مامانداردىڭ ەسەپتەۋىنە قاراعاندا, جارتى عاسىردان بەرى جالپاق جۇرتتى اۋىز سۋمەن قامتاماسىز ەتىپ كەلە جاتقان نۇرا سۋ قۇبىرىنىڭ 90 پايىزعا جۋىعى شىرىگەنى دە بەلگىلى ەدى. سوناۋ نۇرادان باستاۋ الىپ, اتباسارعا جەتكەنشە جەلى بويىنداعى سۋدىڭ شامامەن 70-80 پايىزى شىعىن بولاتىنى دا كورسەتىلگەن. سۋ قۇبىرى ءجيى جارىلاتىندىقتان ءۇش اۋداننىڭ تۇرعىندارى اپتالاپ اۋىز سۋسىز قالاتىن. وسى جىلدىڭ مامىر ايىندا جەرگىلىكتى ماڭىزداعى توتەنشە جاعداي دا جاريالانعان. تاياۋدا وبلىس اكىمدىگىنىڭ ءباسپاسوز قىزمەتى ءسۇيىنشى حابار جاريالادى. ەل پرەزيدەنتى قاسىم-جومارت توقاەۆ وبلىس اكىمىنىڭ تاعايىنداعان كەزدە قاداي تاپسىرعان العاشقى مىندەتتىڭ ءبىرى وسى بولاتىن.
وبلىس اكىمى مارات احمەتجانوۆتىڭ باسشىلىعىمەن كوميسسيا قۇرىلدى. كوميسسيا قۇرامىنا سۋ رەسۋرستارى جانە يرريگاتسيا ءمينيسترىنىڭ ورىنباسارى, سۋ رەسۋرستارى كوميتەتىنىڭ توراعاسى, قورعالجىن, ەگىندىكول اۋداندارىنىڭ اكىمدەرى, وبلىستىق تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى, نۇرا توپتىق سۋ قۇبىرىنىڭ وكىلدەرى جانە باسقا دا مۇددەلى ادامدار كىردى. جەلىنىڭ جاڭا ۋچاسكەلەرىن نەگىزگى ۋچاسكەلەرگە قوسۋ بويىنشا ناقتى ءىس-قيمىل جوسپارى ازىرلەندى جانە قوسىلۋ مەرزىمى كەلىسىلدى. وبلىس اكىمىنىڭ شاقىرۋىمەن اۋدانعا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ كەلدى. سول جەردە قۇبىردىڭ توزىعى جەتكەن ماگيسترالدىق بولىگىن اۋىستىرۋ تەحنولوگياسىن وزگەرتۋ تۋرالى جەدەل شەشىم قابىلداندى. ۇزىندىعى 337 شاقىرىمدى قۇرايتىن سۋ قۇبىرى ەگىندىكول, قورعالجىن جانە اتباسار اۋداندارىنىڭ 24 ەلدى مەكەنىن سۋمەن جابدىقتاۋدىڭ نەگىزگى كوزى ەكەنىن اتاپ ءوتۋ قاجەت.
سۋ قۇبىرىن جاڭعىرتۋ جالعاسۋدا. ول جەردە بىردەن ەكى مەردىگەر ۇيىم جۇمىس ىستەيدى. 42 شاقىرىم ور قازىلدى. 11,2 شاقىرىمنان اسا قۇبىر توسەلدى. وزگە دە جۇمىستار مەيلىنشە ساپالى اتقارىلىپ جاتىر. كەشە ەگىندىكول اۋىلى تۇرعىندارىنا جەتى ايدان كەيىن العاش رەت اۋىز سۋ بەرە باستالدى. ەندى ەلدىڭ ەڭسەسى كوتەرىلەتىن-اق شىعار.
اقمولا وبلىسى
