كۇنى كەشە قويمانىڭ كاپسۋلاسىن سالۋ راسىمىنە پرەمەر-ءمينيستردىڭ ورىنباسارى سەرىك جۇمانعارين مەن تۇركىستان وبلىسىنىڭ اكىمى دارحان ساتىبالدى قاتىستى. وبلىسقا جۇمىس ساپارىمەن كەلگەن سەرىك جۇمانعارينگە ءوندىرىس سالاسىندا جۇزەگە اسىرىلىپ جاتقان جوبالار تانىستىرىلدى. بيىل وڭىردە ونەركاسىپ ءونىم كولەمى 681 ملرد تەڭگەنى قۇراپ, 4,7 پايىزعا ارتقان. وڭدەۋ ونەركاسىبىندە بيىل جالپى قۇنى 30 ملرد تەڭگەنى قۇرايتىن 20 جوبانى ىسكە اسىرىپ, 594 جۇمىس ورنىن اشۋ جوسپارلانعان. جىل باسىنان 12 جوبا ىسكە قوسىلىپ, جاڭا جۇمىس ورىندارى اشىلدى. سايرام جانە ورداباسى اۋداندارىندا ۆيتسە-پرەمەر مال بورداقىلاۋ, ەت ەكسپورتى, جىلىجاي شارۋاشىلىعىنداعى جوبالارمەن تانىسىپ, كاسىپكەرلەرمەن كەزدەستى. سايرام اۋدانىنداعى مال بورداقىلاۋمەن جانە ەت وڭدەۋمەن اينالىساتىن «Nurym Group» جشس-نىڭ جوبا قۋاتتىلىعى جىلىنا – 5 مىڭ توننا. ەت ەل وڭىرلەرىنەن بولەك, رەسەي مەن وزبەكستانعا ەكسپورتتالادى. مۇندا 25 ادام جۇمىس ىستەيدى. «قايىپ اتا» مال سويۋ بەكەتى دە ونىمدەرىن شەتەلدەرگە ەكسپورتتاۋدا. كاسىپكەر سىرىم ەرتاەۆ جاڭا ەت كومبيناتىن, مال بازارىن سالۋ جانە جەم-ءشوپ شىعارۋ جوباسىمەن تانىستىردى. سونىمەن بىرگە ءىرى قارا مالدىڭ ىشەك-قارنى مەن سۇيەگىن, قانىن تەرەڭ وڭدەپ, ءبىرازىن قىتايعا ەكسپورتتاۋ جوسپارلانىپ وتىرعانىن جەتكىزدى. جوبالارىنا قولداۋ كورسەتۋدى سۇرادى. بۇل ورايدا پرەمەر-ءمينيستردىڭ ورىنباسارى ماسەلە نازارعا الىناتىنىن ايتتى. ورداباسى اۋدانى بادام ەلدى مەكەنىندە ورنالاسقان «بورتە ميلكا» ءسۇت تاۋارلار فەرماسىندا تاۋلىگىنە 9 توننا ءسۇت وندىرىلەدى. بۇدان بولەك, تاۋلىگىنە 50 توننا ءسۇت وڭدەپ شىعارادى. مۇندا 100-گە جۋىق ادام تۇراقتى جۇمىسپەن قامتىلعان. كاسىپورىندا ماجارستاننان ارنايى اكەلىنگەن اسىل تۇقىمدى ءىرى قارا مالداردىڭ ءسۇتى وڭدەلەدى. زاۋىتتا شۆەتسيا جانە يتاليا مەملەكەتتەرىنەن دۇنيەجۇزىنە ايگىلى كومپانيالارىنىڭ قۇرال-جابدىقتارى ورناتىلعان. ءسۇت فەرماسىنىڭ ماڭىندا ۆيتسە-پرەمەرگە ءسۇت وڭدەۋ سالاسىنا قاتىستى جوبالار تانىستىرىلدى. كاسىپكەرلەر تاراپىنان وتىنىشتەر مەن ۇسىنىستار ايتىلدى. سونداي-اق سەرىك جۇمانعارين شۇبار اۋىلدىق وكرۋگىندە ورنالاسقان كوكونىس وندىرۋمەن اينالىساتىن جك «تۋلەباەۆ مەيرامبەك» جىلىجاي كەشەنىندە بولدى. جالپى جەر كولەمى 10 گەكتار اۋماقتا ورنالاسقان جىلىجايدىڭ ينۆەستيتسيالىق قۇنى – 300 ملن تەڭگە. جوبا 2018 جىلى ىسكە قوسىلعان, 30 ادام جۇمىس ىستەيدى. جىلىنا 500 توننا ءونىم وندىرەدى. جىلىجاي شارۋاشىلىعىمەن اينالىساتىن ازاماتتارمەن كەزدەسكەن ۆيتسە-پرەمەر جۇمىسقا كەدەرگى كەلتىرەتىن فاكتورلاردى بۇكپەسىز ايتۋ كەرەكتىگىن جەتكىزىپ, جەكە كاسىپكەرلىككە مەملەكەت تاراپىنان تۇراقتى قولداۋ بولاتىنىن اتاپ ءوتتى. شارۋالار مەن كاسىپكەرلەردىڭ وتىنىشتەرىن تىڭدادى. سونداي-اق كەزدەسۋدە جىلىجاي شارۋاشىلىعىنا مەملەكەتتىك قولداۋلار كۇشەيتىلگەنى, ونىڭ شارتتارى تۋرالى دا ماعلۇمات بەرىلدى. بۇگىندە وڭىردە جىلىجايلارعا قولداۋ كۇشەيتىلىپ, كومىر ماسەلەسى رەتتەلگەن.
وتاندىق ءونىم ءوندىرۋ, جەرگىلىكتى تاۋار وندىرۋشىلەردى قولداۋ شارالارى مەن وڭدەۋ سالالارىنىڭ دامۋى تۋرالى ماسەلەلەر جان-جاقتى تالقىلانعان بيزنەس قاۋىمداستىعىمەن كەزدەسۋدە ۆيتسە-پرەمەرگە ينۆەستيتسيالىق جوبالار تانىستىرىلدى. مىسالى, كەلەس اۋدانىنداعى ءىرى جىلىجاي جوباسى اياسىندا 42 ملرد تەڭگە كولەمىندەگى ينۆەستيتسيا سالىنىپ, كۇنباعىس ءوندىرىسىن دامىتۋ قولعا الىنباق. جوبا اياسىندا 51 گەكتاردان استام جىلىجاي سالىنادى. جىلىجاي قۇرىلىسىنىڭ العاشقى كەزەڭىندە مىڭعا جۋىق جەرگىلىكتى تۇرعىن جۇمىسپەن قامتىلماق. سونداي-اق وڭىردە «Standart رetroleum & سو» كومپانياسى قۋاتى 2 ملن توننا بولاتىن مۇناي وڭدەۋ جوباسىن ىسكە اسىرىپ كەلەدى. ال قۇنى 722 ملرد تەڭگە بولاتىن «وگەم وزەنىندە سۋ ەلەكتر ستانسالارىنىڭ كاسكادى» جوباسى ىسكە اسقان جاعدايدا وبلىستىڭ وڭتۇستىگىندەگى تۇرعىندار تۇبەگەيلى اۋىز سۋمەن تولىق قامتاماسىز ەتىلەدى. كاۋستيكالىق سودا, كالتسي كاربيدى, تسەمەنت شىعارىلاتىن كاسىپورىندا مىڭ جۇمىس ورنى قۇرىلادى. پرەمەر-ءمينيستردىڭ ورىنباسارى ءوڭىردىڭ بۇل باعىتتاعى دامۋ قارقىنىن جوعارى باعالادى. جاڭا جوبالاردىڭ جۇزەگە اسۋىنا مەملەكەت تاراپىنان قولداۋ قارالعانىن اتاپ ءوتتى. سونداي-اق كەزدەسۋ بارىسىندا ماقتا وڭدەۋ جانە اۋىل شارۋاشىلىعى سالاسىندا جۇزەگە اساتىن بىرقاتار جوبا جايلى, توقىما كلاستەرىن دامىتۋعا بارىنشا كۇش سالىنعانى ايتىلدى.
تۇركىستان وبلىسى
