قىزىلشا – جىلدام تارالاتىن جۇقپالى اۋرۋلاردىڭ ءبىرى. العاشىندا اۋرۋدىڭ بەلگىلەرى كادىمگى تۇماۋعا ۇقساعانىمەن, ۋاقىت وتە كەلە بالالار دەرتتى اۋىرسىنۋى مۇمكىن. سوندىقتان دارىگەرلەر سىرقاتتىڭ بەلگىلەرىنە بەيقام قاراۋعا بولمايتىنىن ەسكەرتەدى.
دارىگەرلەردىڭ ايتۋىنشا, قىزىلشا جۇقتىرعان ناۋقاستاردىڭ باسىم كوپشىلىگى العاشىندا سۋىق تيگەن شىعار دەپ ويلاۋى مۇمكىن. سەبەبى جۇقپالى اۋرۋدىڭ العاشقى كەزەڭدەرىندە قىزۋ كوتەرىلىپ, جوتەل قىسۋى مۇمكىن. ودان كەيىن بورتپەلەر پايدا بولادى. بالالار قىزىلشامەن اۋىرماسىن دەسەك, وندا قىزىلشاعا قارسى ۆاكتسينا العانى ءلازىم. كۇنتىزبەگە سايكەس, بالا قىزىلشاعا قارسى ۆاكتسينانى 12 ايىندا الادى. كەيىن, قايتا ۆاكتسينالاۋعا 6 جاسىندا بارسا, بولادى. اتا-انالارعا ايتارىمىز, ەگەر بالادان قىزىلشا اۋرۋىنىڭ بەلگىلەرى بايقالسا, وندا «دارىگەردى ۇيگە شاقىرۋ» قىزمەتىنە جۇگىنگەن ابزال.
بىرەر كۇن بۇرىن وتكەن ءباسپاسوز ءماسليحاتىندا دەنساۋلىق ساقتاۋ ۆيتسە-ءمينيسترى ايجان ەسماعامبەتوۆا اعىمداعى ەپيدەميالىق جاعداي تۋرالى جان-جاقتى بايانداپ, جۇقپالى اۋرۋلاردىڭ ىشىندە قىزىلشانىڭ اسقىنىپ تۇرعانىن حابارلاعان ەدى.
– بۇگىندە ءجىتى رەسپيراتورلىق ۆيرۋستىق ينفەكتسيالار مەن تۇماۋدىڭ كەزەكتى ماۋسىمى باستالدى. ەلىمىزدە جىل سايىن تۇماۋ ۆيرۋسى قاراشا ايىنان باستالىپ, ءساۋىر ايىنىڭ ورتاسىنا دەيىن جالعاسادى. وسى جىلدىڭ قازان ايىندا رەسپۋبليكادا جرۆي-ءدىڭ 638 208 جاعدايى تىركەلگەن, اۋىرعان ادامداردىڭ 66%-ىن 14 جاسقا دەيىنگى بالالار قۇرايدى. وتكەن جىلدىڭ وسىنداي كەزەڭىمەن سالىستىرعاندا سىرقاتتانۋشىلىق 27%-عا تومەن. قىزىلشا اۋرۋى بويىنشا ەپيدەميالىق جاعداي كۇردەلى. اۋرۋدىڭ بۇل ءتۇرى ەلدىڭ بارلىق وڭىرىندە تىركەلدى. اسىرەسە, شىمكەنت, الماتى قالاسىندا, جامبىل, الماتى وبلىستارىندا كوبىرەك انىقتالىپ وتىر. سىرقاتتانعان بالالاردىڭ قىزىلشاعا قارسى ۆاكتسينا الماعانى دا بەلگىلى بولىپ جاتىر. قازىر ەلىمىزدە ۆاكتسينا الماعان بالالاردىڭ ۇلەسى 71%-دى قۇرايدى. بۇل رەتتە بالالاردىڭ 60%-ى ەكپەدەن باس تارتقان. ال 18%-ى مەديتسينالىق قارسى كورسەتىلىم بويىنشا ۆاكتسينا الماسا, 21%-ى – جاسىنا جەتپەگەن شاقالاقتار. قىزىلشاعا قاتىستى جاعدايدى تۇراقتاندىرۋ ماقساتىندا بىرنەشە ءىس-شارا جولعا قويىلدى. سونىڭ ىشىندە قىزىلشاعا قارسى جوسپارلى ۆاكتسينالاۋعا باسىمدىق بەرىپ وتىرمىز. 18 جاسقا دەيىنگى بالالاردى ۆاكتسينالاۋدان وتكىزۋ بويىنشا اقپاراتتىق ءتۇسىندىرۋ جۇمىستارى ۇزىلگەن جوق. ايتا كەتۋ كەرەك, قازىرگى ەپيدەميالىق جاعداي قىزىلشانىڭ 5 جاسقا دەيىنگى بالالاردىڭ اراسىندا كوپ تىركەلۋىمەن سيپاتتالادى. بۇل جالپى قىزىلشا جاعدايلارىنىڭ 65 پايىزىن قۇرايدى. قىزىلشا بويىنشا قولايسىز ەپيدەميالىق جاعدايدى ەسكەرە وتىرىپ, اتا-انالاردى بالالارىنا قىزىلشاعا قارسى ۆاكتسينا الۋعا شاقىرامىز. ەگەر ۆاكتسينا الماعان بولسا, تۇرعىلىقتى مەكەنجايى بويىنشا مەديتسينالىق ۇيىمدا ەكپە الۋ جونىندە شارالار قابىلداۋعا كەڭەس بەرەمىز, – دەيدى ا.ەسماعامبەتوۆا.
ۆيتسە-مينيستر دە اۋرۋدىڭ الدىن الۋدىڭ بىردەن-ءبىر جولى ۆاكتسينالاۋ ەكەنىن ەسكەرتتى. ەندىگى كەزدە قىزىلشانى تۇساۋلاۋ ءۇشىن 6 ايلىق بالالاردى, 2 جاستان 5 جاسقا دەيىنگى بالالاردى جانە مەديتسينا قىزمەتكەرلەرىن قوسىمشا ۆاكتسينالاۋ جوسپارلانىپتى. مىسالى, 6 ايدان 11 ايعا دەيىنگى بالالاردى قوسىمشا يممۋنداۋ 6 قاراشادان باستالادى ەكەن. ال جەلتوقساندا 5 جاسقا دەيىنگى بالالار قوسىمشا جاپپاي يممۋندالادى.
