تۇرار رىسقۇلوۆ اۋدانىنىڭ حالقى تاڭنان سايلاۋ ۋچاسكەلەرىنە اعىلىپ كەلىپ جاتتى. العاش رەت قولعا الىنعان اۋدان اكىمدەرىنىڭ ساياسي ناۋقانىنا بەلسەندى اتسالىسقان تۇرعىندار ايماق باسشىسىن وزدەرى تاڭدايتىنىنا قۋانىشتى. ساياسي ناۋقاندا تۇرار رىسقۇلوۆ اۋدانىنىڭ اكىمى لاۋازىمىنا ۇمىتكەر رەتىندە ءۇش كانديدات تىركەلگەن. ولاردىڭ قاتارىندا ءبىر جىلدان استام ۋاقىت اۋدان تىزگىنىن ۇستاعان ەرنار ەسىركەپوۆ تە بار.
«بۇرىن تەك پرەزيدەنت پەن ءتۇرلى دەڭگەيدەگى دەپۋتاتتاردىڭ سايلاۋىنا عانا قاتىساتىن ەدىك. ەندى اۋدان اكىمدەرىن تاڭداۋ مۇمكىندىگى جەرگىلىكتى حالىقتىڭ قاتىسۋىمەن ىسكە اسىپ جاتقانى – قۇپتارلىق قادام. ايماق تىزگىنىن قولعا الۋعا نيەت تانىتىپ وتىرعان كانديداتتاردىڭ بارلىعى دا جەرگىلىكتى ازاماتتار. قاراپايىم حالىقپەن بىرگە ءبىز دە تاڭداۋىمىزدى جاسادىق. جەڭىسكە جەتكەن كانديدات اۋداننىڭ الەۋمەتتىك-ەكونوميكالىق تۇرعىدان وركەندەۋىنە ىقپال ەتەتىنىنە سەنىم مول», دەيدى قۇلان اۋىلىنىڭ تۇرعىنى عاليا دۇيسەنبەكوۆا.
جالپى, تۇرار رىسقۇلوۆ اۋدانىندا 40 419 ازامات سايلاۋشى رەتىندە تىركەلسە, ونىڭ 20 541-ءى ساياسي ناۋقانعا قاتىسىپ, تاڭداۋ جاسادى. سايلاۋ قورىتىندىسىندا كانديدات ساپار قۇلمانوۆقا 1 891 ازامات داۋىس بەرسە, باقىتبەك ءابىلازىموۆ 1 804 داۋىسقا يە بولعان. ال «Amanat» پارتياسى ۇسىنعان ەرنار ەسىركەپوۆ 16 179 داۋىسپەن جەڭىسكە جەتتى. ساياسي ناۋقاندا داۋىس بەرگەندەردىڭ 309-ى «بارىنە قارسىمىن» دەگەن باعاندى تاڭداپتى.
وسىلايشا, وڭىردەگى ەڭ جاس ەكى اكىمنىڭ ءبىرى رەتىندە تۇرار رىسقۇلوۆ اۋدانىنىڭ تىزگىنىن ۇستاعان ەرنار ەسىركەپوۆ حالىقتىڭ قالاۋىمەن اۋدان تىزگىنىن قايتا قولىنا الدى.
جۋالى اۋدانىندا دا اۋدان اكىمىن سايلاۋ ناۋقانى ساتىمەن ءوتتى. ساياسي ناۋقانعا 31 323 سايلاۋشىنىڭ 19 720-سى قاتىسىپ, تاڭداۋ جاسادى. ناتيجەسىندە, ءۇش كانديداتتىڭ ىشىنەن سۋىرىلىپ شىققان اۋداننىڭ بۇرىنعى اكىمى جالعاس مۇرتازا 16 520 تۇرعىننىڭ سەنىمىنە يە بولىپ, جەڭىسكە جەتتى.
جالپى العاندا قاناتقاقتى رەجىمدە ۇيىمداستىرىلعان اۋدان اكىمدەرىنىڭ سايلاۋى قورىتىندىسىندا جىل بۇرىن ەكى اۋداننىڭ تىزگىنىن ۇستاعان ەڭ جاس ەكى اكىم ورىنتاعىن ساقتاپ قالدى. جەرگىلىكتى حالىق جاس باسشىلاردىڭ سەنىم ۇدەسىنەن شىعاتىنىنا بەك سەنىمدى. وسىعان قاراپ-اق ەرنار ەسىركەپوۆ پەن جالعاس مۇرتازانىڭ موينىنا ارتىلعان جۇكتىڭ جەڭىل ەمەستىگىن باعامداۋعا بولادى.
جامبىل وبلىسى
