مىسالى, ەكىنشى دۇنيەجۇزىلىك سوعىستىڭ ارداگەرى مىرزاحمەت جىلىسباەۆ العاشقىلاردىڭ ءبىرى بولىپ ءوز تاڭداۋىن جاسادى. سانالى عۇمىرىن سوزاق اۋدانىنىڭ دامۋىنا ارناپ, ەلگە قىزمەت ەتكەن اقساقال سىزعان اۋىل وكرۋگىندەگى №701 سايلاۋ ۋچاسكەسىندە داۋىس بەردى. «ەلىمىزدىڭ, اۋدانىمىزدىڭ بولاشاعى ءۇشىن ءاربىر ازاماتتىڭ داۋىسى ماڭىزدى. سوندىقتان مەن دە جاسىم 90-نان اسقانىنا قاراماستان تاڭ سارىدەن كەلىپ, ءوز تاڭداۋىمدى جاسادىم. ساياسي ناۋقاننان شەت قالمادىم. قاشاندا ەلىمىز امان, بەيبىتشىلىك زامان بولسىن», دەدى قاريا. جاستارعا ۇلگى كورسەتكەن ماقتاارال اۋدانىنا قاراستى دوستىق اۋىلدىق وكرۋگى گ ۇلىستان اۋىلىنىڭ تۇرعىنى تۇرىكمەن كەنجەەۆ – 80 جاستا. تاجىك ەتنوسىنىڭ وكىلى وسىنداي بەيبىت ەلدە تۇرىپ جاتقانى ءۇشىن قازاق اعايىندارىنا العىسى شەكسىز ەكەنىن ءبىلدىردى. ماقتاارال اۋدانىندا 1 160 سايلاۋشى – ءبىرىنشى رەت داۋىس بەرۋ قۇقىعىنا يە بولعاندار. سونىمەن قاتار 11 307 كوپبالالى انا مەن 100 جاستان اسقان 4 ماقتاارالدىق تا ءوز تاڭداۋىن جاسادى.
جالپى, سوزاق اۋدانىندا 35 715 ازامات سايلاۋ قۇقىعىنا يە, ال ماقتاارال اۋدانىندا – 70 648, بايدىبەك اۋدانىندا – 28 807, شاردارا اۋدانىندا 44 109 سايلاۋشى بار. تۇركىستان اۋماقتىق سايلاۋ كوميسسياسىنىڭ مالىمەتىنشە, بايدىبەك اۋدانىندا داۋىس بەرۋگە قاتىسقان 16 729 سايلاۋشىنىڭ 9 379-ى, ياعني باسىم بولىگى ءۇش كانديداتتىڭ اراسىنان «اۋىل» پارتياسىنان تۇسكەن ەرلان نۇرماحانوۆقا داۋىس بەرگەن. ال ماقتاارال اۋدانى بويىنشا سايلاۋشىلاردىڭ 29 338-ءى قولداپ داۋىس بەرگەن, وسىعان دەيىن ماقتاارال اۋدانىنىڭ اكىمى بولىپ قىزمەت اتقارىپ كەلگەن باحىت اسانوۆ سايلاندى. سوزاق اۋدانى بويىنشا سوزاق اۋدانىنىڭ اكىم بولىپ قىزمەت اتقارىپ كەلگەن مۇحيت تۇرىسبەكوۆ سايلاندى. ونى قولداپ 16 016 سايلاۋشى داۋىس بەرگەن. شاردارا اۋدانى بويىنشا ەسىمى ەلگە ءمالىم, قول كۇرەسىنەن جۇزدەگەن الەم چەمپيونىن دايىنداعان ارمان قارسىباەۆقا سايلاۋشىلاردىڭ 18 259-ى داۋىس بەرگەن. ءسويتىپ, ءۇش ۇمىتكەردىڭ اراسىنان وزىق شىققان اۋداندىق ءماسليحاتىنىڭ توراعاسى قىزمەتىن اتقارىپ كەلگەن ارمان قارسىباەۆ شاردارا اۋدانىنىڭ اكىمى بولىپ سايلاندى.
تۇركىستان وبلىسى
