سايلاۋ جۇيەسىن تۇبىرىمەن وزگەرتپەسە, ادىلدىككە ەش كەپىلدىك جوق. ەڭ الدىمەن, داۋىس ساناۋعا تسيفرلىق مۇمكىندىكتەردى ەنگىزۋ كەرەك. ەلىمىزدەگى تسيفرلىق دامۋ ۇدەرىسىن شەتەلدىكتەردىڭ وزدەرى جوعارى باعالاپ, تاڭدانىسىن بىلدىرگەنىنە تالاي رەت كۋا بولدىق. ەندەشە, نەگە سول جەتىستىكتى سايلاۋ كەزىندە داۋىستى ءادىل ساناۋعا پايدالانباسقا؟
سەنات سايلاۋى كەزىندە ۇمىتكەردىڭ الدىن الا جەرگىلىكتى ءماسليحات دەپۋتاتتارىنىڭ بەلگىلى ءبىر بولىگىنىڭ كەلىسىمىن الاتىن تالابىن دا جويعان دۇرىس دەپ سانايمىن. ويتكەنى جەرگىلىكتى بيلىك وزدەرى «جاقتىرمايتىن» ازاماتتار ءوتىپ كەتپەۋى ءۇشىن, بىرنەشە «ۇنامدى» ادامداردان جالعان ۇمىتكەرلەر جاساپ, ولارعا الدىن الا ءماسليحات دەپۋتاتتارىنىڭ كەلىسىمىن جيناستىرىپ قويادى. ءسويتىپ, جەرگىلىكتى بيلىككە «تيىمسىزدەر» ۇمىتكەر بولا الماي قالادى. تىركەۋ اياقتالعاننان كەيىن الگى قولدان جاسالعان ۇمىتكەرلەر كانديداتۋرالارىن ء«وز ەرىكتەرىمەن» الىپ تاستايدى.
قانداي دەڭگەيدەگى سايلاۋ بولسا دا تىركەۋدەن وتكەن ۇمىتكەرلەر سايلاۋدىڭ ورتا تۇسىنا كەلگەندە «ارتقا قادام» جاساۋىنا جول بەرمەۋ كەرەك. ويتكەنى ادەتتە مۇنداي «قادامعا باراتىندار» جالعان ۇمىتكەرلەر بولىپ كەلەتىنى بەلگىلى.
اۋىل اكىمدەرىنىڭ سايلاۋىندا تۇرعىندار كىمنىڭ سايلاناتىنىن كۇنى بۇرىن ءبىلىپ وتىرادى. ويتكەنى جوعارىدان نۇسقاۋ بەرۋ ءالى دە تىيىلماي تۇر. بيىلعى ءماجىلىس سايلاۋىندا دا بۇرمالاۋشىلىق تۋرالى قانشا ايتىلدى, ناقتى ايعاقتار دا كەلتىرىلدى. بىراق جازالانعان كىم بار؟ ەشكىم. مۇنىڭ ءبارى اينالىپ كەلگەندە حالىقتىڭ بيلىككە دەگەن سەنىمىن ازايتادى.
مەملەكەت باسشىسىنىڭ ادىلەتتى قازاقستان قۇرۋ ماقساتىندا ساياسي رەفورمالاردى قولعا العانى قۋانتادى. الايدا ورتا جولداعىلار بۇل ۇدەرىسكە كوپە-كورىنەۋ كەدەرگى جاسايدى. سوعان جول بەرەتىن قيتۇرقى ادىستەردى زاڭمەن شەكتەپ, سايلاۋدىڭ ءادىل وتۋىنە بارىنشا كۇش سالىنباسا, حالىقتىڭ سەنىمىن ەشقاشان اقتاي المايمىز. ەلىمىزدە تۇبەگەيلى وزگەرىس بولۋ ءۇشىن ەڭ الدىمەن, «سايلاۋ تۋرالى» زاڭدى تۇبەگەيلى وزگەرتۋ قاجەت.
بەكزات دايراباي ۇلى,
ۇلىتاۋ وبلىستىق ءماسليحاتىنىڭ دەپۋتاتى
