بيىل ءتورتىنشى رەت ۇيىمداستىرىلىپ وتىرعان ءان بايقاۋىنا تۇركيا, وزبەكستان, قىرعىزستان, تاتارستان, باشقۇرتستان, ازەربايجان, پولشا, بەلارۋس, مولدوۆا, گرۋزيا, بۋرياتيا, كۋبا, بولگاريا, پورتۋگاليا, يسپانيا ەلدەرىنەن 18-35 جاس ارالىعىنداعى ەسترادالىق جانرداعى ورىنداۋشىلار, حالىقارالىق ءان بايقاۋلارىندا جەتىستىككە جەتكەن انشىلەر قاتىستى. فەستيۆالدىڭ اشىلۋ سالتاناتىندا وبلىس اكىمى دارحان ساتىبالدى سوڭعى بەس جىلدا تاريحي شاھار دامۋدىڭ جاڭا بەلەسىنە كوتەرىلگەنىن اتاپ ءوتتى. «وتكەن اپتادا تۇركى ەلدەرى ۇيىمىنىڭ شەشىمىمەن تۇركىستان قالاسى تۇركى الەمىنىڭ 2024 جىلعى تۋريستىك استاناسى بولىپ تانىلدى. بۇل – ءبىز ءۇشىن تۇركىستاننىڭ تاريحىن, رۋحانياتىن ودان ءارى تانىتۋعا, تۋريستەر ارقىلى الەمگە ناسيحاتتاۋعا تاماشا مۇمكىندىك. تۋريزممەن بىرگە مادەنيەت سالاسى دامۋعا ءتيىس. «Voice of Turan – 2023» حالىقارالىق قازاق اندەرى فەستيۆالىن ءداستۇرلى تۇردە وتكىزۋگە كۇش سالامىز. جىل سايىن اياسى كەڭەيە بەرەدى دەگەن سەنىمدەمىن», دەدى دارحان ساتىبالدى.
بايقاۋ شارتىنا سايكەس جەرەبەدەن سوڭ ءبىرىنشى كۇنى ەۋروپا مەن ازيا انشىلەرى قازاق ونەرىنىڭ شەبەرلەرىمەن بىرگە دۋەت ورىندادى. ال ەكىنشى كۇنى ءوز تاڭداۋىنداعى قازاق ءانىن شىرقاپ, سىنعا ءتۇستى. سونداي-اق فەستيۆال بارىسىندا پروديۋسەر مەيىرجان الياكباروۆتىڭ ۇيىمداستىرۋىمەن تۇركىستاندىق «تاڭبا» فولكلورلى توبىنىڭ تۇساۋى كەسىلدى. جەڭىمپازداردى مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى تولەگەن مۇحامەدجانوۆ باستاعان, قۇرامىندا ەسىمى ەلگە ءمالىم شىعارماشىلىق ينتەلليگەنتسيا وكىلدەرى, تانىمال ورىنداۋشىلار, كومپوزيتورلار مەن پروديۋسەرلەر بار قازىلار القاسى انىقتادى. بايقاۋ قورىتىندىسىندا بارلىق قاتىسۋشىعا ارنايى سىيلىقتار مەن گۇل شوقتارى تابىستالدى. قازىلار القاسىنىڭ شەشىمىمەن لاەليا اليەۆا (ازەربايجان) بيىل ءتورتىنشى رەت ۇيىمداستىرىلىپ وتىرعان جوبانىڭ باس جۇلدە يەگەرى اتاندى. جۇلدەلى ءى ورىن تاتيانا ەفرەموۆاعا (تاتارستان), ءىى ورىن مارگاريتا شيباەۆاعا (بەلارۋس), ءىىى ورىن انري گۋچمايدجە (گرۋزيا) مەن لوۋيس مەلگە (يسپانيا) بۇيىردى. ال اتيە چيگا (تۇركيا) «ەڭ ۇزدىك وڭدەلگەن ءان» اتالىمىمەن, گرەيدەر ۆارونا (كۋبا) «كورەرمەندەر كوزايىمى» اتالىمىمەن ماراپاتتالدى. كريستيان يانكۋلوۆ (بولگاريا), زاينەتدين (باشقۇرتستان), سولونار ۆالەري (مولدوۆا) بايقاۋدىڭ ارنايى ديپلومانتى اتاندى.
وسىلايشا, وتاندىق اۆتورلاردىڭ ۇزدىك شىعارمالارى, قازاق ءتىلى ناسيحاتتالىپ, ءان ارقىلى الەمگە حالقىمىزدىڭ مۋزىكا مادەنيەتىنىڭ سان الۋاندىلىعى پاش ەتىلدى. سونداي-اق تۇركى ءالىمنىڭ رۋحاني استاناسى – كيەلى تۇركىستان ناسيحاتتالدى.
تۇركىستان
