سۋرەتتى تۇسىرگەن – رۋسلان كادىروۆ
بۇل – وڭىردەگى دارىگەرلەردىڭ بەدەلىن ارتتىرىپ قانا قويماي, قاراپايىم حالىقتىڭ ەمىنە جاردەم بولار ماڭىزدى العاشقى ورتالىق. ءارتۇرلى اۋرۋ-سىرقاۋدان زاپى بولعان تۇرعىنداردىڭ شيپاسىن تەزىرەك تابۋعا قابىلەتتى. قازىر وڭىردە مەديتسينالىق-سانيتارلىق كومەكتىڭ ۇزدىك تاجىريبەلەرىنىڭ ەكى ورتالىعى اشىلدى. ولاردىڭ جۇمىسى مەديتسينالىق قىزمەت كورسەتۋدىڭ قولجەتىمدىلىگى مەن ساپاسىن ارتتىرۋعا باعىتتالعان. ءوڭىر اكىمى ءباسپاسوز قىزمەتىنىڭ مالىمەتىنشە, ەندى وڭىردەگى ەكى ەمحانادا پاتسيەنتتەردىڭ الەۋمەتتىك جاعدايىنا ەرەكشە باسىمدىق بەرىلەدى. نەگە دەسەڭىز, بۇل ورتالىقتار وتباسىلىق مەديتسينا قاعيداتىن ەنگىزۋگە باعىتتالىپ وتىر. بىرتە-بىرتە بۇل وڭ تاجىريبە بۇكىل وبلىس كولەمىندە تاراتىلماق.
وڭىردەگى العاشقى مەديتسينالىق-سانيتارلىق كومەك كورسەتۋ تاجىريبەسىنىڭ ورتالىعى ەسكەلدى اۋدانىنىڭ قارابۇلاق اۋىلىنداعى ورتالىق اۋداندىق اۋرۋحانا بازاسىندا, ال ەكىنشىسى تالدىقورعان قالالىق №1 ەمحانانىڭ 6-شاعىن اۋدانداعى عيماراتىندا اشىلدى.
وبلىستىق دەنساۋلىق ساقتاۋ باسقارماسىنىڭ باسشىسى ارمان جانسەنگىروۆ ءوز قۇتتىقتاۋ سوزىندە بۇل ورتالىقتار مەديتسينالىق مەكەمەلەردىڭ قۇرىلىمدىق بولىمشەلەرى بولا وتىرىپ, ادام دەنساۋلىعىنا قامقورلىق جاسايتىن كەشەندى مەديتسينالىق, الەۋمەتتىك جانە پسيحولوگيالىق كومەك بەرۋ ورتالىقتارىنا اينالاتىنىن اتاپ ءوتتى.
«دەنساۋلىق سالاسى بويىنشا اۋداندا جۇمىس جۇيەلى ءجۇرىپ جاتىر. مەديتسينالىق قىزمەتتىڭ جاڭارۋى – بىلىكتى مامانداردىڭ شوعىرلانۋىنا, ساپالى جۇمىس ءتۇرىن ۇيىمداستىرۋعا بارىنشا سەرپىن بەرەدى», دەدى ا.جانسەنگىروۆ.
بۇل رەتتە مۋلتيديستسيپلينارلى توپ كوپسالالى كوماندادان قۇرالعان, اتاپ ايتقاندا, ونىڭ قۇرامىندا وتباسىلىق دارىگەرلەر, پاتروناج مەدبيكەلەرى, اكۋشەرلەر, الەۋمەتتىك قىزمەتكەرلەر مەن پسيحولوگتەر بار. ءوز كەزەگىندە «استانا» مەديتسينالىق ۋنيۆەرسيتەتى» اق ديرەكتورلار كەڭەسىنىڭ توراعاسى, «Primary Health Care» ۇلتتىق قاۋىمداستىعىنىڭ توراعاسى تولەباي راحىپبەكوۆ العاشقى مەديتسينالىق-سانيتارلىق كومەكتى قايتا قۇرۋ كوزدەلىپ وتىرعانىن ايتتى.
«بۇل وتباسىلىق مەديتسينانى دامىتۋ مەن مەديتسينالىق كومەكتىڭ ساپاسىن ارتتىرۋ ءۇشىن جاسالىپ وتىر. وسىنداي العاشقى ورتالىقتى الماتى وبلىسى ەڭبەكشىقازاق اۋدانىندا اۋىلدىق كوپسالالى اۋرۋحانا بازاسىندا اشقان ەدىك. دۇنيەجۇزىلىك دەنساۋلىق ساقتاۋ ۇيىمى ءبىزدىڭ جوبامىزدى ەۋروپانىڭ 53 ەلىنە الەمدەگى العاشقى دەمونستراتسيالىق پلاتفورما رەتىندە ۇسىندى. جالپى, ءبىزدىڭ قاۋىمداستىق 2018 جىلدان باستاپ جۇمىس ىستەپ كەلەدى. سونداي-اق ءبىز پسيحيكالىق دەنساۋلىق ماسەلەلەرىمەن دە اينالىسامىز. حالىقتى مي قان اينالىمى بۇزىلىسىنىڭ, ءسۇت بەزى قاتەرلى ىسىگىنىڭ جانە ت.ب. سىرقاتتاردىڭ العاشقى بەلگىلەرىن انىقتاۋعا ۇيرەتەمىز. بۇگىن اشىلعان ورتالىقتار جەمىستى جۇمىس ىستەيدى دەپ سەنەمىز جانە ولاردىڭ تاجىريبەسى جاقىن ارادا جەتىسۋ وبلىسىنا كەڭىنەن تاراتىلادى», دەدى ت.راحىپبەكوۆ.
وسى كۇنى ورتالىقتىڭ رەسمي اشىلۋىنان بۇرىن «Primary Health Care» ۇلتتىق قاۋىمداستىعىنىڭ ساراپشى ماماندارى دارىگەرلەر مەن مەدبيكەلەرگە, الەۋمەتتىك قىزمەتكەرلەر مەن پسيحولوگتەرگە وقىتۋ ترەنينگتەرىن وتكىزدى.
جالپى, مۇنداي ۇزدىك تاجىريبە ورتالىقتارىن قۇرۋداعى نەگىزگى ماقسات – مەديتسينالىق كومەكتى قولجەتىمدى ەتە ءتۇسۋ, ادام مەن ونىڭ وتباسىنىڭ قاجەتتىلىكتەرى ءۇشىن دەنساۋلىق ساقتاۋ قىزمەتتەرىن ينتەگراتسيالاۋ, شاعىمدار سانىن ازايتۋ, شاعىم تۇرلەرىن تالداۋ, ۇيىمداستىرۋ جانە ادىستەمەلىك جۇمىس جۇرگىزۋ. تاعى ءبىر اسپەكتىسى – حالىقتىڭ مەديتسينالىق ساۋاتتىلىق دەڭگەيىن ارتتىرۋ, اۋرۋلاردى ەمدەۋ جانە الدىن الۋ ۇدەرىسىنە قاتىسۋ, حالىقتىڭ دەنساۋلىعىن قورعاۋ سالاسىنداعى جوبالار مەن الەۋمەتتىك باعدارلامالاردى ازىرلەۋ, سونداي-اق دياگنوستيكاعا باعدارلانعان تاسىلدەن تۇلعاعا باعدارلانعان تاسىلگە كوشۋ.
عيماراتتىڭ جالپى اۋدانى – 100 شارشى مەتر, 6 بولمەدەن تۇرادى. تاۋلىگىنە قوسالقى ستانسادا اعا فەلدشەر, اعا جۇرگىزۋشى جانە قۇرامىندا 4 فەلدشەر مەن 4 جۇرگىزۋشى بار 4 بريگادا جۇمىس ىستەيدى. قۇرىلىستى جۇرگىزگەن – «Qaz damu constrution». بۇعان دەيىن اكىمشىلىكتىڭ جەرتولەسىندە جۇمىس ىستەپ كەلگەن «جەدەل جاردەم» قىزمەتىندەگىلەر كولىك قوياتىن ارنايى ورىنعا دەيىن ويلاستىرىلعانىنا العىس ءبىلدىردى.
جالپى, ەسكەلدى اۋدانىندا مەديتسينا باعىتى بويىنشا كوپتەگەن يگى ءىس جۇزەگە اسىپ جاتىر. ماسەلەن, 2021 جىلى بيعاش, 2022 جىلى اباي, تەرەكتى, قورجىمباي اۋىلدارىندا بلوكتى-ءمودۋلدى مەديتسينالىق پۋنكت اشىلدى. بيىل بوكتەرلى, وتەناي, جەڭدىك اۋىلدارىندا جاڭا مەديتسينالىق پۋنكتەردىڭ قۇرىلىسى قارقىن الدى. ال جەتىسۋ اۋىلىنداعى امبۋلاتورياعا كۇردەلى جوندەۋ جۇمىسى جۇرگىزىلەدى.
جەتىسۋ وبلىسى
