تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين بۇگىندە استانا, الماتى, شىمكەنت قالالارىندا جانە وبلىس ورتالىقتارىندا بايلانىس وپەراتورلارىنىڭ 800-دەن استام 5G بازالىق ستانساسى ورناتىلعانىن باياندادى.
بۇل رەتتە تەحنولوگيانى ەنگىزۋدى جەدەلدەتۋ ءۇشىن بايلانىس ستانسالارىن ىسكە قوسۋ مەرزىمىنە ايتارلىقتاي اسەر ەتەتىن رەتتەۋشى بىرقاتار كەدەرگىنى جويۋ قاجەت. بۇل جابدىقتى مونتاجداۋ راسىمدەرىن جەڭىلدەتۋگە, سانيتاريالىق ەرەجەلەردى حالىقارالىق ستاندارتتارعا سايكەستەندىرۋگە, جەر تەلىمدەرىن ۋاقتىلى بەرۋگە جانە ت.ب. قاتىستى.
ءاليحان سمايىلوۆ مەملەكەت باسشىسىنىڭ تاپسىرماسىنا سايكەس رەسپۋبليكالىق ماڭىزى بار قالالار مەن وبلىس ورتالىقتارىندا 5G جەلىسىن ەنگىزۋ جۇمىستارى 2025 جىلدىڭ سوڭىنا دەيىن اياقتالۋعا ءتيىس ەكەنىن ەسكە سالدى. وسىعان بايلانىستى پرەمەر-مينيستر ارتىق اكىمشىلىك كەدەرگىلەردى جەدەل جويىپ, حالىقتى ساپالى جوعارى جىلدامدىقتى ينتەرنەتپەن قامتاماسىز ەتۋ قاجەتتىگىن باسا ايتتى.
سونداي-اق جيىندا بيىلعى قازان ايىندا 10 اۋىلدىق مەكتەپ «SpaceX» كومپانياسىنىڭ «Starlink» تەحنولوگياسى ارقىلى تەستىلىك رەجىمدە كەڭ جولاقتى ينتەرنەتكە قوسىلعانى ايتىلدى. بۇل جەلىدەگى دەرەكتەردى بەرۋ جىلدامدىعى سەكۋندىنا 200 مبيت-كە جەتەدى.
جالپى, وسىلايشا, رەسپۋبليكانىڭ شالعاي ەلدى مەكەندەرىندەگى 2000 ءبىلىم بەرۋ نىسانىن جوعارى جىلدامدىقتى ينتەرنەتكە قوسۋ جوسپارلانىپ وتىر. اتالعان جۇمىس شەڭبەرىندە ءتيىستى جابدىقتاردى جەتكىزۋ جانە ولارعا تەحنيكالىق قىزمەت كورسەتۋ جۇزەگە اسىرىلادى.
پرەمەر-مينيستر زاماناۋي بايلانىس جەلىلەرىن ەنگىزۋمەن قاتار اۋىل مەكتەپتەرىنە ارنالعان ءبىلىم بەرۋ باعدارلامالارىن دامىتۋعا نازار اۋدارۋ قاجەت ەكەنىن باسا ايتتى. اتاپ ايتقاندا, جاڭا تسيفرلىق فورماتتار مەن تاسىلدەر ارقىلى وقۋشىلاردىڭ بەلسەندىلىگىن جانە جالپى ءبىلىم بەرۋ ۇدەرىسىنىڭ تيىمدىلىگىن ارتتىرۋعا بولادى.
