ەكپە الۋ ءۇشىن قالا تۇرعىندارى تۇرعىلىقتى جەرى بويىنشا ەمحاناعا جۇگىنۋى قاجەت. قوسىمشا جاپپاي يممۋنداۋ (قجي) ءۇشىن ەگۋ كابينەتتەرى جۇمىس كۇندەرى ساعات 8.00-دەن 18.00-گە دەيىن جۇمىس ىستەيدى. يممۋنداۋ جۇرگىزىلمەس بۇرىن دارىگەر پاتسيەنتپەن قىزىلشانىڭ الدىن الۋى بويىنشا اقپاراتپەن, ەكپەدەن كەيىن بولۋى مۇمكىن اعزاداعى رەاكتسيالار بويىنشا تۇسىندىرمە جۇمىسىن جۇرگىزەدى.
«قىزىلشاعا قارسى قوسىمشا جاپپاي يممۋنداۋدىڭ قاجەتتىلىگى ەلىمىزدە جانە استانا قالاسىندا قىزىلشامەن سىرقاتتانۋ جاعدايىنىڭ كۇرت وسۋىنە بايلانىستى تۋىنداپ وتىر. ناۋقاستاردىڭ كوپشىلىگى – بالالار. قىزىلشا ينفەكتسياسىنىڭ تارالۋىنا ەكپە الماعان بالالاردىڭ كوپتىگى دە ىقپال ەتىپ وتىر. مۇنىڭ سەبەبى – اتا-انالاردىڭ ۆاكتسينالاۋدان باس تارتۋى, نەگىزسىز مەديتسينالىق شەتتەتۋلەر, ەگىلۋ مەرزىمىن كەيىنگە قالدىرۋ. قىزىلشا ينفەكتسياسىنان قورعالماعاندار – 6 ايدان 11 ايعا دەيىنگى كىشكەنتاي بالالار. بۇل جاستاعى بالالاردى ومىراۋ سۇتىمەن بەرىلەتىن انالىق يممۋنيتەت قورعامايدى جانە ءدال وسى بالالار ەكپە جاسىنا ءالى جەتپەگەن. سەبەبى قىزىلشاعا قارسى جوسپارلى تۇردە ەگىلۋ 1 جاستان باستالادى. بالالارىمىزدى قورعاۋدىڭ جانە قىزىلشانىڭ تارالۋىن توقتاتۋدىڭ جالعىز جولى – ۆاكتسينالاۋ», دەپ حابارلادى قوعامدىق دەنساۋلىق ساقتاۋ باسقارماسىنىڭ ءباسپاسوز قىزمەتى.
