بۇل وپەراتسيانى ۇلتتىق نەيروحيرۋرگيا ورتالىعىنىڭ دارىگەرلەرى انا مەن بالا ۇلتتىق عىلىمي ورتالىعىنىڭ اكۋشەر-گينەكولوگتەرىمەن بىرلەسىپ جاساعان. اۋەلى ميدىڭ سول جاق ساماي بولىگىندەگى ىسىكتى ميكروحيرۋرگيالىق ادىسپەن الىپ تاستاعان. كوپ كىدىرمەي جۇكتىلىكتىڭ 34 اپتاسىنداعى ايەلدى كەسار تىلىگى ارقىلى بوساندىرعان.
نەگىزى دارىگەرلەر جاس ايەلدىڭ ماڭداي بولىگىندەگى كولەمدى ىسىكتى شىلدەدە انىقتاعان. سودان جۇكتىلىكتىڭ 29-اپتاسىندا ناۋقاس ۇلتتىق نەيروحيرۋرگيا ورتالىعىنا جاتقان. دارىگەرلەر شارانانى ساقتاي وتىرىپ, ناۋقاستىڭ سول جاق ماڭداي بولىگىنىڭ ىسىگىن الىپ تاستاۋ ءۇشىن وپەراتسيا جاساعان. كەيىن ايەلدىڭ دەنساۋلىعى جاقسارىپ, ۇيگە شىعارىلىپتى. الايدا كوپ ۇزاماي پاتسيەنت دەنساۋلىعىنىڭ قايتا ناشارلاي باستاعانىن سەزەدى. دارىگەرلەر تاعى تەكسەرە كەلە, ىسىكتىڭ ۇلعايعانىن بايقاعان. وپەراتسيادان كەيىن ناۋقاستىڭ سامايىنداعى ىسىك مولشەرى ۇلعايۋىمەن قويماي, فۋنكتسيونالدى ماڭىزدى ايماقتارعا تەز وسە باستاپتى. بۇل – پاتسيەنتتىڭ قوزعالىس جانە سويلەۋ ورتالىقتارىنىڭ بۇزىلۋىنا اسەر ەتكەن.
ميدىڭ سول جاق ساماي بولىگىندەگى ىسىكتى ميكروحيرۋرگيالىق ادىسپەن الىپ تاستاۋ وپەراتسياسىنا نەيروحيرۋرگتەر ارالاسقان. كولەمدى ىسىك تولىعىمەن جويىلعان. مۇندا دارىگەرلەر انا مەن بالاعا زيان كەلتىرمەۋدى ويلاپ, حيرۋرگيالىق ءتاسىلدى دۇرىس تاڭداي بىلگەنىن ايتا كەتكەنىمىز ءجون. ونىڭ ۇستىنە نەيروحيرۋرگتەر مەن اكۋشەر-گينەكولوگتەر وپەراتسيادا ءجيى تىزە قوسا بەرمەيدى. سونىمەن وپەراتسيادان كەيىن سالماعى – 1 350 گرامم, بويى 48 سم نارەستە دۇنيەگە كەلگەن. جاڭا تۋعان سابيگە ودان ءارى مەديتسينالىق كۇتىم جاساۋ ءۇشىن انا مەن بالا ۇلتتىق عىلىمي ورتالىعىنىڭ نەوناتولوگيا بولىمشەسىنە اۋىستىرعان.
قۋانىشقا وراي, ەكى وپەراتسيا دا ءساتتى وتكەن. قازىر بالانىڭ جاعدايى جاقسى, سالماق جيناپ, وسە باستاعان. انا دا ءوزىن جاقسى سەزىنەدى. وپەراتسيانى نەيروحيرۋرگيا ورتالىعىنىڭ ۇزدىك دارىگەرلەرى جانە انا مەن بالا ورتالىعىنىڭ تاجىريبەلى اكۋشەر-گينەكولوگتەرى جۇرگىزگەنىن ايتتىق. ۇلتتىق نەيروحيرۋرگيا ورتالىعىنىڭ دارىگەرلەرى مۇنداي وپەراتسيانى ءۇشىنشى مارتە جاساپ وتىر ەكەن.
