دەپۋتات: كەدەيشىلىككە قارسى ءىس-قيمىل كوميسسياسى قاشان قۇرىلادى؟

«بيۋدجەتتە كەدەيشىلىكپەن كۇرەس ماسەلەسى ءالسىز قاراستىرىلعان. قازىر قازاقستاندا 1 ملن 16 مىڭ ادام رەسمي تۇردە كەدەي بولىپ تىركەلگەن. جوقشىلىقتىڭ ءوتىپ كەتكەنى سونشالىق ادامدار نان, ماكارون, ەت الۋ ءۇشىن نەسيە الۋعا ءماجبۇر», دەدى دەپۋتات.

دەپۋتاتتىڭ ايتۋىنشا, جاعدايى ناشار ازاماتتار ءۇشىن بولىنگەن 9 مىڭ گرانتپەن 1 ملن 16 مىڭ ادامدى قامتاماسىز ەتۋ مۇمكىن ەمەس.

«تورەلەردىڭ اسىرە بايۋى ءھام بۇقارا حالىقتىڭ جاپپاي كەدەيلەنۋ تەندەنتسياسى جالعاسىپ جاتىر, بۇل وتە قاۋىپتى. سوندىقتان كەدەيشىلىكتەن زارداپ شەگىپ وتىرعان ادامدارعا بيۋدجەتتە ارزانداتىلعان ميكرونەسيەلەر جەلىسىن ۇيىمداستىرىپ, بيزنەس-داعدى قالىپتاستىرىپ, اتالعان ساناتتاعى ازاماتتاردى ەكونوميكالىق اينالىمعا قوسۋ وتە ماڭىزدى. مىنە وسى ماسەلە بيۋدجەتتە قاراستىرىلماعان», دەدى ەرلان سايروۆ.

دەپۋتاتتىڭ سوزىنشە, حالىقتىڭ ءومىر ساپاسىن ارتتىرۋ قاجەت. سوندىقتان ۇكىمەت جانىنان كەدەيشىلىككە قارسى ۇلتتىق ءىس-قيمىل كوميسسياسىن قۇرىپ, حالىقتىڭ جاپپاي كەدەيشىلىك پروبلەماسىن شەشۋگە بيۋدجەتتى بۇرۋ قاجەت.

«كەدەيشىلىككە قارسى ءىس-قيمىل كوميسسياسى قاشان قۇرىلادى؟ بيۋدجەتتە كەدەي ازاماتتاردىڭ مۇددەسىن قاشان تولىققاندى قورعايمىز, الدە ءىستىڭ ناسىرعا شاپقانىن توسىپ وتىرمىز با؟», دەگەن سۇراق قويدى ءماجىلىس دەپۋتاتى.

وسى ورايدا «Amanat» فراكتسياسىنىڭ مۇشەسى, ءماجىلىس دەپۋتاتى ەرلان سايروۆتىڭ سۇراعىنا پرەمەر-ءمينيستردىڭ ورىنباسارى تامارا دۇيسەنوۆا جاۋاپ بەردى.

«تولىق كەلىسەمىن. شەشىمى بار. ۇكىمەتتىڭ جانىنان حالىقتىڭ تابىسىن ارتتىرۋ جونىندەگى جوبالىق وفيس قۇردىق, وعان ۇلتتىق ەكونوميكا مينيسترلىگى مەن اۋىل شارۋاشىلىعى مينيسترلىگىنىڭ, «Amanat» پارتياسىنىڭ وكىلدەرى جانە باسقا مەملەكەتتىك ورگانداردىڭ وكىلدەرى ەندى», دەدى ت.دۇيسەنوۆا.

تامارا دۇيسەنوۆانىڭ ايتۋىنشا, جاعدايى ناشار ازاماتتارعا ارنالعان 2,5 پايىزدىق نەسيە الۋ قاراستىرىلعان, ودان بولەك, جاستارعا ارنالعان ءدال سونداي 2,5 پايىزدىق نەسيە الۋ جوباسى بار.

«نەسيە جونىندە بيىل ءوزىمىزدىڭ ۇسىنىستارىمىزدى بەردىك, بيۋدجەتتىك كوميسسيا قابىلدادى. 2 مىڭ 258 اۋىلدىڭ جاعدايىن قاراپ شىقتىق. ءاربىر اۋىلداعى كەدەيشىلىك دەڭگەيى, جۇمىسپەن قامتۋ جانە ءاربىر اۋىلدىڭ قاي باعىتتا مامانداندىرىلعانى جونىندە قازىرگى ۋاقىتتا بارلىق ماعلۇماتتار كەلىپ ءتۇستى. ورتالىق وفيس سونى ناقتىلاپ جاتىر. ايدىڭ سوڭىندا ءماسليحات دەپۋتاتتارى مەن جەرگىلىكتى ورگانداردىڭ جانە وزدەرىنىزدىڭ قاتىسۋلارىنىزبەن ءبىز ءاربىر وبلىسقا بايلانىستى ناقتى ءىس-شارانى تالقىلايتىن بولامىز», دەدى ۆيتسە-مينيستر.