بۇل دەرەكتەر تۇركىستان وبلىسىندا بالىق شارۋاشىلىعىن دامىتۋ, جاس كاسىپكەرلەردى ىنتالاندىرۋ ماقساتىندا وتكەن «بالىققا ءومىر سىيلا» اتتى رەسپۋبليكالىق فورۋمدا كەلتىرىلدى. الماتى وبلىسىنىڭ «بالىق مەكتەپ» جشس, تۇركىستان وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى ۇيىمداستىرعان فورۋمعا 300-گە جۋىق وتاندىق بەلسەندى بيزنەس وكىلدەرى مەن كاسىپكەرلەر, ءتيىستى باسقارمالار مەن اۋدان, قالا اكىمدىكتەرىنىڭ قىزمەتكەرلەرى قاتىستى. فورۋمدا وبلىس اكىمىنىڭ ورىنباسارى ەرمەك كەنجەحان ۇلى ۇكىمەتتىڭ قاۋلىسىمەن 2030 جىلعا دەيىن ەلىمىز بويىنشا 270,0 مىڭ توننا تاۋارلى بالىق ءوسىرۋ باعدارلاماسى بەكىتىلگەنىن ەسكە سالدى. «مەملەكەت باسشىسى قاسىم-جومارت توقاەۆ حالىققا ارناعان جولداۋىندا ەلىمىزدە بالىق شارۋاشىلىعىن دامىتۋدىڭ ماڭىزدىلىعىنا توقتالىپ, ۇكىمەتكە ناقتى تاپسىرما جۇكتەگەن ەدى. پرەزيدەنت تاپسىرماسىنا سايكەس, سالانى دامىتۋدىڭ 2021-2030 جىلعا ارنالعان باعدارلاماسى قابىلدانىپ, جۇزەگە اسىرىلا باستادى. باعدارلاما اياسىندا 2030 جىلى وبلىستا بالىق ءوسىرۋ كولەمىن 20 مىڭ تونناعا جەتكىزۋ مەجەسى تۇر. بيىل وڭىردە 6 640 توننا تاۋارلى بالىق ءوندىرۋ كوزدەلىپ وتىر. بۇگىندە بۇل جوسپاردى ورىنداۋ باعىتىندا ناقتى جۇمىستار جۇرگىزىلىپ جاتىر», دەدى ەرمەك كەنجەحان ۇلى.
وڭىردە جەرگىلىكتى ماڭىزى بار 104 سۋ ايدىنى تىركەلگەن. ونىڭ 84-ءى تابيعات پايدالانۋشىلارعا بەكىتىلىپ بەرىلگەن. بالىق ءوسىرۋ سەكتورىندا 130-عا جۋىق شارۋاشىلىق جۇمىس ىستەپ وتىر. وبلىستىڭ اۋدان, قالا اكىمدىكتەرىندە بالىق شارۋاشىلىعىن دامىتۋدىڭ 2023-2025 جىلدارعا ارنالعان ءىس-شارا جوسپارى بەكىتىلىپ, 250-گە جۋىق بالىق ءوسىرۋ شارۋاشىلىعىن اشۋ جوسپارلانعان. فورۋم بارىسىندا بالىق شارۋاشىلىعى اسسوتسياتسياسىن قۇرۋ بويىنشا قارار قابىلدانىپ, سالاعا قاتىستى وزەكتى ماسەلەلەر تالقىلاندى. جاڭادان قۇرىلعان قاۋىمداستىق وبلىستاعى بالىق شارۋاشىلىعىمەن اينالىساتىن كاسىپكەرلەرگە جان-جاقتى كومەك كورسەتپەك. سونداي-اق فورۋم اياسىندا بالىق ونىمدەرىنىڭ جارمەڭكەسى ۇيىمداستىرىلىپ, بيزنەس وكىلدەرى مەن كاسىپكەرلەر ءوز ونىمدەرىن ۇسىندى, تاجىريبە الماستى. ساستوبە كولى مەن شىمكەنت قالاسىنىڭ اۋماعىندا ورنالاسقان بادام سۋ قويماسىنا 100 مىڭ دانا تۇقى بالىعىنىڭ شاباقتارى جىبەرىلدى.
ايتا كەتەيىك, 2022-2023 جىلدارى الماتى وبلىسىندا ورنالاسقان «بالىق مەكتەبىن» وبلىستىڭ 76 كاسىپكەرى بىتىرگەن. ال شاردارا اۋدانىنداعى «حاميت» اۋىل وندىرىستىك كووپەراتيۆىندە بالىق ءوسىرۋ بويىنشا 86 كاسىپكەر ءبىلىمىن جەتىلدىرگەن. قازىرگى تاڭدا كاسىپكەرلەر بالىق ءوسىرۋ شارۋاشىلىعىن قۇرۋعا قولداۋ كورسەتىپ ءجۇر.
تۇركىستان وبلىسى
