كەڭەس وداعىنىڭ باتىرى ءاليا مولداعۇلوۆاعا ارنالعان قويىلىم قازاقتىڭ قاھارمان قىزىنىڭ ەرلىك ىستەرىن دارىپتەپ قانا قويماي, اكتەر, رەجيسسەر يگور سەديننىڭ ارحيۆ اقتارىپ تاپقان تىڭ دەرەكتەرىمەن دە تولىققان. سونىڭ ءبىرى – سارعايعان ساعىنىشقا تولى حاتتار.
– ەكىنشى دۇنيەجۇزىلىك سوعىستا اسقان ەرلىك كورسەتىپ, نەبارى 19 جاسىندا باتىر اتانعان قازاقتىڭ وجەت قىزى ءاليا مولداعۇلوۆانىڭ ءومىر جولى مەن ەرلىك اڭىزى مەنى قاتتى تاڭعالدىردى. پەسانى وقىپ, باتىر قىزدىڭ ومىربايانىمەن تانىسقاننان-اق قويىلىمنىڭ تۇتاس قۇرىلىمى كوز الدىما كەلە قالدى. ءاليانىڭ مايدان دالاسىنداعى كوزسىز ەرلىگىمەن قاتار, قارشاداي قىزدىڭ ادام رەتىندەگى ارماندارى مەن كىسىلىك كەلبەتىنە, ىشكى تولقىنىستارىنا دا ۇڭىلگىم كەلدى. وسى ءۇشىن ارحيۆكە باس سۇقتىم. سول جاقتان تاپقان قۇندى قۇجاتتار, مايداننان اتا-انا, تۋعاندارىنا جولدانعان ساعىنىشقا تولى سارعايعان حاتتار سپەكتاكلىمىزدىڭ سىرشىلدىق سيپاتىن ايشىقتاي ءتۇستى. بۇل شەشىمىمىز كورەرمەندەرگە دە ۇناعان سەكىلدى. سول ءۇشىن قۋانىشتىمىن, دەيدى قويىلىم رەجيسسەرى يگور سەدين.
سپەكتاكلدە باستى ءرولدى تەاتردىڭ تالانتتى اكتريساسى ايجۇلدىز حالىقوۆا كەمەلىنە كەلتىرە كەيىپتەپ شىقتى. رەجيسسەردىڭ سوزىنشە, اكتريسا رەجيسسەر قويعان تالاپتىڭ بارلىعىن جوعارى دەڭگەيدە ورىنداعان. بۇعان دەيىن دە «كىشكەنتاي حانزادا» قويىلىمىندا بىرلەسە جۇمىس ىستەگەن تالانتتى تاندەم ء«اليا» قويىلىمىن دا اسەرلى ەتىپ جەتكىزە ءبىلدى. ال سپەكتاكلدىڭ ساحنالىق شەشىمى, ياعني ستسەنوگرافياسىمەن جۇمىس ىستەگەن قانات ماقسۇتوۆ رەجيسسەر ويىن بىردەن ۇعىپ, وقيعا اسەرىن بەرەتىن ناعىز اتموسفەراعا باي كەڭىستىك تۋدىرا ءبىلدى. تاعىلىمعا تولى قويىلىمدى كورەرمەن دە زور قۋانىشپەن قابىل الدى. شىمىلدىق جابىلعاننان كەيىنگى ۇزىلمەي ۇزاق سوعىلعان تولاسسىز شاپالاق ءۇنى سونى ايقىن اڭعارتقانداي.
قالپىنا كەلتىرىلگەن كونە تەاتردىڭ تاعى ءبىر جارقىن جاڭالىعى – جاڭا ماۋسىممەن قاتار كوركەم عيماراتتا اشىلعان «جاڭا تەاتر» حالىقارالىق تەاتر فورۋمى دا تەاتر سالاسىنىڭ قىزمەتكەرلەرى ءۇشىن جەمىسىن بەردى. ەكى كۇنگە سوزىلعان شارادا بىلىكتى ماماندار ەلىمىزدىڭ تۇكپىر-تۇكپىرىنەن جينالعان تەاتر اكتەرلەرى مەن رەجيسسەرلەرگە, جالپى فورۋمعا قاتىسۋشىلار ءۇشىن ساحنالىق سويلەۋ (پەداگوگ دميتري كوشمين, سانكت-پەتەربۋرگ قالاسى), سەمسەرلەسۋ (پەداگوگ قازاقستاننىڭ ەڭبەك سىڭىرگەن قايراتكەرى سەرگەي ماتۆەەۆ, استانا قالاسى), رەجيسسۋرا جانە اكتەرلىك ونەر (پەداگوگ راچا ماحاتاەۆ, استانا قالاسى) بويىنشا شەبەرلىك ساعاتتارىن وتكىزدى. سونىمەن قاتار فورۋم جۇمىسىنا تەاتر سىنشىلارى, اتاپ ايتقاندا ونەرتانۋ كانديداتى ءسانيا قابديەۆا (الماتى قالاسى) مەن انتون الەكسەەۆ (سانكت-پەتەربۋرگ قالاسى) قاتىسىپ, «قازاقستان تەاترلارىنداعى زاماناۋي ۇردىستەر» تاقىرىبىندا ءدارىس وقىدى. تەاتر سىنشىلارىنىڭ م.گوركي اتىنداعى مەملەكەتتىك اكادەميالىق ورىس دراما تەاترى ۇجىمىنىڭ جاڭا قويىلىمدارىنا جاساعان كاسىبي تالداۋى دا تەاتردىڭ تۇراقتى كورەرمەندەرى ءۇشىن اسەرگە تولى ەرەكشە ونەر وقيعاسى بولعانى انىق.
بىرنەشە جىلعا سوزىلعان كۇردەلى جوندەۋ جۇمىستارىنا بايلانىستى توقتاپ قالعان شىعارماشىلىق جۇمىس قايتا جاندانىپ, تەاتر ساحناسىندا ء«اليا» سپەكتاكلىمەن قاتار جانە بىرنەشە جاڭا قويىلىمنىڭ پرەمەرالىق كورسەتىلىمى ءوتتى. ولاردىڭ قاتارىندا ر.ماحاتەۆتىڭ رەجيسسەرلىگىمەن قويىلعان ا.چەحوۆتىڭ «شيە باعى» كومەدياسى, ا.ترويانوۆتىڭ رەجيسسەرلىك قولتاڭباسى ءسان بەرگەن ت.لەتتستىڭ «جازدىڭ سوڭى» جانە رەجيسسەر س.فەدوتوۆتىڭ سۋرەتكەرلىك ساراپتاۋىندا ۇسىنىلعان ە.روستاننىڭ ايگىلى «سيرانو دە بەرجەراك» قويىلىمدارى بار.
ايتۋلى سپەكتاكلدەر كۇردەلى جوندەۋدەن وتكەن تەاتر عيماراتىندا 123-ماۋسىمىنىڭ اشىلۋىنا ارنايى دايىندالدى. تەاتر جاڭالىعى استە مۇنىمەن توقتاماق ەمەس, شىعارماشىلىق ۇجىم الداعى ۋاقىتتا دا كوڭىلگە رۋحاني ءلاززات سىيلار قىزىقتى قويىلىمدارىمەن ەرەسەكتەر مەن كىشكەنتاي كورەرمەندەرىن ءار كەز قۋانتۋعا اسىق.
