كتك تەلەارناسىنىڭ جۋرناليستەرىنىڭ حابارلاۋىنشا, ايەل ادام وگەي قىزىن ۇنەمى ۇرىپ-سوعىپ, ءوز دارەتىن ءوزى ۇستاي المايتىن حالگە جەتكىزگەن.
"جانتۇرشىگەرلىك قىلمىس بيىل جازدا بولعان. جاۋىز ايەل جەتكىنشەكتى جۇيەلى تۇردە ساباپ كەلگەنىن كۋاگەرلەر ايتىپ وتىر. اقىر سوڭىندا ۇلكەن دارەتىن جىبەرىپ قويعانى ءۇشىن باسىن قابىرعاعا ۇرىپ تالدىرعان. قىز بالا ەس جيماستان قايتىس بولدى. جاۋىزدىق جاساعان قىزدىڭ وگەي شەشەسى كەزىندە قوعامدىق-الەۋمەتتىك ماسەلەلەردى كوتەرىپ جۇرگەن بەلسەندىسىماق ەكەن. 47 جاستاعى ايەلگە وگەي قىزىن ۇرىپ ءولتىردى دەگەن ايىپ تاعىلىپ وتىر. بۇگىنگى الدىن الا تىڭدالىمعا ول تىڭعىلىقتى دايىندالىپ كەلگەن سىڭايلى", دەيدى ارنا تىلشىلەرى.
قازىرگى تاڭدا مارقۇم بولعان بالاقايدىڭ اجەسى ايەلدى قاتاڭ جازاعا تارتىلعانىن تالاپ ەتىپ وتىر.
"مەنىڭ تالابىم, ول ايەلدى ءومىر بويىنا باس بوستاندىعىنان ايىرۋ. ويتكەنى نەمەرەمدى ءتورت اي بويى ۇرىپ, اقىرى ءولتىرىپ تاستادى. نەگىزى اكەسى دە كارينانى ۇرعان. بىراق ول جازادان قۇتىلىپ كەتتى. اكەسىن دە قاماۋعا الۋ كەرەك", دەيدى ەلەنا زاكۋراەۆا, مارقۇمنىڭ اجەسى.
سونىمەن بىرگە كۋاگەرلەر جەتى جاسار قىزدىڭ اكەسىن دە جازاعا تارتۋ كەرەك ەكەنىن العا تارتۋدا. بەلگىلى بولعانى, تۋعان شەشەسى 10 ايلىعىندا قاشىپ كەتكەن كىشكەنتاي كارينانى 7 جاسىنا دەيىن نەگىزى اجەسى باعىپ-قاققان.
الايدا بيىل كوكتەمدە اكەسى باكەن زاكۋراەۆ ينسپەكتورلارمەن كەلىپ قىزدى الىپ كەتكەن. ءسويتىپ وزىنەن 14 جاس ۇلكەن ازاماتتىق نەكەدەگى ايەلى بالجان تۇرلىبەكوۆانىڭ ۇيىنە اپارادى. سول ۋاقىتتا ەكەۋى بىرگە جارتى جىل عانا تۇرىپتى. كارينا جات جەردە ءتورت اي بويى وگەي شەشەسىنەن دە, تۋعان اكەسىنەن دە ابدەن تاياق جەگەن دەيدى جاقىندارى. بەلبەۋمەن ساباعانىن كورشىلەرى دە كورىپتى.
ايتۋلارىنشا, اقىر سوڭىندا, 10 شىلدەدە جەتكىنشەك ۇلكەن دارەتىن جىبەرىپ قويعانى ءۇشىن وگەي شەشەسى باسىن قابىرعاعا ۇرادى. قاتتى سوققىدان ميىنا قان قۇيىلىپ, كارينا بىردەن ءجانتاسىلىم ەتكەن.
وگەي قىزىن ءولتىردى دەپ ايىپتالعان بالجان تۇرلىبەكوۆا 20 جىل نەمەسە ءومىر بويىنا دەيىن باس بوستاندىعىنان ايىرىلۋى مۇمكىن. ال ايەلىنىڭ قاتىگەز ەكەنىن بىلە تۇرا, اراشا تۇسپەگەن اكەسى جازاعا تارتىلادى ما, جوق پا, ازىرگە بەلگىسىز. كەيبىر مالىمەتكە سۇيەنسەك, باكەن زاكۋراەۆ سول وقيعادان كەيىن قاڭعىباستىڭ كۇيىن كەشىپ كەتكەن.
