amanatpartiasy.kz
رەسپۋبليكالىق ايتىستىڭ اشىلۋ سالتاناتىندا ءسوز العان ء ماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ مەملەكەت باسشىسى قاسىم-جومارت توقاەۆتىڭ ەڭبەك ادامىنىڭ مارتەبەسىن كوتەرۋدى تاپسىرىپ, رەسپۋبليكا كۇنى قارساڭىندا پرەزيدەنت 700-دەن استام قاراپايىم ەڭبەك ادامىن مەملەكەتتىك ناگرادامەن ماراپاتتاعانىن اتاپ ءوتتى. بۇل – ادال دا تاباندى ەڭبەگىمەن تاۋەلسىزدىگىمىزدىڭ تۇعىرىن بەكەمدەپ كەلە جاتقان ازاماتتارىمىزعا دەگەن قۇرمەت ەكەنىن ايتتى.
«بيىلعى «التىن دومبىرا» اقىندار ايتىسىنىڭ وزىندىك ءمانى بار. بۇگىنگى ايتىس قاراپايىم ەڭبەك ادامدارىنا ارنالادى. «ەڭبەك – ەل ىرىسى» دەپ وتىرمىز. سەبەبى, بەرەكەنىڭ باستاۋى – ەڭبەكتە. ال, ونىڭ يەسى دە, كيەسى دە – قاراپايىم ەڭبەك ادامدارى. وسى رەتتە مەملەكەت باسشىسى «ادال ازامات» ۇعىمىن قوعام ساناسىنا ءسىڭىرۋدى ۇسىندى. اينالىپ كەلگەندە, مەملەكەتتى مەملەكەت, ەلدى ەل قىلىپ وتىرعان باي-باعلاندار ەمەس, قاتارداعى جۇمىسشىلار, مالشىلار, ديقاندار, ۇستازدار مەن دارىگەرلەر. قازىر ولارعا دەگەن قوعامنىڭ شىنايى قۇرمەتى ويانىپ كەلەدى», دەدى ە.قوشانوۆ.
«التىن دومبىرا» رەسپۋبليكالىق ايتىستى جۇرگىزۋ تىزگىنىن ۇستاعان ءماجىلىس دەپۋتاتى امانجول ءالتاي كورەرمەنگە اقىندار مەن ولاردىڭ ونەرىن باعالايتىن قازىلاردىڭ قۇرامىن تانىستىردى.
«ايتىس – ۇرپاقتان ۇرپاققا اكەنىڭ قانى, انانىڭ سۇتىمەن جەتكەن قاستەرلى ونەر. بۇگىن ەلوردا تورىندە ەڭبەك ادامىنىڭ قادىر-قاسيەتىن, ولاردىڭ قوعامداعى ايرىقشا ورنىن جىرعا قوسامىن دەپ ويى ورەلى, ءسوزى سۇبەلى ايتۋلى اقىندار باس قوسىپ وتىر. بارشاڭىزعا ساتتىلىك تىلەيمىن», دەدى ا.ءالتاي.
ءار ايماقتان كەلگەن 16 اقىننىڭ اراسىنان كىمنىڭ باعى جاناتىنى ەرتەڭ بەلگىلى بولادى.
