كەزدەسۋدە ەر-ريادتا وتكەن بۇكىلالەمدىك مۇرا كوميتەتىنىڭ 45-سەسسياسىنىڭ قورىتىندىلارى تالقىلاندى. اتالعان سەسسيادا التىن ەمەل ۇلتتىق پاركى مەن بارساكەلمەس قورىعىنىڭ اۋماقتارى يۋنەسكو-نىڭ الەمدىك مۇرا تىزىمىنە ەنگىزىلگەنى بەلگىلى. مۇنى «تۇراننىڭ سۋىق قىسقى شولدەرى» ترانسۇلتتىق اتالىمىنىڭ قۇرامداس بولىگى رەتىندە قازاقستان, تۇرىكمەنستان جانە وزبەكستان بىرلەسىپ ۇسىنعان بولاتىن.
ەرلان قارين ۇلتتىق كوميسسيانىڭ كوميتەتتەرى مەن كلۋبتارى اتقارعان جۇمىستىڭ ناقتى ناتيجەلەرىن اتاپ ءوتتى. سونداي-اق بيىل ماۋسىم ايىندا يۋنەسكو-نىڭ باس ديرەكتورى ودرە ازۋلەنىڭ قازاقستانعا رەسمي ساپارى ەكىجاقتى ىنتىماقتاستىقتى جاڭا دەڭگەيگە كوتەرگەنىن ايتتى. بۇدان بولەك, ەل اۋماعىنداعى يۋنەسكو نىساندارىنىڭ ساقتالۋىن قامتاماسىز ەتۋدىڭ ماڭىزدى ەكەنىنە نازار اۋداردى.
