ۆيتسە-پرەمەر تامارا دۇيسەنوۆا ۇكىمەت تاراپىنان مەديتسينالىق كومەك, ءبىلىم بەرۋ, الەۋمەتتىك قورعاۋ ساپاسىن ارتتىرۋ جانە بالالاردى ءتيىستى ينفراقۇرىلىممەن قامتۋ بويىنشا كەشەندى شارالار قابىلدانعانىن اتاپ ءوتتى. بۇگىندە بالالار ەلدەگى حالىق سانىنىڭ ۇشتەن ءبىرىن (ەلىمىزدە 6,8 ملن بالا مەن ءجاسوسپىرىم) قۇرايدى.
«بالاباقشالارداعى ورىن تاپشىلىعى ماسەلەسىن شەشۋ ءۇشىن ەلىمىزدە جىل سايىن مەكتەپكە دەيىنگى مەكەمەلەر قاتارى كوبەيىپ كەلەدى. ساپالى ورتا بىلىممەن قامتۋ ماقساتىندا مەكتەپ قۇرىلىسى قارقىندى ءجۇرىپ جاتىر. وسكەلەڭ ۇرپاقتى الەۋمەتتىك قولداۋعا ەرەكشە كوڭىل ءبولىنىپ وتىر. الايدا بالالاردىڭ قاۋىپسىزدىگى ماسەلەسى ءالى دە وزەكتى. سوندىقتان بۇل زاڭ جوباسى قوعام ءۇشىن وتە ماڭىزدى. قۇجاتتىڭ ساپاسى ساراپشىلاردىڭ ۇسىنىستارى مەن ولاردىڭ بۇل سالادا جيناقتالعان زور تاجىريبەسىنە بايلانىستى», دەپ اتاپ ءوتتى تامارا دۇيسەنوۆا.
زاڭ جوباسى تۋرالى قازاقستان رەسپۋبليكاسى بالا قۇقىقتارى جونىندەگى ۋاكىل دينارا زاكيەۆا ايتىپ بەردى. ونىڭ ايتۋىنشا, قۇجاتتا ەلىمىزدە وتباسىلار مەن بالالارعا كومەك كورسەتۋگە باعىتتالعان ينفراقۇرىلىم جاساۋ قاراستىرىلعان. ءار اۋداندا قولداۋ ورتالىقتارى, ءار وبلىستا پسيحولوگيالىق قولداۋ ورتالىقتارى سالىنادى.
زاڭ جوباسى ازىرگە 50-دەن اسا تالاپتى قامتىپ وتىر. ەندى ونداعى نورما قوعام اراسىندا كەڭىنەن تالقىلانادى. پرەمەر-ءمينيستردىڭ ورىنباسارى بارلىق مۇددەلى تاراپتاردى بۇل ىسكە اتسالىسۋعا شاقىردى. ال بالا قۇقىقتارى جونىندەگى ايماقتىق ۋاكىلدەردەن تامارا دۇيسەنوۆا وڭىرلەردە ءتۇسىندىرۋ جۇمىستارىن جۇرگىزە وتىرىپ, ازاماتتاردىڭ جوباعا قاتىستى تالاپ-تىلەكتەرىن جيناۋدى سۇرادى.
