كولىكتەگى پوليتسيا دەپارتامەنتىنىڭ مالىمەتىنشە, 2023 جىلدىڭ باسىنان بەرى پويىزداردىڭ شۇعىل تەجەلۋىنىڭ 1624 فاكتىسى تىركەلگەن, ونىڭ 1077-ءسى تەمىر جول توسەمىندە جانۋارلاردىڭ ءجۇرۋى سەبەبىنەن ورىن الدى.
ماسەلەن, 3 قاراشادا سولتۇستىك قازاقستان وبلىسىنىڭ بەلەگرادوۆكا – جاڭاەسىل ارالىعىندا جۇك پويىزىنىڭ ءماشينيسى تەمىر جولدا جۇرگەن ۇساق مالمەن سوقتىعىسۋدىڭ الدىن الۋ ءۇشىن شۇعىل تەجەگىشتى قولدانعان. الايدا سوقتىعىسۋدىڭ الدىن الۋ مۇمكىن بولمادى, سالدارىنان 16 باس ۇساق مالدى قاعىپ كەتتى.
جوسپارلانباعان پويىز تۇراعى 10 مينۋتقا سوزىلدى.
"تەكسەرۋ بارىسىندا ءۇي جانۋارلارىنىڭ يەسى انىقتالدى. ول سولتۇستىك قازاقستان وبلىسىنىڭ 58 جاستاعى تۇرعىنى بولىپ شىقتى. قۇقىق بۇزۋشى قر اقبتك-ءنىڭ 559-بابىنىڭ 1-بولىگى (تەمىرجولدارعا بولىنگەن جولاقتا مال جايۋ ەرەجەلەرىن بۇزۋ) بويىنشا اكىمشىلىك جاۋاپكەرشىلىككە تارتىلدى", - دەپ جازدى دەپارتامەنتتەن.
