قورعانىس مينيسترلىگى ۇيىمداستىرعان ءىس-شاراعا پرەزيدەنت كەڭەسشىسى – پرەزيدەنتتىڭ ءباسپاسوز حاتشىسى بەرىك ءۋالي, مادەنيەت جانە اقپارات مينيسترلىگىنىڭ, ءوزارا قارىم-قاتىناس ورگاندارىنىڭ وكىلدەرى, رەسپۋبليكالىق بۇقارالىق اقپارات قۇرالدارىنىڭ باسشىلارى, مەملەكەتتىك ورگانداردىڭ ءباسپاسوز حاتشىلارى, جۋرناليستەر مەن بلوگەرلەر قاتىستى.
فەستيۆالدە قورعانىس ءمينيسترى, گەنەرال-پولكوۆنيك رۋسلان جاقسىلىقوۆ اسكەري تاقىرىپتا ماقالا جازىپ, سيۋجەت ءتۇسىرىپ جۇرگەن جۋرناليستەردى باق وكىلى عانا ەمەس, ەڭ الدىمەن ەلىنىڭ پاتريوتتارى رەتىندە سانايتىنىن اتاپ ءوتتى.
– مۇنداي جوبالار بۇقارالىق اقپارات قۇرالدارىمەن ىنتىماقتاستىقتى نىعايتۋعا ىقپال ەتەدى, ازاماتتاردىڭ ارمياعا دەگەن اشىقتىعى مەن سەنىمىن ارتتىرادى. اسكەر تاقىرىبىن قوزعاپ جۇرگەندەرگە العىسىم شەكسىز. سىزدەرگە جاڭا جوبالار مەن شىعارماشىلىق تابىستار تىلەيمىن, – دەدى ول.
كەش بارىسىندا «قىزمەت ەتەمىن» جانە «اقساۋىت» باعدارلاماسىنىڭ پروديۋسەرلەرى يۋليا ۆاسيلەنكو مەن ساۋلە مىقتىباەۆا, «سارباز» پورتالىنىڭ باس رەداكتورى تيمۋر كۋبەكوۆ ءمينيستردىڭ اتىنان العىس حاتتار الدى. مادەنيەت جانە اقپارات مينيسترلىگى اقپارات كوميتەتىنىڭ توراعاسى ەلدوس ءناشىرالى اسكەري جۋرناليستيكا ارداگەرلەرىن قۇتتىقتاپ, ساپارعالي جاعىپاروۆ پەن قايىر دۇنبايانوۆقا «اقپارات سالاسىنىڭ ۇزدىگى» توسبەلگىسىن تاعىپ, دۋلات مولداباەۆقا قۇرمەت گراموتاسىن تابىس ەتتى.
قورعانىس مينيسترلىگى «اسكەر مەديا-2023» رەسپۋبليكالىق ءباسپاسوز فەستيۆالىن وسىمەن ءتورتىنشى رەت وتكىزىپ وتىر. مينيسترلىكتىڭ ءباسپاسوز حاتشىسى رۋسلان جانگۋليننىڭ ايتۋىنشا, بايقاۋعا 200-دەن استام جۇمىس كەلىپ تۇسكەن. ەرەجەگە سايكەس وعان 2023 جىلدىڭ 1 قاڭتارىنان 31 قازانىنا دەيىن باق-تا جاريالانعان جۇمىستار ۇسىنىلعان بولاتىن. قازىلار القاسى ولاردى باعالاۋ كەزىندە اۆتوردىڭ كاسىبي شەبەرلىگىن, تاقىرىپتىڭ وزەكتىلىگىن جانە ماتەريالدى بەرۋ ەرەكشەلىگىن نازارعا العان.
سونىمەن «بەس قارۋ» – ۇزدىك تەلەۆيزيالىق باعدارلاما اتالىمىندا «ەۋرازيا ءبىرىنشى ارناسى» تەلەارناسىنان ايگەرىم مۇزدىباەۆا جەڭىسكە جەتسە, راديوداعى ۇزدىك جۇمىسى ءۇشىن «داۋىلپاز» اتالىمىندا «Qazradio» ءراديوجۋرناليسى باعداگۇل راحمەتقىزى ۇزدىك دەپ تانىلدى.
باسپا باسىلىمىنداعى ۇزدىك جۇمىسى ءۇشىن «الداسپان» اتالىمىندا «Egemen Qazaqstan» گازەتىنىڭ ءجۋرناليسى ەسكەندىر زۇلقارنايدىڭ جۇمىسى ۇزدىك دەپ تانىلدى. قازىلار القاسى «سوزسەمسەر» اتالىمىندا «Inbusiness.kz.» اقپاراتتىق اگەنتتىگىنىڭ قىزمەتكەرى ماكسيم موروزوۆتىڭ جۇمىسىنا ۇزدىك باعا بەردى.
ۇزدىك فوتوجۇمىسى ءۇشىن «راۋان» اتالىمىندا «ليتەر» گازەتىنىڭ ءفوتوتىلشىسى پاۆەل ميحەەۆتىڭ سۋرەتتەرى كوش باستادى. بلوگەرلەردىڭ «قامشىگەر» دەپ اتالاتىن ساناتىندا بلوگەر تيمۋر اسىلحانوۆ جەڭىسكە جەتتى.
ۇزدىك اسكەري شولۋشىنى انىقتايتىن ء«دىلمار» اتالىمىندا قازىلار القاسى «Sputnik.kz» اقپاراتتىق اگەنتتىگىنىڭ ءجۋرناليسى الەكساندر ميروگلوۆتىڭ جۇمىسىنا باسىمدىق بەردى. بۇل سالادا جاڭادان كورىنىپ جۇرگەن جاس جۋرناليستەر دە قازىلار القاسىنا ءوز جۇمىستارىن جولداعان ەكەن. «جاس وركەن» ساناتىندا ەركەناز حاناتباي جەڭىسكە جەتتى.
