قوستاناي وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە, الاياقتىق تۋرالى قۇقىق قورعاۋ ورگانىنا جەرگىلىكتى تۇرعىن ارىزدانعان. ول قازاننىڭ 21-ءى كۇنى ەت ساتۋ تۋرالى حابارلاندىرۋلار جاريالاناتىن WhatsApp توبىنا كىرگەنىن جەتكىزدى.
توپ اكىمشىسى ونىڭ قازىرگى تاڭدا تارتىلعان ەت ساتىپ الۋ تۋرالى ءوتىنىشى ورىندالمايتىنىن ايتقان. ويتكەنى, ەت ءبىتىپ قالعان.
كەيىنىرەك وعان بەيتانىس نومىردەن تۋرالعان ەتتى توپتا ۇسىنىلعاننان دا تومەن باعاعا ساتىپ الۋعا بولاتىنى جايىندا حابارلاما تۇسەدى. بويجەتكەن كورسەتىلگەن نومىرگە – 13 مىڭ تەڭگە سالىپ جىبەرگەن, بىراق وزىنە تيەسىلى ءونىمدى الا الماعان.
اقشاسىنان ايىرىلعان جابىرلەنۋشى پوليتسياعا حابارلاسۋدى ۇيعارادى. اتالعان دەرەك نەگىزىندە قر قىلمىستىق كودەكسىنىڭ 190-بابى «الاياقتىق» بويىنشا سوتقا دەيىنگى تەرگەۋ باستالىپ, قاجەتتى ساراپتاما جۇمىستارى جۇرگىزىلۋدە.
