كتك ارناسىنىڭ جازۋىنشا, جەردىڭ زاڭدى نە زاڭسىز ەكەنىن اكىمدىكتەگىلەردىڭ ءوزى دە ايتا المادى. قاسكەلەڭ قالاسىنىڭ جوعارعى جاعىنداعى ۇيلەر وسىدان 10 شاقتى جىل بۇرىن سالىنعان.
شامامەن 100-گە جۋىق ءۇي بار. بۇل قالاعا, ارى الماتىعا شىعاتىن جالعىز جول. ەندى الداعى ۋاقىتتا بۇل جول دا جان-جاعىنان جابىلىپ, تۇرعىندار مۇلدەم قامالىپ قالامىز با دەپ قورقىپ وتىر.
وعان سەبەپ تۇرعىندار كەزىندە ءوز قاراجاتىنا سالعان جولدى وسىدان ءۇش اي بۇرىن ءبىرى قوپارىپ, قاقپا سالىپ تاستاعان. سەبەبىن سۇراپ كەلسە, ءۇي يەسى "قۇجاتتارىم تۇگەل" دەپ جاۋاپ قايىرىپتى. جۇرت جول تۇرعان جەردى ساتىپ جىبەرگەن اكىمدىكتەگىلەر ەكەنىنە سەنىمدى.
"مىنە, مىنا اسفالت. وسىنى قولدان جاساپ اسفالت توسەگەنبىز. ەندى مىنا كىسىلەر ءبىزدىڭ مەملەكەتتىك اكتىمىز بار دەپ جاۋىپ تاستادى. جول بىلاي قاراي كەلۋ كەرەك. ەندى جوق. اشىپ بەرۋىن تالاپ ەتەمىز”, – دەيدى تۇرعىندار.
100-گە جۋىق وتباسى قازىر كورشىسىنىڭ ۋچاسكەسىمەن ءوتىپ ءجۇر. بىراق زاڭدى يەسى وندا ءۇي سالاتىن بولسا, تۇرعىنداردىڭ نە ارى, نە بەرى شىعا الماي قالاتىن ءتۇرى بار.
"مىنا جول ءتورت كوشەنىڭ جالعاسى. كورشىنىڭ ۋچاسكەسى انا باعانادان باستاپ, مىنا ءبىر جەرگە كەلەدى. سوندا جالعىز جول. مەكتەپكە دە بارادى. مەكتەپتە 300 بالا وقيدى. ولارعا دا جول جوق, بىزگە دە جوق. ەگەر ول كىسى جاۋىپ تاستايتىن بولسا, ءبىز تىكۇشاقپەن ۇشىپ ءجۇرۋىمىز كەرەك”, – دەيدى باۋىرجان سەيىتجان ۇلى.
قاسكەلەڭ قالاسىنىڭ باس جوسپارى بويىنشا بۇل بىرەۋدىڭ جەر تەلىمى ەكەن.
“مىناۋ باس جوسپار 2018 جىلى وزگەرىس ەنگىزىلگەن. سىزدەردىڭ سۇراۋلارىڭىز بويىنشا, مىناۋ بىرەۋدىڭ جەر تەلىمى جولعا تۇسكەن. ونىڭ قازىر زاڭدىلىعىن قوسىمشا انىقتايمىز. ساۋلەت, جەر قاتىناستارى ءبولىمى بار, سولارمەن انىقتاپ, قوسىمشا اقپارات بەرەمىز. ال حالىقتىڭ سۇراپ وتىرعان, ىڭعايسىز تۋعىزدىرىپ وتىرعان جەر تەلىمىنە ءبىز قازىر دەمەۋشىلەردىڭ ارقاسىندا تاس توسەۋ, جول تەگىستەۋ جۇمىسىن سۇراپ وتىرمىز. وسى قاراشا ايىنىڭ سوڭىنا دەيىن حالىققا سول جەردى تەگىستەپ, ىڭعايلى وتۋىنە جاعداي جاسايمىز”, – دەيدى قاسكەلەڭ قالاسى اكىمىنىڭ ورىنباسارى سەرىك قامزانوۆ.
بۇل جەر تەلىمىنىڭ جولدىڭ ۇستىنە قالاي ءتۇسىپ كەتكەنىن اتقامىنەرلەر بىلمەي مە, الدە اشىپ ايتقىسى كەلمەي مە, بەلگىسىز. "انىقتايمىز" دەگەننەن ارى اسا المادى. دەسە دە ماسەلەنى ءبىر جاقتى قىلامىز دەپ سەندىردى. الايدا جەرگىلىكتى تۇرعىندار شەندىلەردەن باياعىدا كۇدەرىن ۇزگەن. تۇيتكىلدىڭ ءتۇيىنى جاقىن ارادا تارقاتىلماسا, قۇزىرلى ورگاندارعا جۇگىنەمىز دەپ وتىر.
