فورۋم مەملەكەتتىك ورگانداردىڭ, ماقساتتى كاپيتال جانە قارجى سەكتورى قورلارىنىڭ, ەنداۋمەنت قورلاردىڭ جانە قازاقستان, رەسەي, قىرعىزستان, وزبەكستان, تاجىكستان جوعارى وقۋ ورىندارىنىڭ وكىلدەرىن ءبىر الاڭعا بىرىكتىردى. جيىنعا قاتىسۋشىلار قازاقستانداعى ەنداۋمەنت قورلاردىڭ بۇگىنگى احۋالى مەن دامۋ باسىمدىقتارىن, ولاردىڭ قىزمەتىن قولداۋ مەن رەتتەۋدەگى مەملەكەتتىك ورگانداردىڭ ءرولىن, ەنداۋمەنت اكتيۆتەرىن باسقارۋداعى يننوۆاتسيالار مەن تەحنولوگيالاردى تالقىلادى ءارى تمد ەلدەرىندەگى ەنداۋمەنت تاجىريبەسىن قاراستىردى.
فورۋم بارىسىندا ۇلتتىق ۋنيۆەرسيتەتتىڭ رەكتورى ەرلان سىدىقوۆ ەنداۋمەنتتىڭ ءبىلىم بەرۋ مەكەمەلەرىنىڭ تۇراقتىلىعى مەن باسەكەگە قابىلەتتىلىگىن قامتاماسىز ەتۋدەگى نەگىزگى رولىنە توقتالدى. ول ۋنيۆەرسيتەت 2022 جىلى وتكىزگەن «قازاقستاننىڭ ەنداۋمەنتتەرى» ءبىرىنشى فورۋمى ەنداۋمەنت قورلارىنىڭ قىزمەتىنە قاجەتتى نورماتيۆتىك-قۇقىقتىق بازانى ازىرلەۋدىڭ نەگىزىنە اينالعانىن اتاپ ءوتتى.
– 2021 جىلى ءبىزدىڭ تۇلەكتەر ENU Endowment Fund قۇرىپ, دارىندى ستۋدەنتتەرىمىزگە تابىستى قولداۋ كورسەتىپ كەلەدى. قور الەمدىك تاجىريبەنى قولدانادى, مۇندا نەگىزگى كاپيتالعا قول سۇعىلمايدى جانە ستۋدەنتتەرگە كومەك تەك ينۆەستيتسيالىق كىرىس ارقىلى كورسەتىلەدى. وزدەرىڭىز بىلەتىندەي, مەملەكەت باسشىسى جولداۋدا ۋنيۆەرسيتەتتەردەگى ەنداۋمەنت قورلارى ءبىلىم بەرۋ ەكوجۇيەسىن دامىتۋدىڭ نەگىزگى بۋىنىنا اينالۋعا ءتيىس ەكەنىن اتاپ ءوتتى. بۇگىنگى تاڭدا الەمدىك ءبىلىم بەرۋ مەكەمەلەرى ەنداۋمەنت قورلارىنىڭ قولداۋىنىڭ ناتيجەسىندە سەرپىندى جوبالاردى جۇزەگە اسىرا الادى. قورلار اكادەميالىق الەم مەن بيزنەس قاۋىمداستىق اراسىنداعى, ۋنيۆەرسيتەتتىڭ وتكەنى, بۇگىنى جانە بولاشاعى اراسىنداعى كوپىرگە اينالادى, – دەدى ە.سىدىقوۆ.
عىلىم جانە جوعارى ءبىلىم ءمينيسترىنىڭ كەڭەسشىسى فارحاد قۋانعانوۆ ەۋرازيا ۇلتتىق ۋنيۆەرسيتەتى ەلىمىزدەگى ەنداۋمەنت قورلارى قوزعالىسىنىڭ العاشقى باستاماشىسى بولعانىن جەتكىزدى. ونىڭ ايتۋىنشا, زاڭ جوباسىن دايىنداۋ كەزىندە ەنداۋمەنت قورلارى قۇرىلعان ەلدەردىڭ حالىقارالىق تاجىريبەسى زەردەلەنگەن.
– ءبىر جىل بۇرىن كونفەرەنتسياعا قاتىسۋشىلار ۇسىنىستار دايىنداپ, ەنداۋمەنت قورلارى تۋرالى جەكە زاڭ ازىرلەۋدى ۇسىندى. بۇگىندە بۇل ماسەلە پراكتيكالىق دەڭگەيگە كوشتى. جەكە زاڭ جوباسىن قابىلداۋ قاجەتتىلىگى قازىرگى زاڭنامادا ەنداۋمەنت قورلارىنا الەۋەتتى سالىمشىلاردى ىنتالاندىرۋ, دۇرىس ينۆەستيتسيالاۋ جانە سالىمشىلار قاراجاتىنىڭ جۇمسالۋىن باقىلاۋ بويىنشا نورمالاردىڭ جوقتىعىنان تۋىنداپ وتىر. تابىستى ەنداۋمەنت قورلارى بار ەلدەردەگىدەي جەكە زاڭ قاجەت. قازاقستاندا ەنداۋمەنت قورلارى زاڭدى تۇلعانى كورپوراتيۆتىك, ينۆەستيتسيالىق نەمەسە باسقا دا قور تۇرىندە تىركەۋگە ءماجبۇر. بۇل قايىرىمدىلىق تۋرالى زاڭدا كوزدەلگەن قىزمەتتى قيىنداتادى جانە سالىقتىق داۋلار تۋدىرادى. زاڭ جوباسىنىڭ قۇرىلىمى قازاقستان زاڭناماسىنىڭ تالاپتارىنا سايكەس جاسالعان. ونى ازىرلەۋ كەزىندە ەنداۋمەنت قورلارى تۋرالى قولدا بار نورمالاردى ساقتاۋعا جانە بارىنشا پايدالانۋعا تىرىستىق, – دەپ ءتۇسىندىردى ف.قۋانعانوۆ.
ۇلتتىق ەنداۋمەنتتەر قاۋىمداستىعىنىڭ باسقارما توراعاسى سۆەتلانا لاۆروۆا رەسەيدەگى ماقساتتى كاپيتال قورلارىنىڭ قىزمەتىنە كەڭىنەن توقتالدى. «ۋنيۆەرسيتەتتەردى قارجىلاندىرۋدىڭ ءارتۇرلى كوزدەرى ىشىنەن تەك ەنداۋمەنتتەر عانا ۋنيۆەرسيتەتتىڭ ۇزاقمەرزىمدى تۇراقتىلىعى مەن تاۋەلسىزدىگىن قامتاماسىز ەتە الادى. ستراتەگيالىق پەرسپەكتيۆا تۇرعىسىنان ويلاعان كەزدە ەنداۋمەنتتىڭ قاجەتتىلىگى تۋىندايدى. ەگەر ءسىز 3-5 جىلدى جوسپارلاساڭىز, وندا قىسقامەرزىمدى قارجىلاندىرۋ كوزدەرى جەتكىلىكتى. ەنداۋمەنت-قورلاردىڭ قىزمەتى 3 بولىكتەن تۇرادى: اقشا جيناۋ, ونى قارجى نارىعىنا سالىپ, كىرىس الۋ جانە كىرىستى پايدالانۋ. ەنداۋمەنتتىڭ ەكى نەگىزى بار: ۋنيۆەرسيتەت جانە قارجىنى ۋنيۆەرسيتەتكە تابىس اكەلۋ ءۇشىن ينۆەستيتسيالايتىن قارجىلىق كومپانيا, ياعني باسقارۋشى كومپانيا», دەدى ساراپشى.
قازاقستان قارجىگەرلەرى قاۋىمداستىعىنىڭ باسقارۋشى ديرەكتورى ەرلان بۋراباەۆ قارجى نارىعى ەلىمىزدىڭ ەنداۋمەنت-قورلار جۇيەسىن قۇرۋعا بيىل عانا بەلسەندى تۇردە قاتىسقانىن اتاپ ءوتتى. ء«بىز قازاقستانداعى ەنداۋمەنت قورلاردى دامىتۋ بويىنشا ۇسىنىستاردى قىزىعۋشىلىقپەن قابىلدادىق. ارينە, قارجى نارىعى ەكونوميكاداعى كاپيتالدى قايتا بولۋمەن اينالىساتىن جۇيە رەتىندە ەنداۋمەنت قورلارىندا قالىپتاساتىن اقشانىڭ ەكونوميكا ءۇشىن ۇزاقمەرزىمدى ەكەندىگىنە قىزىعۋشىلىق تانىتادى. بۇل – قارجى نارىعى ءۇشىن ەڭ ماڭىزدى ەلەمەنت», دەپ تولىقتىردى قارجىگەر.
كونفەرەنتسيا قورىتىندىسى بويىنشا رەزوليۋتسيا قابىلداندى. ونىڭ اياسىندا قاتىسۋشىلار ادىستەمەلەردى ستاندارتتاۋ جانە ۇزدىكسىز ءبىلىم الۋ مەن ديالوگ الاڭىن قامتاماسىز ەتۋ ءۇشىن قازاقستان قورلارىنىڭ قاۋىمداستىعىن قۇرۋ تۋرالى شەشىم قابىلدادى. «ماقساتتى كاپيتال قورلارى (ەنداۋمەنت قورلارى) تۋرالى» زاڭنىڭ جوباسىنا دا ساراپشىلار وڭ باعاسىن بەردى.
