قارجى ۆيتسە-ءمينيسترى داۋرەن تەمىربەكوۆتىڭ ايتۋىنشا, قوردىڭ ەتەك-جەڭىن جيناۋ اياسىندا «ۇلتتىق قور – بالالارعا» جوباسىنا دا دۇرىستاپ كوڭىل بولىنەدى. بۇل ورايدا بىرىڭعاي جيناقتاۋشى زەينەتاقى قورىمەن (بجزق) ينتەگراتسيا جۇزەگە اسىرىلماق.
«بىرىڭعاي جيناقتاۋشى زەينەتاقى قورى جىل ىشىندە دۇنيەگە كەلگەن, قايتىس بولعان, ازاماتتىق العان جانە ازاماتتىقتى جوعالتقان بالالار سانىن ناقتىلايدى. دەرەكتەر تولىقتاي ناقتىلانعاننان سوڭ ۇلتتىق بانك كامەلەت جاسىنا جەتكەن بالالارعا تولەم جاساۋ ءۇشىن قاجەتتى سومانى بىرىڭعاي جيناقتاۋشى زەينەتاقى قورىنا اۋدارادى», دەيدى ۆيتسە-مينيستر.
ونىڭ سوزىنشە, بجزق قاراجاتتى بالالاردىڭ ماقساتقا ساي پايدالانۋى ءۇشىن ەكىنشى دەڭگەيلى بانكتە نەمەسە ۇلتتىق پوشتا وپەراتورىندا اشىلعان شوتىنا جىبەرەدى.
پارلامەنت قابىلداعان زاڭعا سايكەس ۇلتتىق قوردىڭ ينۆەستيتسيالىق تابىسىنىڭ 50 پايىزىن 18 جاسقا دەيىنگى بارلىق جاستاعى بالالار اراسىندا تەڭ ءبولۋ كوزدەلگەن. 2023 جىلعى 1 قازانداعى رەسمي دەرەكتەر بويىنشا ەلدەگى 18 جاسقا دەيىنگى بالالاردىڭ جالپى سانى – شامامەن 7 ملن ادام. ۇلتتىق قور قاراجاتىن ءبىلىم الۋعا جانە تۇرعىن ءۇي جاعدايىن جاقسارتۋعا باعىتتالعان ناقتى ەكى ماقساتتا پايدالانۋ ۇسىنىلادى.
18 جاسقا تولعانعا دەيىن بالالار «قاتىسۋشىلار» بولىپ ەسەپتەلەدى, كامەلەتكە تولعاننان كەيىن «الۋشىلار» ساناتىنا كوشەدى.
