تاراپتار ەنەرگەتيكا سالاسىنداعى ءوزارا ءىس-قيمىلدىڭ وزەكتى باعىتتارىن, اتاپ ايتقاندا, جاڭارتىلاتىن كوزدەردى دامىتۋدى, جاڭا ينۆەستيتسيالىق جوبالاردى ىسكە اسىرۋ جانە ەكى ەل اراسىنداعى تىكەلەي اۋە قاتىناسىن قالپىنا كەلتىرۋ ماسەلەلەرىن قارادى.
سونداي-اق ترانزيتتىك-كولىك سالاسىنداعى, ونىڭ ىشىندە ترانسكاسپي حالىقارالىق كولىك باعىتىن ترانسەۋروپالىق كولىك جەلىسىمەن بايلانىستىرۋ جونىندەگى قادامدار دا تالقىلاندى.
ءاليحان سمايىلوۆ ماجارستان قازاقستاننىڭ ەۋروپا وداعىنداعى ماڭىزدى ساۋدا-ەكونوميكالىق سەرىكتەسى ەكەنىن اتاپ ءوتتى. وتكەن جىلى ەكى ەل اراسىنداعى تاۋار اينالىمى 24%-عا ارتىپ, 172 ملن دوللارعا جەتتى.
ء«بىز تاۋار اينالىمىن ودان ءارى ارتتىرۋ ءۇشىن ايتارلىقتاي الەۋەت بار ەكەنىن كورىپ وتىرمىز جانە قازاقستاندىق ءونىمنىڭ ماجارستانعا ەكسپورتىن 95 تاۋارلىق پوزيتسيا بويىنشا شامامەن 700 ملن دوللارعا ارتتىرۋعا دايىنبىز», دەدى پرەمەر-مينيستر.
ونىڭ ايتۋىنشا, ينۆەستيتسيالىق ىنتىماقتاستىق باعىتىندا جاڭا مۇمكىندىكتەر اشىلدى. ماجارستان 2005 جىلدان بەرى قازاقستانعا 330 ملن دوللار شاماسىندا تىكەلەي ينۆەستيتسيا سالدى. تەك 2021-2022 جىلدارى شامامەن 75 ملن دوللارعا جۋىق ينۆەستيتسيا تارتىلدى. بۇل بارلىق ينۆەستيتسيانىڭ جالپى كولەمىنىڭ شامامەن شيرەك بولىگىن قۇرايدى.
«بۇگىندە ءبىزدىڭ ينۆەستيتسيالىق قارىم-قاتىناسىمىز جاڭا جوبالارمەن تولىعىپ كەلەدى. ماجارستاندىق «MOL» كومپانياسىمەن بىرلەسىپ, اسا ءىرى گاز كوندەنساتىن شىعاراتىن «روجكوۆسكوە» كەن ورنىن ىسكە قوسۋ جوسپارلانىپ وتىر. ءبىز ماجارستاندىق بيزنەستى ينۆەستيتسيالىق جوبالاردى بىرلەسىپ ىسكە اسىرۋعا شاقىرامىز», دەدى ءاليحان سمايىلوۆ.
سونىمەن قاتار ۇكىمەت باسشىسى مادەني-گۋمانيتارلىق سالاداعى قارىم-قاتىناستاردىڭ جوعارى دەڭگەيىن اتاپ ءوتتى. ماسەلەن, ماجارستاننىڭ ۇلتتىق اقىنى شاندور پەتيوفيدىڭ 200 جىلدىعىن اتاپ ءوتۋ اياسىندا استاناداعى كوشەگە اقىن ەسىمىن بەرۋ تۋرالى شەشىم قابىلداندى.
سونداي-اق ول ءبىلىم بەرۋ سالاسىنداعى ىنتىماقتاستىقتىڭ ايقىن مىسالى رەتىندە ءوزارا ستۋدەنتتەرمەن الماسۋ باعدارلاماسىنا 10 جىل تولىپ وتىرعانىن اتاپ ءوتتى. بۇگىنگى تاڭدا 1000-نان استام قازاقستاندىق ستۋدەنت ماجارستاندا ءبىلىم الۋدا, بۇل اتالعان باعدارلامانىڭ سۇرانىسقا يە ەكەنىن كورسەتەدى.
«ەلدەرىمىز اراسىنداعى گرانت ۇسىنۋ جونىندەگى ىنتىماقتاستىق بۇگىن قول قويىلعان ءوزارا تۇسىنىستىك تۋرالى مەموراندۋم اياسىندا جالعاسىن تابادى. بۇل ءبىلىم بەرۋ سالاسىنداعى ءبىزدىڭ ءوزارا بايلانىستاردى جالعاستىرۋعا دەگەن ۇمتىلىسىمىزدى ايقىندايدى. جالپى, ءبىز ارى قاراي دا ساۋدا-ەكونوميكالىق, سونداي-اق گۋمانيتارلىق ىنتىماقتاستىقتى دامىتۋعا قولايلى جاعداي جاساۋعا دايىنبىز», دەدى ءاليحان سمايىلوۆ.
ۆيكتور وربان ءوز كەزەگىندە قازاقستان مەن ماجارستاننىڭ ساياسي بايلانىستارى جاقسى دامىعانىن, سوندىقتان ەندى ەكونوميكالىق بايلانىستاردى تەرەڭدەتۋ مەن كەڭەيتۋگە كوبىرەك كوڭىل ءبولۋ كەرەكتىگىن ايتتى.
«سىزدەردىڭ پرەزيدەنتتەرىڭىز مۇمكىندىگىنشە بىرلەسىپ جۇزەگە اسىرۋعا بولاتىن كوپتەگەن جوبانى قاراستىرۋىمىز كەرەك دەگەن ۇسىنىس جاسادى. تاجىريبە كورسەتكەندەي, ءبىر-بىرىنەن شالعاي جاتقان مەملەكەتتەر قانداي دا ءبىر فلاگماندىق جوبا ارقىلى ەكونوميكاعا سەرپىلىس جاساي الادى. بۇل باسقا دا شاعىن كاسىپورىنداردى ىنتىماقتاستىققا تارتۋعا كومەكتەسەدى. ەندىگى مىندەت – قانداي جوبالاردى جۇزەگە اسىرا الاتىنىمىزدى انىقتاۋ. ءبىز اتالعان باعىتتا قارقىندى جۇمىس ىستەي الامىز دەپ ۇمىتتەنەمىز», دەدى ماجارستان پرەمەر-ءمينيسترى.
