زايسان اۋدانىنىڭ قۇرىلعانىنا بيىل 95 جىل. وسىناۋ مەرەيلى داتاعا وراي وڭىردە ءتۇرلى شارالار قولعا الىنعان. سونىڭ ءبىرى – قازاقتىڭ بەكزات ونەرى قۇسبەگىلەر سايىسى. ساۋىردىڭ باۋىرىندا اقىنبەك اقساقالدان باسقا بۇركىت باپتاپ وتىرعان ەشكىم جوق. دەسە دە اۋدان اكىمدىگىنىڭ قولداۋىمەن بۇركىتشىلەر سوناۋ اتىراۋ, الماتى, اباي, اقمولا, قاراعاندى, اقتوبە وبلىستارىنان كەلگەن.
ءتۋرنيردىڭ اشىلۋ سالتاناتىندا قازاقستان رەسپۋبليكاسى «قۇسبەگىلىك» فەدەراتسياسىنىڭ ۆيتسە-پرەزيدەنتى باعدات مۇپتەكقىزى, قازاقستاننىڭ قۇسبەگىلىكتەن مەملەكەتتىك جاتتىقتىرۋشى كۇنتۋعان بازاربەك, «شىعىس التاي» بۇركىتشىلەر فەدەراتسياسىنىڭ توراعاسى تاتتىمبەت كاپ ۇلى ءسوز سويلەپ, سايىسقا قاتىسۋشىلارعا ساتتىلىك تىلەدى.
شارانىڭ العاشقى كۇنى قۇماي تازىلاردىڭ جارىسى وتكەن. وعان ۇزىن سانى 26 تازى قاتىسىپ, ۇشقىرلىقتارى, ەپتىلىكتەرى, قىراعىلىقتارى سىنالدى. ناتيجەسىندە, I ورىندى جانات احاتوۆتىڭ تازىسى «ساعىم», II ورىندى اليجان نۇرمۇحامەتوۆتىڭ تازىسى «سۇڭقار», III ورىندى ايدىن اسقاربەك ۇلىنىڭ تازىسى «تۇيعىن» يەلەندى. ال قۇسبەگىلەردىڭ سايىسىندا I ورىندى اتىراۋ وبلىسىنان كەلگەن ارمان قوشقاربەكوۆ جەڭىپ الدى. جۇلدەلى II ورىندى دا اتىراۋ وبلىسىنىڭ بۇركىتشىسى سارمات ابدۋكاريموۆ يەلەندى. III ورىندى استانادان كەلگەن كۇنتۋعان دياس قانجىعاعا بايلادى. يتەلگى مەن قارشىعا سايىسىندا جۇلدەلى ورىنداردى قاراعاندى, اتىراۋ, اباي, شىعىس قازاقستان وبلىستارىنىڭ قۇسبەگىلەرى العان.
جەڭىمپازدارعا اۋدان اكىمىنىڭ اتىنان اقشالاي سىيلىقتار, كۋبوگ, مەدالدار جانە زايسان اۋدانىنىڭ 95 جىلدىق مەرەيتويىنا ارنالعان توسبەلگىلەر تاپسىرىلدى.
شىعىس قازاقستان وبلىسى,
زايسان اۋدانى
