سۋرەتتەردى تۇسىرگەن – ەرلان ومار, «EQ»
شىنىندا دا, جول-كولىك وقيعاسى سالدارىنان باقيلىق بولعان ازاماتتاردىڭ سانى جىل وتكەن سايىن ارتىپ بارادى. ەرەجە بۇزعان جۇرگىزۋشىلەردىڭ كەسىرىنەن تالاي ادام ومىرمەن قوش ايتىسىپ, ونداعان وتباسى تىرەگىنەن ايىرىلدى. جامبىلدىق پوليتسيا قىزمەتكەرلەرى ءار ونىنشى جول-كولىك وقيعاسى جۇرگىزۋشىلەردىڭ كولىك ءرۋلىن باسقارۋ كەزىندە ۇيىقتاپ كەتۋى سالدارىنان بولاتىنىن ايتىپ وتىر.
اۆتوكولىك جۇرگىزۋشىلەرىن بىلاي قويعاندا, موپەد, سكۋتەر جانە ساموكات تىزگىندەگەن ازاماتتار دا جول قوزعالىسى ەرەجەسىن ورەسكەل بۇزىپ جاتىر. دەرەككە كوز جۇگىرتسەك, موپەد تىزگىندەگەن تۇرعىنداردىڭ قاتىسۋىمەن بولعان جول-كولىك وقيعاسى سالدارىنان ءبىر ادام قازا تاۋىپتى. وزەكتى ورتەيتىن وكىنىش تە وسى.
«رەيد بارىسىندا وبلىس ورتالىعىندا پوليتسيا قىزمەتكەرلەرىنىڭ قاتىسۋىمەن 87 موپەد پەن سكۋتەر جۇرگىزۋشىسى اكىمشىلىك جاۋاپكەرشىلىككە تارتىلىپ, 45 موتوكولىك ايىپتۇراققا قويىلدى. ءبىر سوزبەن ايتقاندا, جول قوزعالىسى ەرەجەسىن ورەسكەل بۇزاتىن جاس تا, جاسامىس تا ازايماي تۇر. كولىكتىڭ وسى ءبىر ءتۇرىن كوبىنە
16 جاستاعى كامەلەتكە تولماعان جاسوسپىرىمدەر پايدالاناتىنىن ايتا كەتكەن ءجون. ولاردىڭ اتا-انالارى اكىمشىلىك جاۋاپكەرشىلىككە تارتىلدى, پروفيلاكتيكالىق اڭگىمەلەر جۇرگىزىلدى», دەيدى وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى قۇرمەت ماجىكەنوۆ.
پوليتسيا دەپارتامەنتى وكىلى كەلتىرگەن دەرەككە سۇيەنسەك, جىل باسىنان بەرى موتوكولىكتەردىڭ قاتىسۋىمەن تىركەلگەن جول-كولىك وقيعاسىنىڭ سانى ەداۋىر ارتقان. ال موپەد جۇرگىزۋشىلەرىنىڭ قاتىسۋىمەن تىركەلگەن جول-كولىك وقيعاسىنىڭ سانى 11-گە جەتكەن ەكەن. سالدارىنان ءبىر ادام قازا بولسا, ون ءۇش ادام ءتۇرلى دارەجەدە جاراقات الىپتى.
«موپەد جانە سكۋتەر جۇرگىزگەن بالالاردىڭ قاتىسۋىمەن 10 جول-كولىك وقيعاسى تىركەلىپ وتىر. سالدارىنان ءبىر بالا ومىرمەن قوش ايتىسسا, توعىز بالا جاراقات العان. ماسەلەن, تاياۋدا عانا كامەلەت جاسىنا تولماعان سكۋتەر جۇرگىزۋشىسى قارسى باعىتتاعى قوزعالىس جولاعىنا شىعىپ, «Range Rover» ماركالى اۆتوكولىكپەن سوقتىعىستى. جول-كولىك وقيعاسى سالدارىنان سكۋتەر جۇرگىزۋشىسى وقيعا ورنىندا قايتىس بولدى. ارينە, مۇنداي وكىنىشتى جاعدايلار كىمدى دە بولسا ويلاندىرسا دەگەن تىلەك بار», دەيدى ماسەلەگە جان-جاقتى توقتالعان ق.ماجىكەنوۆ.
پوليتسيا دەپارتامەنتى باستىعىنىڭ ءبىرىنشى ورىنباسارىنىڭ ايتۋىنشا, اتا-انالار بالالارىنا قىمبات سىيلىقتى تارتۋ ەتكەنىمەن, ونىڭ ارتى نەمەن اياقتالاتىنىنا نازار اۋدارمايدى. ال بالالار جول قوزعالىسى ەرەجەسىن بىلمەيدى. وسىنىڭ كەسىرىنەن جاسوسپىرىمدەردىڭ قاتىسۋىمەن بولاتىن قايعىلى وقيعالار سانى كەمىمەي وتىر.
«كوبىنە جاسوسپىرىمدەر جول ەرەجەسىن مۇلدەم بىلمەي جاتىپ كولىك تىزگىندەيدى. ەڭ وكىنىشتىسى دە وسى بولىپ تۇر. اتا-انالار بالاسىنا قىمبات سىيلىق سىيلاۋعا قۇشتار بولعانىمەن, ونىڭ سالدارى تۋرالى ويلاي بەرمەيدى. جاسوسپىرىمدەردىڭ قاۋىپسىزدىگىنە باس اۋىرتپايتىنى باستى ءارى وزەكتى ماسەلەگە اينالدى. ۇلكەندەر سكۋتەر, موپەد ءتىپتى ۆەلوسيپەد تە كولىك قۇرالدارىنا جاتاتىنىن ۇمىتپاعانى ءجون. كەيدە وسى كولىك قۇرالدارىنىڭ قاتىسۋىمەن بولعان اپاتتاردىڭ سالدارى قايعىلى جاعدايعا اكەلەتىنىن قاپەردەن شىعارىپ الامىز. قىسقاسى, نەمقۇرايدىلىقتىڭ سوڭى ورنى تولماس وكىنىشكە اپارىپ جاتىر. مۇنداي ماسەلەنىڭ بولماۋىنا بارلىق تاراپ مۇددەلى بولۋعا ءتيىس.
ءبىز موتوكولىك جۇرگىزۋشىلەرى جاۋاپكەرشىلىك جۇگىن سەزىنسە دەيمىز. قانداي دا ءبىر كولىكتى تىزگىندەگەن ادام جول قوزعالىسى ەرەجەسىن تولىق بىلگەنى ابزال. سوندا عانا قايعىلى جاعدايلاردىڭ الدىن الاتىن مۇمكىندىك تۋماق. كامەلەت جاسىنا تولماعان بالالارعا موتوكولىك اپەرگەن اتا-انالار ماسەلەنىڭ بايىبىنا تەرەڭىنەن ۇڭىلگەنى ابزال. ءتىپتى بالا 16 جاسقا تولعانعا دەيىن وعان موپەد پەن سكۋتەر ساتىپ اپەرۋدىڭ ەشقانداي قيسىنى جوق. جولاۋشى رەتىندە دە وسى ساناتتاعى كولىكپەن جۇرۋىنە رۇقسات بەرمەسە دەگەن تىلەگىمىز بار. اتا-انالار ەڭ ءبىرىنشى كەزەكتە ءجاسوسپىرىمنىڭ قاۋىپسىزدىگىنە نازار اۋدارۋى قاجەت. ويتكەنى ءجاسوسپىرىم – ءبىر وتباسىنىڭ عانا ەمەس, ەلىنىڭ دە ءۇمىتى», دەيدى ق.ماجىكەنوۆ.
البەتتە, جاسوسپىرىمدەردىڭ قاتىسۋىمەن بولاتىن جول-كولىك وقيعاسى سانىنىڭ ارتا تۇسكەنى كىمدى دە بولسا ويلاندىرماي قويمايدى. ءبىر وتباسىنىڭ ءۇمىتى مەن ەرتەڭى بولار ورىمدەي جاستىڭ جول اپاتى سالدارىنان باقيعا اتتانۋى – تراگەديا. بۇل وتكىر ماسەلەمەن قوعام بولىپ كۇرەسكەن ءجون.
جامبىل وبلىسى
