ەنەرگەتيكا مينيسترلىگى «تەكەلى ەنەرگوكەشەنى» جاۋاپكەرشىلىگى شەكتەۋلى سەرىكتەستىگى ءۇشىن ەلەكتر ەنەرگياسىن ءوندىرۋدىڭ شەكتى ءتاريفىن 12,98 تەڭگە/كۆتساع دەڭگەيىندە بەكىتكەن. بوساتۋ باعاسى 14,79 تەڭگە/كۆتساع قۇرايدى. جەتىسپەيتىن ەلەكتر ەنەرگياسى «تالدىقورعان كولىك-ەلەكتروجەلىلىك كومپانياسى» اكتسيونەرلىك قوعامىنىڭ ەلەكتر ەنەرگياسىن تاسىمالداۋ جانە تاراتۋ جونىندەگى ءىرى ەنەرگەتيكالىق جۇيەسى ارقىلى جابىلادى. جالپى وڭىرلىك ەلەكتر جەلىلىك كومپانيانىڭ اكتيۆتەرىندە 12 309 كم كابەلدىك جانە اۋە ەلەكتر بەرۋ جەلىلەرى بار.سونىمەن قاتار كاسىپورىن بالانسىندا 2126 كىشى ستانسا بار. ەلەكتر جەلىسىنىڭ فيزيكالىق توزۋى 87 پايىزعا جەتكەن.
«وبلىس اۋماعىندا ەلدىڭ گيدروەنەرگەتيكالىق رەسۋرستارىنىڭ ەداۋىر قورى شوعىرلانعان. بۇگىندە وڭىردە قۋاتى 159,9 مۆت, 11 جەك وبەكتىسى جۇمىس ىستەيدى. ونىڭ ىشىندە قۋاتى 104,9 مۆت 9 گيدروەلەكترستانسا بار. جانە كۇن, جەل ەلەكتر ستانسالارى بار. 2027 جىلعا دەيىن بەلگىلەنگەن قۋاتى 76 مۆت 2 جەك وبەكتىسىن ىسكە قوسۋ جوسپارلانعان», دەدى ا.ساتقاليەۆ.
قازىر وڭىردە گازداندىرۋ دەڭگەيى 41,2 پايىزدى قۇرايدى. شامامەن 288 مىڭ ادام تابيعي گازعا قول جەتكىزگەن. بۇل كورسەتكىشكە كوڭىل تولمايدى. وسى جىلى مينيسترلىكتىڭ 003 بيۋدجەتتىك باعدارلاماسى بويىنشا اكىمدىككە گازداندىرۋعا 5,4 ملرد تەڭگە بولىنگەن. بۇل ەسكەلدى اۋدانىنىڭ 3 ەلدى مەكەنىن, قاراتال اۋدانىنىڭ 1 ەلدى مەكەنىن, سونداي-اق تالدىقورعان جانە تەكەلى قالالارىن گازداندىرۋعا ارنالعان. بيىل تاعى 3 اۋىلعا كوگىلدىر وتىن كىرگىزۋ جوسپاردا بار. تەكەلى جانە ۇشتوبە قالالارىن گازداندىرۋ جوبالارىن اياقتاۋ ءۇشىن 2024 جىلعا 3,9 ملرد تەڭگە قاراستىرىلعان ەكەن.
«بۇدان باسقا 2024-2026 جىلدارعا رەسپۋبليكالىق بيۋدجەتتى ءماجىلىس پارلامەنتىندە تالقىلاۋ شەڭبەرىندە 23 جوباعا قوسىمشا 1,9 ملرد تەڭگە ءبولۋ ماسەلەسى پىسىقتالۋدا. ءوڭىردى ودان ءارى گازداندىرۋ ماقساتىندا «تالدىقورعان – ءۇشارال» گاز قۇبىرىن سالۋ بويىنشا ءىرى ينفراقۇرىلىمدىق جوبانى باستاۋ جوسپارلانىپ وتىر. بۇل 3 اۋداندى – اقسۋ, سارقان جانە الاكول اۋداندارىن گازداندىرۋعا باعىتتالعان. اكىمدىك جوبالاۋ-سمەتالىق قۇجاتتامانى ازىرلەپ جاتىر. جوبالاۋ-سمەتالىق قۇجاتتامانى ازىرلەۋ اياقتالعاننان كەيىن مينيسترلىك ءوتىنىمدى قاراۋعا دايىن», دەيدى ۆەدومستۆا باسشىسى.
ودان كەيىن اگرارلى ءوڭىردى باستى ماسەلەسىنىڭ ءبىرى – ديزەل وتىنى. قازىر وڭىردەگى شارۋالار جانارمايدىڭ قىمباتتىعىن ايتىپ جىل سايىن تىلەك-ارىزىن جەتكىزۋدە. ءار ماۋسىم سايىن باعاسى وسكەن تەحنيكا ازىعىنىڭ جايى شارۋالاردىڭ شامىنا تيۋدە. وسى رەتتە كۇزگى دالا جۇمىستارىن ۋاقتىلى جانە تۇراقتى جۇرگىزۋ ءۇشىن ەلىمىزدىڭ اۋىل شارۋاشىلىعى وندىرۋشىلەرىنىڭ اتىنا 426 مىڭ توننادان استام ديزەل وتىنىنىڭ كولەمى بەكىتىلگەن. قازىر ديزەل وتىنى باعاسى 1 ليتر ءۇشىن – 250 تەڭگە. جەتىسۋدىڭ ءىرى اۋىل شارۋاشىلىعى وندىرۋشىلەرى ءۇشىن 7,9 مىڭ توننا ديزەل وتىنى كوزدەلگەن. بۇگىندە, 1,9 مىڭ توننا تيەپ-جونەلتىلىپتى. ءمينيستردىڭ ايتۋىنشا, اۋىل شارۋاشىلىعى وندىرۋشىلەرىنە جانە جانار-جاعارماي قۇيۋ ستانسالارىنا ديزەل وتىنىن جەتكىزۋدى باقىلاۋ ءۇشىن ارنايى پين-كودتار ەنگىزىلگەن
«جەتىسۋ وبلىسىندا سۇيىتىلعان مۇناي گازىنىڭ شەكتى بولشەك ساۋدا باعاسى 1 ليتر ءۇشىن 76-81 تەڭگەنى قۇرادى. وڭىردە 4 گاز تولتىرۋ ستانساسى جانە 64 اۆتوموبيلگە گاز قۇيۋ ستانساسى بار. وبلىستاعى سۇيىتىلعان مۇناي گازىن تۇتىنۋ 2022 جىلى 20 مىڭ توننانى قۇرادى. وسى جىلدىڭ قاڭتار-تامىز ايلارىندا شامامەن 28,2 مىڭ توننا تۇتىنىلدى. ءبىز ۇزاقمەرزىمدى باعا تۇراقتىلىعىن قامتاماسىز ەتۋ جانە باعانىڭ الىپساتارلىق كوتەرىلۋىنە جول بەرمەۋ ماقساتىندا سۇيىتىلعان مۇناي گازى نارىعىن رەفورمالاۋ بويىنشا شارالار قابىلداپ جاتقانىمىزدى اتاپ وتكىم كەلەدى», دەدى مينيستر.
ايتا كەتەيىك, بۇل شارالار سۇيىتىلعان مۇناي گازىن ساتۋدىڭ شەكتى بولشەك ساۋدا باعاسىن بەلگىلەۋ ارقىلى بولشەك ساۋدا باعاسىنىڭ كۇرت وسۋىنە جول بەرمەيدى.
جيىن سوڭىندا ۆەدومستۆو باسشىسى تۇرعىنداردىڭ ساۋالىنا جاۋاپ بەرىپ, جۋرناليستەرمەن تىلدەستى.
جەتىسۋ وبلىسى
