«اۋىل-ايماقتى دامىتۋ ءۇشىن شاعىن شارۋاشىلىقتاردى قولداۋ وتە ماڭىزدى. «اۋىل اماناتى» باعدارلاماسىنىڭ ەلگە قاجەت ەكەنى ايقىن كورىندى. ونىڭ كەلەسى كەزەڭىندە جەڭىلدەتىلگەن نەسيە بەرۋمەن شەكتەلىپ قالماۋ كەرەك. جەكە قوسالقى شارۋاشىلىق يەلەرى ءوزارا بىرىگۋى قاجەت. وسىعان قاجەتتى جاعداي جاسالۋعا ءتيىس» دەگەن قاسىم-جومارت توقاەۆتىڭ تاپسىرماسىنان كەيىن وڭىرلەردە جۇمىس شيراي ءتۇستى.
جامبىل وبلىسىندا «اۋىل اماناتى» جوباسى اياسىندا جاڭادان قۇرىلعان اۋىل شارۋاشىلىعى كووپەراتيۆتەرىنە سۋ جاڭا تەحنيكالار تابىستالدى. بايزاق اۋدانىنداعى «BNK GROUP» جشس القابىندا ۇيىمداستىرىلعان ءىس-شاراعا وبلىس باسشىسىنىڭ ورىنباسارى قاناتبەك مادىبەك قاتىسىپ, وڭىردەگى 10 اۋداننان كەلگەن 15 كووپەراتيۆ توراعاسىنا 55 دانا ءتۇرلى اۋىل شارۋاشىلىعى تەحنيكاسىن سالتاناتتى جاعدايدا تابىستاپ, جۇمىستارىنا تابىس تىلەدى.
«سالادا اتقارىلىپ جاتقان جۇمىس از ەمەس. «اۋىل اماناتى» جوباسى اياسىندا بيىل وڭىرىمىزگە 24 ميلليارد تەڭگە قارجى قاراستىرىلىپ, 33 اۋىل شارۋاشىلىعى كووپەراتيۆى قۇرىلدى. كووپەراتيۆتەرگە اۋىل شارۋاشىلىعى تەحنيكاسىن الۋعا جەرگىلىكتى بيۋدجەتتەن 1 ميلليارد تەڭگە بولىنسە, 2024 جىلى 2,3 ميلليارد تەڭگە قارجى قاراستىرىلماق.
بۇل, ارينە, قۇپتارلىق قادام ەكەنى تۇسىنىكتى. قولعا الىنعان جۇمىستىڭ ناتيجەسىندە مەملەكەت باسشىسى قاسىم-جومارت توقاەۆتىڭ اۋىل شارۋاشىلىعى تەحنيكالارى پاركىن 10 پايىزعا جاڭارتۋ تاپسىرماسىن ورىنداۋعا مول مۇمكىندىك تۋىپ وتىر. شارۋالارعا تابىستالىپ جاتقان جاڭا تراكتورلار – سونىڭ ءبىر كورىنىسى.
الىنعان تەحنيكالاردىڭ جالپى قۇنى 803 ميلليون تەڭگەنى قۇراپ وتىر. ونىڭ بەلگىلى ءبىر بولىگى مەملەكەت تاراپىنان سۋبسيديالاناتىنىن دا ايتا كەتكەن ءجون. ءبىز اتقارىلعان ىسپەن شەكتەلمەي, تۇرعىنداردىڭ تابىسىن ارتتىرۋ ءۇشىن جوبا اياسىندا ءوندىرىس ورىندارىن قۇرۋىمىز قاجەت. قازىرگى كەزدە سول باعىتتا جۇمىستانىپ جاتىرمىز. ارينە, قولعا الىنعان جوبالاردىڭ كوپ كۇتتىرمەي ناتيجە بەرەتىنى ءسوزسىز. بۇل ءوز كەزەگىندە 2025 جىلعا دەيىن اۋىل حالقىنىڭ تابىسى مەن ءومىر ءسۇرۋ دەڭگەيىن ارتتىرىپ قانا قويماي, اگروكەشەندى دامىتۋعا وڭ اسەر ەتەتىنى داۋسىز.
وڭىرىمىزدە اگروقۇرىلىمدارعا قىزمەت كورسەتەتىن سەرۆيس ورتالىعى اشىلىپ وتىر. الداعى ۋاقىتتا جۇمىلعان جۇدىرىقتاي بىرلەسە جۇمىس ىستەپ, سالانىڭ دامۋىنا ۇلەس قوسادى دەگەن سەنىم زور. ويتكەنى ءوزارا بىرلەسە جۇمىس ىستەگەندە عانا اتقارىلعان جۇمىس ناتيجەلى بولادى», دەيدى وبلىس اكىمىنىڭ ورىنباسارى قاناتبەك مادىبەك.
ءىس-شارا بارىسىندا ءار اۋداننان كەلگەن كووپەراتيۆ توراعالارى «لوۆول», «زۋميليون», «يۋتو», «متز بەلارۋس» ماركالى سۋ جاڭا تراكتورلارعا يە بولدى. دەرەكتەرگە سەنسەك, كووپەراتيۆتەرگە بەرىلگەن تەحنيكانىڭ جالپى قۇنىنىڭ 50 پايىزى مەملەكەت تاراپىنان سۋبسيديالانادى ەكەن. بۇل, ارينە, ولار ءۇشىن وتە ءتيىمدى.
«جالپى العاندا وبلىس بويىنشا اگروپاركتى جاڭارتۋعا ايرىقشا دەن قويىپ وتىرمىز. جوسپارعا سايكەس 15 پايىزعا جاڭارتىپ, 1 885 بىرلىك اۋىل شارۋاشىلىعى تەحنيكاسىن ساتىپ الۋ كوزدەلگەن. بۇگىنگى تاڭدا بارلىعى 1 283 تەحنيكا ساتىپ الىندى. اگروپارك 10,2 پايىزعا جاڭاردى», دەيدى ق. مادىبەك.
جامبىل وبلىسى
