يلنار مەن يلدار – پاۆلودار قالاسىنىڭ تۋماسى. دارىگەرلەر بالالاردىڭ تسەرەبرالدى سال اۋرۋىنا شالدىققانىن جاسقا تولماي جاتىپ انىقتاعان. تاعدىردىڭ جازۋىنا نە شارا, باستىسى, اعايىندىلار – بىرىنە-ءبىرى قورعان.
قالاداعى تەحنيكا جوندەيتىن ساۋدا نۇكتەلەرىنىڭ بىرىنەن شاعىن ورىن سايلاعان كاسىپكەرلەرگە كەلىمدى-كەتىمدى ادام كوپ. ولاردىڭ باسىم كوپشىلىگى ايتنياكوۆتاردى بۇرىننان تانيدى ەكەن. يلنار مەن يلدار پاۆلوداردان ەلورداعا 2017 جىلى قونىس اۋدارىپتى. بوتەن قالاعا كەلگەن سوڭ, ءا دەگەننەن جۇمىس ىزدەۋگە كىرىسكەن. از عانا ۋاقىتتا ءبىر ەمەس, بىرنەشە مارتە جۇمىس اۋىستىرىپتى. قالاي اۋىستىرماسىن, 70 مىڭ تەڭگە جالاقى 120 مىڭ تەڭگەگە جالداعان پاتەردىڭ اقىسىن وتەۋگە دە جەتپەيدى.
ء«وزىم ۇيلەنگەنمىن, ەكى بالام بار. ايەلىم زاعيپ. ۇيدە ءوزىم تابىس تابامىن. يلدار مەن انام قازىر بىزدەن بولەك تۇرادى. العاش استاناعا كەلگەنىمدە بىرنەشە كومپانيادا پروگرامميست بولىپ ەڭبەك ەتتىم. بالا كەزدەن تەحنيكاعا اۋەس بولعان سوڭ, كومپيۋتەرلىك باعدارلامالاردا جۇمىس ىستەۋ اسا قيىندىق تۋدىرمادى. نەگىزى, پاۆلوداردا بالا جاستان تەحنيكالاردى شۇقىلاپ ءوستىم. ۋاقىت وتە كومپيۋتەر جوندەي باستادىم. باس قالاعا كوشىپ كەلگەنىمىزدە دە كومپيۋتەر جوندەيتىن ورتالىق اشۋ ويدا بولعان. بىراق بىردەن اشۋ مۇمكىن بولمادى. ءىس قاراجاتقا كەلىپ تىرەلدى. سويتە تۇرا اراعا جىل سالىپ, باۋىرىمىز ەكەۋمىز كومپيۋتەر جوندەيتىن ورىندى جالعا الىپ, ىسكە كىرىسىپ كەتتىك. سودان بەرى بىرنەشە جىل وتە شىقتى. شارۋامىز شالقىپ, شارىقتاپ كەتتىك دەپ ايتا المايمىز. سايلاعان ورنىمىزدىڭ كولەمى كىشى بوعان سوڭ, تەك نوۋتبۋك جوندەپ ءجۇرمىز. ءيا, ون شاقتى رەت جۇمىس ورنىمىزدى اۋىستىرىپ ءجۇرىپ, تۇراقتى تۇتىنۋشى جيناپ ۇلگەرگەنىمىز راس. الايدا ءالى كۇنگە دەيىن قالادان جايلى ورىن تابا الماي سابىلىپ ءجۇرمىز», دەيدى يلنار.
كاسىپكەرلەر باستاعان ءىس بىرنەشە جىل بالەندەي ناتيجە بەرمەسە دە, ورتا جولدا قالماي, جالعاستىرۋعا نيەتتەنىپ وتىر. سەبەبى ولار كومپيۋتەرىن ءبىر جوندەتكەن تۇتىنۋشىنىڭ, كومەك قاجەت بولسا, قايتا كەلەتىنىن بىلەدى. قىزمەت كورسەتۋ سالاسىنداعى جۇمىستىڭ جاي-جاپسارىنان حابارى بار. تاباندى جاندار نيەتىنە, پەيىلىنە قاراي جۋىردا ءۇيلى بولىپتى. ءبىر بولمەلى پاتەردى قايىرىمدى جاندار ۇسىنعان. ول ول ما, تاياۋدا ايتنياكوۆتار جەرگىلىكتى اكىمدىكتەن تاعى ءبىر قۋانىشتى حابار ەستىگەن. ونىسى – اكىمدىكتەگىلەردىڭ كاسىپكەرلەرگە قولايلى ورىن سايلاپ بەرەمىز دەگەن جاۋابى. يلنار مەن يلدار سول كۇندى اسىعا كۇتىپ جۇرگەنىن ايتتى.
«بىزگە ۇسىنىپ وتىرعان نىساننىڭ اۋدانى – 120 شارشى مەتر. كەڭ ءارى قولايلى. قولايلى دەگەنىم, ەندى ءبىز العا قويعان باسقا دا جوسپارلارىمىزدى ىسكە اسىرا الامىز. مىسالى, بۇرىن كاسىپتى باستاعانىمدا ءوزىم سەكىلدى مۇگەدەكتىگى بار جانداردى جۇمىسقا شاقىرۋدى ويلاعانمىن. ولارعا قولىمنان كەلەتىن ءىستى ۇيرەتىپ, بارىنشا قولداۋ كورسەتۋگە نيەتتەندىم. بالكىم, سول ارمانىم ەندى ورىندالىپ قالار دەپ ۇمىتتەنەمىن. مەنىڭشە, مۇگەدەكتىگى بار جاندار ۇيدە وتىرماي, قوعامعا بەيىمدەلۋى كەرەك. ولارعا جايلى ورتا قالىپتاستىرۋعا قازىر مەملەكەت تە ارالاسىپ جاتىر عوي. ەرەكشە قابىلەتتى جاندار جىگەرلەنسە, ەڭبەك ەتسە, جاقسى. سوندا ءومىردىڭ ءمانىن جوعالتپايدى», دەيدى كاسىپكەر.
ورايلى ءساتتى پايدالانىپ, يلنارعا كاسىپ باستاۋ قيىن با دەگەن ساۋال قويدىق. ول توسىلماي, ءوز ءىسى جايىندا ايتىپ بەردى.
«كاسىپتە باسەكەلەستەر كوپ بولادى» دەپ بۇرىننان ەستيتىنمىن. ال شىن مانىسىندە ءبىز تاڭداعان باعىتتا دا باسەكە جوعارى ەكەن. ايتكەنمەن, ساپالى قىزمەت كورسەتەتىندەر ساۋساقپەن سانارلىق. مىسالى, ءبىز قايتا جوندەۋ ءتيىمسىز نوۋتبۋكتەردى بىردەن قابىلداماي, ەگەسىنە ەسكەرتەمىز. ەسكىنى ءجۇز جوندەگەننەن جاڭاسىن الۋدى ۇسىناتىن كەزدەر دە بولىپ تۇرادى. ويتكەنى جوندەۋگە كەتەتىن شىعىن تەحنيكانىڭ نارىقتاعى قۇنىنىڭ جارتىسىنا تەڭ بولۋى مۇمكىن. ءبىز ءوز ءىسىمىزدى بىلەمىز عوي, ال تۇتىنۋشى ودان حابارسىز. سول ءبىردى-ەكىلى تاپسىرىستان پايدا تاپپاسپىز. بىراق تۇراقتى تۇتىنۋشىدان ايىرىلمايمىز. بۇزىلعان تەحنيكانى جوندەۋگە اۋەس جاستارعا ايتارىم, بۇل كاسىپ جىلدان-جىلعا قالىپ بارا جاتىر. تۇتىنۋشىلار ەسكى نوۋتبۋكتى جوندەگەننەن نەسيەگە جاڭاسىن الۋدى دۇرىس كورەدى. ءبىر جاعى ولاردىڭ قادامى دا دۇرىس. ول دا ءتيىمدى. ازىرشە ءبىز بارىنشا وسى باعىتتا ەڭبەك ەتۋگە تىرىسىپ ءجۇرمىز. كەي-كەيدە اشىناسىڭ. ەر-ازامات بولعاسىن شىدايسىڭ. ەل قاتارلى ءومىر سۇرۋگە تىرىسىپ ءجۇرمىز», دەپ ءسوزىن تۇيىندەدى يلنار.
يلنار مەن يلدار ءبىر جىلدارى سمارتفونداردى جوندەۋگە بەكىنىپتى. الايدا دەنساۋلىعىنا بايلانىستى تەلەفوننىڭ كىشىگىرىم بولشەكتەرىن قالپىنا كەلتىرۋ قيىننىڭ-قيىنى ەكەنىن تۇيسىنگەن. سمارتفوننىڭ قىر-سىرىن بىلگەنمەن, ءىس جۇزىندە قولدان كەلمەيتىن شارۋاعا بەل بايلاۋعا جۇرەكسىنگەن. ء«اربىر ءىستى تياناقتى تىندىرماعان سوڭ ءبارى بەكەر», دەيدى كاسىپكەردىڭ ءوزى. ءيا, ءاربىر تۇتىنۋشىنىڭ الاقانىنا سالىپ الىپ كەلگەن اماناتىن اڭداماي ءبۇلدىرىپ الۋ دەگەندى ويلاۋدىڭ ءوزى قيىن.
اڭگىمە بارىسىندا يلنار كاسىپتى كەڭەيتۋگە بەل بايلاپ وتىرعاندارىن ايتقان ەدى. تالاپتى اعايىندىلار ازىرگە نوۋتبۋكپەن قوسا تۇرمىستىق تەحنيكالاردى جوندەۋگە كىرىسۋدى كوزدەپ وتىر. وزدەرى ويلاعانداي, مۇگەدەكتىگى بار ازاماتتاردى جۇمىسقا شاقىرماق نيەتتە. كەيىن, ءىسى العا باسىپ جاتسا, شاعىن دا بولسا ەلەكترونيكا دۇكەنىن اشۋ ويدا بار ەكەن. ال ازىرشە كاسىپكەرلەر جاقىن ارادا بەرىلەدى دەگەن نىساندى اسىعا كۇتىپ ءجۇر.
