراپتاندىرۋعا باعىتتالعان», دەدى ەلشى.
قوستاناي وبلىسى
