ۋنيۆەرسيادانىڭ اشىلۋ سالتاناتىندا تۇركى مەملەكەتتەرى ۇيىمى باس حاتشىسىنىڭ ورىنباسارى سادي دجافاروۆ, قازاقستان رەسپۋبليكاسىنىڭ عىلىم جانە جوعارعى ءبىلىم ءمينيسترى ساياسات نۇربەك قۇتتىقتاپ, سايىسقا قاتىسۋشىلارعا ساتتىلىك تىلەگەن ەدى. ال تۇركىستان وبلىسىنىڭ اكىمى دارحان ساتىبالدى تۇركى ەلدەرىنىڭ باسىن قوسقان سپورت دوداسىنىڭ ماڭىزدى ەكەنىن اتاپ ءوتتى.
«تۇركى ەلدەرىنىڭ ەكىنشى ۋنيۆەرسياداسى جوعارى دەڭگەيلى حالىقارالىق جارىسقا اينالىپ وتىر. بۇگىن تۇركى الەمىنىڭ 6 مەملەكەتىنەن تالانتتى سپورتشىلار جينالدى. سىزدەر – سان عاسىرلار الەمدى مويىنداتقان ەر تۇرىكتىڭ ۇرپاعىسىزدار! وسىدان 3 كۇن بۇرىن ەلوردامىز استانادا تۇركى مەملەكەتتەرى ۇيىمىنىڭ ونىنشى ءسامميتى ءوتتى. وعان تۇركى مەملەكەتتەرىنىڭ باسشىلارى قاتىسىپ, باۋىرلاس ەلدەر اراسىنداعى تاتۋلىقتى نىعايتۋ جولىنداعى ماڭىزدى شەشىمدەر قابىلدادى. ەكىنشى تۇركى ۋنيۆەرسياداسىنىڭ دا ماقساتى وسى. ءبىز بارلىق باۋىرلاس ەلدەرمەن جان-جاقتى قارىم-قاتىناستى نىعايتۋ ءۇشىن بار كۇش-جىگەرىمىزدى سالامىز. تۇركى ەلدەرىن جاقىنداتاتىن اۋقىمدى جوبالاردى جالعاستىرامىز», دەدى د.ساتىبالدى.
سونداي-اق وبلىس اكىمى جارىستى تاريحي شاھاردا وتكىزۋگە قولداۋ كورسەتكەنى ءۇشىن تۇركى مەملەكەتتەرى ۇيىمى مەن عىلىم جانە جوعارى ءبىلىم مينيسترلىگىنىڭ باسشىلىعىنا العىسىن ءبىلدىردى.
باۋىرلاس ەلدەر جاستارىنىڭ بىرلىگىن بەكەمدەۋ, ورتاق مادەنيەت پەن تاريحىمىزعا قىزىعۋشىلىعىن ارتتىرۋدى ماقسات ەتكەن جارىستىڭ قورىتىندىسى بويىنشا ۆولەيبولدان ەرلەر مەن ايەلدەر اراسىندا قازاقستاندىق ستۋدەنتتەر ۇزدىك اتاندى. ۋنيۆەرسيادانىڭ دزيۋدو جانە ەركىن كۇرەس سپورت تۇرلەرىنەن, اسىرەسە ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ سپورتشى جاستارى جوعارى كورسەتكىشكە قول جەتكىزدى. قازاقستان كومانداسىنىڭ قۇرامىنداعى ۋنيۆەرسيتەتتىڭ 5 ستۋدەنتىنىڭ تورتەۋى جەڭىس تۇعىرىنان كورىندى. فۋتزالدان قىرعىزستاننان كەلگەن كوماندا, ال شاحماتتان وزبەكستان جاستارى ءبىرىنشى ورىنعا يە بولدى. ەركىن كۇرەستەن قازاقستان العا شىقسا, دزيۋدودا وزبەك جانە ازەربايجان ستۋدەنتتەرى كوش باستادى. ال گرەك-ريم كۇرەسىندە تۇركيا ەلىنىڭ بالۋاندارى باسقا قۇراما سپورتشىلارىنا ەسە بەرمەدى. ەرلەر اراسىنداعى ۇستەل تەننيسى بويىنشا ماجارستان, قىزدار اراسىندا تۇركيا كومانداسى جەڭىمپاز اتاندى.
ق.ا.ياساۋي اتىنداعى حقتۋ-دا وتكەن سايىستىڭ جابىلۋ سالتاناتى عىلىم جانە جوعارى ءبىلىم ءمينيسترى ساياسات نۇربەكتىڭ قۇتتىقتاۋ بەينەروليگىمەن باستالدى.
«بۇل سايىس سپورتتىق باسەكەمەن قاتار, شىنايى دوستىقتىڭ دا جارقىن ۇلگىسىن كورسەتتى. ءتۇبى ءبىر تۇركى حالقىنىڭ تاريحى مەن ءداستۇرى, قۋاتى بارشامىزعا ورتاق مىعزىماس قۇندىلىق ەكەنى ءسوزسىز. بۇل سايىستا تۇركى جۇرتىنىڭ دوستىعى مەن شىنايى باۋىرمالدىعى جەڭىسكە جەتتى دەپ ەسەپتەيمىن», دەلىنگەن مينيستر تىلەگىندە.
ال تۇركىستان قالاسىنىڭ اكىمى نۇربول تۇراشبەكوۆ ۋنيۆەرسياداعا قاتىسقان سپورتشىلاردىڭ ءاربىرى ءوز ەلىنىڭ ماقتانىشى, ءۇمىت ارتقان ۇرپاعى, تۇركى ەلدەرى جاستارىنىڭ تۇركى مەملەكەتتەرىنىڭ رۋحاني استاناسى – تۇركىستاندا باس قوسۋى ۇلكەن مارتەبە ەكەنىن اتاپ ءوتتى. سالتاناتتى ءراسىم بارىسىندا عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى اقەركە ابىلايحانقىزى مەن قازاقستان ۇلتتىق ستۋدەنتتىك سپورت وداعىنىڭ ۆيتسە-پرەزيدەنتى مۇحتار ەسقاليەۆ III تۇركى ۋنيۆەرسياداسىن وتكىزۋ ءۇشىن تۋدى قىرعىزستان رەسپۋبليكاسى وكىلدىگىنە سالتاناتتى تۇردە تابىس ەتتى.
تۇركىستان
