جاتتىعۋ كەزىندە ءبىر ءجاسوسپىرىمنىڭ اياعى ەكىنشىسىنىڭ باسىنا ءتيىپ, بالانىڭ وڭ جاق بەتى ىستەمەي قالعان.
ايجان سەيىتبەكوۆا – ەكىنشى توپتاعى مۇگەدەك. جالعىزباستى انا. اعجان - ونىڭ جالعىز ۇلى. ءجاسوسپىرىم سپورتتى جاقسى كورەدى. بۇعان دەيىن قالالىق دەڭگەيدەگى جارىستارعا قاتىسىپ, جۇلدە يەلەنگەن. ايجان جاتتىعۋدان قالماي باراتىن بالاسىنىڭ ءبىر كۇندە مۇگەدەككە اينالعانىن ايتىپ قىنجىلادى.
"باس سۇيەگىن كومپيۋتەردەن كورسەتتى. وڭ جاق بەتى مايدالانىپ كەتكەن. سول سۇيەگىن الىپ تاستاپ, پولنىي پلاستيكا قويامىز دەيدى. كوزدى تىرەپ تۇرۋ ءۇشىن. باسقالاي مۇمكىن ەمەس. بالاعا سولاي عانا كومەكتەسە الامىز, - دەيدى. ال, سپورت شە دەسەم, ودان شەتتەۋ بولادى, 1-2 جىل قاتىسپايدى. ال پلاستيك ءومىر باقيعا قالادى", دەيدى اعجانىڭ اناسى ايجان سەيىتبەكوۆا.
«پالۋان» ەرەجەسىز جەكپە-جەك كەشەنىندە 100-دەن اسا بالا سپورت ۇيىرمەسىنە قاتىسادى. بالالار سەنبى كۇنى جاتتىعۋعا جينالعان. جاتتىقتىرۋشى ولاردى جۇپ-جۇپقا ءبولىپ, ءادىس-تاسىلدەردى كورسەتەدى. ول كەزدە اعجان مەن جانىنداعى دوسىنىڭ باسىندا «شلەم» بولماعان. ترەنەر ەرەجەلەردىڭ ساقتالماعانىن كورىپ ەكەۋىنە ەسكەرتۋ جاساپ, «تەبۋگە بولمايدى» دەپ شارت قويادى.
"بىراق ولار مەنىڭ ءسوزىمدى تىڭدامادى.
بۇل كەزدە مەن باسقا بالالارمەن جۇمىس ىستەپ جاتقانمىن. جاتتىعۋ كەزىندە بولسىن, جارىستا بولسىن, بىزدە جاراقات بولادى. سپورت بولعاننان كەيىن ونسىز بولمايدى. بىراق مەن ءار جاراقاتقا, دەنەنىڭ كوگەرۋىنە جەدەل جاردەم شاقىرمايمىن عوي. تەك ءبىر جەرى سىنسا, شىعىپ كەتسە جۇگىنەمىن. سوسىن ۇيىنە دەمالۋعا جىبەردىم. مەن ساباق باستالار الدىندا بالالارعا ەسكەرتتىم. ولار تىڭدامادى", دەيدى جاتتىقتىرۋشى سامات راحمەتوۆ.
قازىر بالانىڭ جاعدايى بىرقالىپتى. ءجاسوسپىرىمنىڭ وڭ جاق بەتىنە زاقىم كەلگەن. جاقىندا وپەراتسيا جاسالادى. وقيعادان كەيىن جەتكىنشەكتىڭ اناسى پوليتسياعا ارىزدانعان.
"جاتتىعۋ كەزىندە جاتتىعۋشىلاردىڭ ءبىرى قارسىلاسىنىڭ كوز ايماعىنان تەپكەنى انىقتالدى. اتالعان فاكتى بويىنشا سوت-مەديتسينالىق ساراپتاما تاعايىندالدى. قورىتىندىسى بويىنشا قر قولدانىستاعى زاڭناماسىنا سايكەس شەشىم قابىلدانادى", دەدى استانا قالالىق پد ءباسپاسوز قىزمەتىنەن.
