فوتو: primeminister.kz
مادەنيەت جانە اقپارات ءمينيسترى ايدا بالاەۆا اتاپ وتكەندەي, مەملەكەت باسشىسى كامەلەتكە تولماعان بالالارعا جاسالعان قاستاندىقتاردى قوسا العاندا, وتباسىلىق-تۇرمىستىق زورلىق-زومبىلىقتىڭ كەز كەلگەن ءتۇرى ءۇشىن جازانى قاتاڭداتۋ جانە پروفيلاكتيكالىق جۇمىستىڭ تيىمدىلىگىن ارتتىرۋدى تاپسىردى.
الدىن الۋ جانە وتباسىلارعا كەشەندى كومەك كورسەتۋ اياسىندا وڭىرلەردە 68 قولداۋ ورتالىعى جۇمىس ىستەيدى, ونىڭ 19-ى ۋاقىتشا تۇراتىن ورىن ۇسىنادى. پسيحولوگيالىق, الەۋمەتتىك جانە قۇقىقتىق كومەكپەن قاتار ونداعى ماماندار وتباسى ينستيتۋتىن نىعايتۋعا جان-جاقتى قولداۋ كورسەتەدى. جالپى جىل باسىنان بەرى 100 مىڭنان استام كونسۋلتاتسيا بەرىلگەن. بۇگىنگى تاڭدا وسى ورتالىقتاردىڭ قىزمەتىن ستاندارتتاۋ جانە جانۇيالاردى تۇرمىسى ناشار وتباسىلار قاتارىنان شىعارۋ ءۇشىن ۆەدومستۆوارالىق ءوزارا ءىس-قيمىلدى جاقسارتۋ ءۇشىن بىرىڭعاي تۇجىرىمداما جوباسى ازىرلەنىپ جاتىر, 2024 جىلدان باستاپ ەنگىزىلەدى.
سونىمەن قاتار مينيستر قازىرگى ۋاقىتتا وڭىرلەردە ۇەۇ داعدارىس ورتالىقتارىنىڭ جۇمىسىن قارجىلاندىرۋ, جاستار اراسىندا وتباسىلىق قۇندىلىقتاردى ناسيحاتتاۋ, حالىقتىڭ رەپرودۋكتيۆتى دەنساۋلىعىن ساقتاۋ جانە از قامتىلعان وتباسىلارمەن پروفيلاكتيكالىق جۇمىس سياقتى شارالاردى قامتيتىن 156 الەۋمەتتىك جوبا ىسكە اسىرىلىپ جاتقانىن اتاپ ءوتتى. سونداي-اق وتباسىلاردى ساقتاۋ جانە تۇرمىستىق قىلمىستار سانىن ازايتۋ ماقساتىندا مادەنيەت جانە اقپارات مينيسترلىگى اگرەسسورلارمەن پسيحولوگيالىق جۇمىس جۇرگىزۋ بويىنشا پيلوتتىق جوبانى ىسكە قوستى.
ودان بولەك 16 قازاننان باستاپ رەسپۋبليكادا وتباسى, ايەلدەر جانە بالالاردىڭ قۇقىقتارىن قورعاۋ ماسەلەلەرى بويىنشا «111 – AMANAT» بىرىڭعاي مەملەكەتتىك بايلانىس ورتالىعى ىسكە قوسىلدى, ول ارقىلى جەدەل رەجيمدە قۇقىقتىق, پسيحولوگيالىق جانە كونسۋلتاتسيالىق كومەك كورسەتىلەدى.
ىشكى ىستەر ءمينيسترىنىڭ ورىنباسارى يگور لەپەحا زاڭنامالىق دەڭگەيدە قابىلدانعان تۇرمىستىق زورلىق-زومبىلىق ءۇشىن جاۋاپكەرشىلىكتى قاتاڭداتۋ جونىندەگى جاڭا شارالار تۋرالى ايتىپ بەردى. وڭىرلەردەگى جۇمىس تۋرالى جامبىل, تۇركىستان وبلىستارىنىڭ اكىمدەرى باياندامالار جاسادى.
پرەمەر-مينيستر وتباسىلىق-تۇرمىستىق زورلىق-زومبىلىقتىڭ الدىن الۋ مەملەكەتتىك دەڭگەيدە, سونداي-اق قوعامنىڭ تاراپىنان دا كەشەندى تاسىلدەردى تالاپ ەتەتىنىن ايتتى. اتاپ ايتقاندا, بيىلدان باستاپ تۇرمىستىق زورلىق-زومبىلىق ءۇشىن جاۋاپكەرشىلىك كۇشەيتىلدى: قىلمىستىق كودەكسكە, اكىمشىلىك قۇقىق بۇزۋشىلىق تۋرالى كودەكسكە ءتيىستى تۇزەتۋلەر ەنگىزىلدى. تامىز ايىنان باستاپ وڭىرلەردە ءتيىستى جول كارتاسى ىسكە اسىرىلىپ كەلەدى.
«جالپى قازىردىڭ وزىندە وتباسىلىق-تۇرمىستىق زورلىق-زومبىلىققا قاتىستى قىلمىستىق قۇقىق بۇزۋشىلىقتىڭ تومەندەگەنى بايقالادى. دەگەنمەن بۇل ماسەلەدە جاعداي ءالى دە كۇردەلى. جىل باسىنان بەرى وسىنداي فاكتىلەر بويىنشا پوليتسياعا 74 مىڭنان استام ءوتىنىش كەلىپ تۇسكەن. اكىمشىلىك قاماۋعا الىنعانداردىڭ سانى 2 ەسەگە كوبەيدى», دەدى ءاليحان سمايىلوۆ.
ۇكىمەت باسشىسىنىڭ ايتۋىنشا وڭىرلەردە قۇرىلعان وتباسىعا قولداۋ كورسەتەتىن 70-كە جۋىق ورتالىقتىڭ قاتارى جەتكىلىكسىز.
«3 جىل ىشىندە قوسىمشا وسىنداي 97 ورتالىق اشۋ كوزدەلىپ وتىر. قازىرگى ۋاقىتتا ولاردىڭ قىزمەتىن جۇيەگە كەلتىرۋ جۇمىستارى ءجۇرىپ جاتىر. سونىمەن قاتار ورتالىقتاردى ءتيىستى كادرلارمەن قامتاماسىز ەتۋ ماسەلەسىن دە شەشۋ قاجەت», دەدى پرەمەر-مينيستر.
سونىمەن قاتار ۇكىمەت باسشىسى تۇرمىستىق زورلىق-زومبىلىققا تاپ بولعان وتباسىلارعا جۇيەلى تۇردە پسيحولوگيالىق كومەك بەرۋ جۇمىستارى جۇرگىزىلمەيتىنىن ايتتى. بۇل رەتتە «جەدەل جەلى» مەن سەنىم تەلەفوندارىنىڭ مۇمكىندىگىن كەڭەيتۋ قاجەت.
«جالپى وتباسىلىق قۇندىلىقتار مەن ادامگەرشىلىك قاسيەتتەردى بالانىڭ بويىنا جاستايىنان قالىپتاستىرۋدىڭ ماڭىزى زور. ءبىزدىڭ قوعام وتباسىلىق اگرەسسورلارعا جانە وسىعان ۇقساس فاكتىلەردىڭ كەز كەلگەن تۇرىنە مۇلدەم توزبەۋشىلىك تانىتۋى ءتيىس. زارداپ شەككەندەردى, اسىرەسە بالالاردى مۇنداي پروبلەمامەن بەتپە-بەت قالدىرۋعا بولمايدى», دەدى ءاليحان سمايىلوۆ.
پرەمەر-مينيستر 2025 جىلعا دەيىن ءار وبلىستا بالالارعا ارنالعان پسيحولوگيالىق قولداۋ ورتالىقتارىن اشۋ جوسپارىن ازىرلەپ, بەكىتۋدى, جاڭا وتباسىن قولداۋ ورتالىقتارىن, سونداي-اق ناركولوگيالىق مەكەمەلەردى اشۋدى قامتاماسىز ەتۋدى, پسيحوتەراپەۆتەر مەن ناركولوگتاردى دايارلاۋعا ارنالعان مەملەكەتتىك تاپسىرىستى ۇلعايتۋ ماسەلەسىن پىسىقتاۋدى, سونداي-اق تۇرمىستىق زورلىق-زومبىلىق ءۇشىن جاۋاپكەرشىلىكتى قاتاڭداتۋعا قاتىستى قابىلدانعان تۇزەتۋلەر بويىنشا اۋقىمدى ءتۇسىندىرۋ جۇمىستارىن ۇيىمداستىرۋدى تاپسىردى.
