حالىقارالىق بەيبىتشىلىكتى قولداۋ وقۋ ورتالىعىندا 80 مەملەكەتتىڭ بىتىمگەرلىك دايىندىق ورتالىقتارىنان 300-دەن اسا وكىل جينالدى. كونفەرەنتسيا دەلەگاتتارى كۇردەلى بىتىمگەرلىك وپەراتسيالارعا بىتىمگەرلەردى دايارلاۋداعى سەرىكتەستىكتىڭ ءرولىن تالقىلادى.
– كونفەرەنتسياعا قاتىسۋ بىتىمگەرلىك قىزمەت سالاسىنداعى اعىمداعى ۇردىستەرمەن جانە تالاپتارمەن تانىسۋعا, جاڭا بايلانىستار ورناتۋعا مۇمكىندىك بەردى. قولداعى بار مالىمەتتەردى ەسكەرە وتىرىپ, ءبىز ۇلتتىق بىتىمگەرلىك كونتينگەنتىن دايىنداۋ باعدارلاماسىن ۋاقتىلى بەيىمدەي الامىز, – دەدى بىتىمگەرلىك دايىندىق ورتالىعىنىڭ باسشىسى, پولكوۆنيك باۋىرجان نىعمەتۋللين.
ءىس-شارا ءبىرىنشى كەزەكتە بىتىمگەرلىك الەۋەتتى ارتتىرۋعا, حالىقارالىق ۇيىمداردىڭ, ۇكىمەتتەردىڭ جانە توتەنشە جاعدايلارعا دەن قويۋ تيىمدىلىگىن ارتتىرۋعا مۇددەلى جەرگىلىكتى بيلىك وكىلدەرىنىڭ ستراتەگيالىق ىنتىماقتاستىعىن باعالاۋعا جانە ونى دامىتۋعا باعىتتالعان.
بىتىمگەرلىك دايىندىق ورتالىقتارىنىڭ حالىقارالىق قاۋىمداستىعى 1995 جىلى قۇرىلعانىن ايتا كەتۋ كەرەك. ترەنينگتەر, ءبىلىم بەرۋ باعدارلامالارى مەن زەرتتەۋ باستامالارىنىڭ ارقاسىندا بۇكىل الەمنىڭ بىتىمگەرلىك دايارلاۋ ورتالىقتارى 190 ەلدەن 50 مىڭنان استام بىتىمگەردى ءساتتى دايارلادى.
